نوفيلا.. سرطان اسعدني

الفصل الاول

#سرطان_اسعدني

الفصل الاول

اسمي هبة خالد عمري 22 تخرجت معلمة تاريخ ومانحبش القراية بكل حتى لما  نجحت نجحت بالدف ولما قلقت من قعاد الحوش مشيت ندرس في مدرسة خاصة عجبتني ان الغرض منها مش الاستفادة المادية قدام مساعدة اولياء الامور اللي مايقدروش على المبالغ الغالية اللي في المدارس الاخرى وعجبني فيها ان دايرين فصل ثقافي يعطو فيه في قصص خاصة مش شور المنهج ومرات واجد نمشي للمدرسة على خاطر الحصة هذي بالذات اني نسمع مش ماسكة كتاب ونقرا
بسيارتي ولبسي حلو وانيق لكن غريب لبسي كله اللبس الهندي المنغولي اللي هو عبارة عن سواري طوال مخصرات وواسعات من تحت زي القفطان بس قصير شوي وبفتحات طويلة من الجنبين وتحت منهن ياسروال زي التوبو يا سروال واسع رغم غرابة لبسي لكن حلو هكي نحب نلبس لانه مستور نظام نلبسله وشاح طول ومانحبش نحط على وجهي شئ غير واقي شمس بس عشان ربي ناعم عليا ببشرة زي بشرة البيبي وعيون وسط لونهن عسلي ورموش كثيفة وشفايف رغم انهن صغار لكن الشفة التحتية منفوخة شوي ومش طويلة طولي 1,60 سم  وهادية اغلب الوقت لكن كان انسجمت تسمعي ضحكتي للشارع ماعنديش صاحبات قراب يعني صاحبات عاديات الا اختي الاكبر مني بسنة اماني نحكي لها في كل شئ وهي مكمن سري ونا زيها ومانتفارقوش بكل حتى في حواشين جدودنا نباتو مع بعض يا نروحو مع بعض وتو اماني تزوجت ليها شهر من حبيبها بعد علاقة اربعة سنين ورغم فراقها واجعني لكن فرحتي انها خذت حبيب عمرها سادتني وخواتي احلام وليلى متزوجات من سنين لانهن هنا الكبار ليلى البكرية وعندها ثلاثة عيال يقولو للجن انزل والله نرقالك لما كانو صغار وتو نجك لي حبايب قلبي انس ويزيد ورائد واما احلام عندها بنت اسراء وولد اوس وهذوم هاديين زي خالتهم طبعا اللي هيا نا ونا نعشق حاجة اسمها اطفال لدرجة انقوللهم كان نتزوج نجيب فريق عيال وفريق بنات وبندير زي الارنب نربعن من هنا نحمل من هنا ومحسن خوي يجي بعد ليلى واحلام ومتزوج لكن ربي مارزقاش بعيال لتو ويحب مراته واجد وهي عليك الطيوبة اسمها رحمة وخوي عمار بعده متزوج حتى هو وعنده خالد على اسم باتي مرته عادي شادة خيرها شرها في حالها يعني وبعده زياد متزوج حتى هو ومرته من عمر اماني اختي يعني اكبر مني بسنة وجوها فستري للمليون طالما انتي معاها والضحكة ماتفارقش فمك ضاربة الدنيا بكراع كلب حشاكم واما سراج عارفة انه يحب اخت صاحبه ويموت فيها لكن مش داير معاها علاقة احتراما لخوها احمد رفيقه لكن مش عارفة شنو اللي مخليه لتو ماخطبهاش رغم انه حوشه واتي لكن ممكن يبي يكمل الماجستير قبل مش عارفة لانه الوحيد عندنا دماغ قراية وتقريبا يخطط حتى للدكتوراء في تخصص الانجليزي
او هو يستنى فيها لانها آخر سنة جامعة وبعدها اتجي اختي اماني اللي تزوجت ليها شهر وبعدها نا
ماعنديش في قصص الحب مش لحاجة لكن نقول الحب الحلال مافيش احلى منه بنستنى نين يجيني نصيب كويس يدق بابي وبعد الزواج نعطيه حبي كله
شخصيتي بسيطة كل شئ بسيط يمثلني البهرجة الكذابة مانحبهاش وهذا ديمة مسبب ليا خلاف مع ماما وخواتي بالذات نحن حالتنا المادية تعتبر ميسورة
ماما كانت مديرة مدرسة ثانوي وتو استقالت طبعها عادي زي اي ام تبي مصلحة عيالها وطبعا ديمة تشوف في رايها هو الصح مهما كان رايها اعوج او غلط
بابا ربي يحفظه تقول صديقنا مش باتنا اماني لما جاها حبيبها بيخطبها ماما رفضت وقالت مستواه التعليمي مش ولابد لانه خريج معهد صناعي واختي جامعة لكن يشتغل وعنده ورشة سيارات ادخل عليه ماشاءالله في الشهد يكفي انه وفى بعهده لاختي لما كانت ترفض في عرسان اشكال والوان على خاطره ويكفي انها بتعيش مستورة معاه لكن بابا صبا معاها لما عرف ان اختي تبيه حتى زيجات خوتي كلها غصبن عن ماما عشان عارف ان خوتي يحبو صبايهم وبابا اصلا شهادته متخرج من قسم الجيلوجيا لكن ما كملش بعد ماتخرج في تخصصه لانه كان يعشق السيارات وتو ماشاءالله عنده معرض سيارات كبير ومعروف في البلاد