#سرطان_اسعدني
الفصل السابع
ليلة فرحي قد مانقول حلوة وهيا حلوة اهتمام احمد ودلاله ليا خلاني في عالم ثاني وكاننا واخذين بعض على علاقة مش انا اللي عارضة عليه الزواج وليلة دخلتي كانت احلى ليلة كيف حاوطني احمد باهتمامه وحنانه عليا ماتوقعتاش هكي بكل الصراحة وامنا ثاني يوم بالذات لما صبح عليا وبابتسامة على وجهه محلاها النوضة الصبح هكي وحي عليا لما لبس الزبون ونا لبست العربي طلعنا ماتفهم شئ نحن الاثنين وعدن الثلاثة ايام احلى ايام وتو نا نوتي في شنطتنا بيش بنعدو لمصر وقلبي خايف وعقلي متوتر وكلام احمد طمني وشجعني وطالما هو معاي نحس في روحي بخير
سبحان الله كيف ربي والف بينا ومن ايام بسيطة نحس في روحي كاننا روح وحدة
وطلعت طيارتنا وتوكلنا على الله واحمد مافارقش ايدي والمشكلة ان د/ حسام خذا لينا موعد بيكون اليوم العشية عشان العينة وطيارتنا طلعت الصبح ووصلنا بامان ونحس في روحي مخنوقة لكن شدت احمد على ايدي هيا اللي تهون عليا وتغذينا ومهناك غذا ومشينا للشقة اللي ماجرينها وارتحنا شوي وبعدها طلعنا للعيادة ودخلوني ونا ماسيبت ايد احمد الا بعد وين ووين من الخوف خذو العينة وقالو بتقعد اسبوع
ومر الاسبوع ونحن ندهور في الاسكندرية اللي حافظين فيها كل شبر من كثر ماجيناها لكن هذا هو نغيرو في جو ونبعدو في التفكير السلبي علينا
وجاء وقت النتيجة خذيناها وعدينا للدكتور باعتنا ليه د/حسام
احمد.. اهدي يا هبة وان شاءالله خير
انا.. خير يارب
وخشينا على الدكتور ومديت ليه التقرير
وطول الدكتور وهو يقرا
انا.. احكي يا دكتور ما ادس علينا شئ
الدكتور .. بصي هو العينة بتقول ان في ورم لكن لسة في البداية بس
احمد.. بس ايه
الدكتور .. التقرير بيقول ان في كيس حمل في بداية تكونه ولان الجهاز دقيق جدا اكتشف بداية الحمل لان بالطبيعي الحمل بيبان بعد عشرة ايام او موعد الدورة الثاني
انا بفرحة ماقدرتش ندسها .. قصدك نا حامل نا بنكون ام بنجيب بيبي بيقولي ماما
احمد بخوف وركز على كلام الدكتور لان خلاص نا لهيت في فرحتي .. طيب طالما بتقول ان في ورم وفي كيس حمل كيف الحل
الدكتور بهدوء .. حاليا هو في بداية الورم ممكن مش حيسبب ليها مشاكل ونشوف الحالة بعد الولادة ايه اللي بيحصل
احمد سيبني غارقة في فرحتي وهو اللي يناقش في الدكتور على حالتي .. طيب ومافيش خطورة على الجنين
الدكتور .. بما انها مش حتاخذ اي علاج لحتى تولد يبقى مافيش خوف على الجنين ويبقى يتابع الحالة د/ حسام
وتكون تحت ملاحظته لاي تغيير يحصل
احمد.. شكرا يا دكتور
وخذا احمد التقرير وطلعت معاه بعد ماحط ايده في ايدي وركبنا السيارة بدون ولا كلمة نا غارقة في فرحتي ونتلمس في بطني وهو ساكت مش عارفة فيش يفكر ووصلنا الشقة
احمد بهدوء حضني .. مبارك يا قلبي مبارك عليك الحمل وان شاءالله تفتحي عويناتك على خير
انا ضايقني نبرة الحزن في صوته ..انت مش فرحان ليا مش فرحان عشان حققت حلم عمري
أنت تقرأ
نوفيلا.. سرطان اسعدني
Nouvellesولان التشجيع على رواية السابقة كان مرتفع سوى هنا على الوتباد او على الفيس فوعدنا متابعاتنا الحلوات بهدية وكانت هديتنا تنزيل الرواية هذي مرة وحدة اتمنى ان تنال اعجابكم
