#سرطان_اسعدني
الفصل الخامس
اليومين اللي قبل مايطلع فيهن تقرير الصورة كنت نطلع مع حنين ونورهان وهنا يبتتن والجو حلو الحق نسيت شوي معاهن ونا مفكرة اني نعرض على احمد الزواج طول عمري كنت متمنية يجيني راجل نفس صفات واطباع احمد او حتى هو يجيني لكن نحس فيه مايفكرش فيا بكل مع انه عمري ماسمعته قالي اني زي حنين لكن عمره ماتعامل معاي تعامل يخالف اني اخته
وبالذات لما سراج كلمني وقالي انه بمجرد مايروح من مناقشة الماستر بيفتح مع ماما موضوع زواجه من حنين والمشكلة سراج وضعه غير خوتي لان الوحيد اللي حوشه فوق حوشنا مع انه بيطلع يحضر الدكتوراء على طول بمجرد ماياخذ الماستر وممكن بيكون فرحه في شهرين وهذا ليش زدت شجعت حنين انها تكمل بتاتها صح هو سراج واخذ واخذ حنين سوى رضت ماما او لا لكن هذا هو مانبوش مشاكل بالذات مع حنين حساسة بطبعها
وجاء اليوم ونا كله ندعي لربي ونقول لو هو ابتلاء يخففه عليا بس
وبعد تفكير وصلت اني نخلي احمد البديل الثاني لمشكلتي وفكرت في اماني على الاقل نضمنها ماتحكي لحد الا راجلها ونقدر نمشي معاهم لمصر بدون ماحد يشك ليش ماشية وانا بنتصل بيها هيا اتصلت وللاسف ماقدرتش نعبى عليها ووجعني خاطري وحسيت بالكسرة ومش عارفة الحكمة عند ربي شنو وعديت للمصحة ولقيت احمد واخذ التقرير وخش معاي للدكتور وقديش ريحني انه خش معاي بالذات لما صبا احذاي وايده تضغط على كتفي مرة مرة كأنه يقولي اطمني نا معاك والحق طلعت من الدكتور ونا شبه منهارة وخذاني احمد لمطعم مقابل المصحة وحكيت ليه شنو نبي لاني فعلا غير نحمل بس مستعدة مانحسساش بوجودي او اني عالة عليه نا راتبي قاعد مانقربش منه واجد مستعدة نصرف على روحي منه بدون مانثقل عليه ونصرف حتى على ولدي او بنتي لو كتبلي الله وحصلت بيبي وارتحت لما وافق
وجاء ثاني يوم مشى سراج وانس واحمد وبابا لمصر ونحن شارقين نوتو للعزومة اللي بتكون بعد بكرة في البداية نبوها بكرة لكن بابا قال انهم بيروحو وبيكونو بطالة من الطريق فقلنا لبعد بكرة مافرقتش وعدى الجو ونحن نوتو واماني فعلا شكل وحمها واعر زي ماما لان خواتي الاخرات طلعن زي خالتي ماتتوحمش عكس ماما اللي وحمها شين وسرحت بيني وبين روحي زعمك بنجربه الشعور هذا ونا جنين يكبر في بطني وهرموناتي تتغير ونجيبه ونحطه بين ايديا وبنرضعه وبنربيه احسن رباية يارب ماتحرمني من حلمي هذا يارب
وناقش سراج والحمدلله بتفوق لان الوحيد اللي في عيلتنا مخروم قراية اما كلنا دف تولع وننجحو بعد جهد جهيد وروح هو وبابا واحمد وانس بخير وسلامة وطبعا قعدو الشباب للعشاء وبعد ماروحو وكل واحد فيهم بيرتاح سراج اصر انه يحكي مع بابا وماما الليلة
ماما.. ان شاءالله خير يا سراج جامعنا بتحكي موضوع مهم لدرجة مش قادر حتى تصبر نين ترتاح
سراج .. نرتاح صح لما نقوله
بابا .. احكي
سراج .. نا نبي نتزوج
ماما بفرحة .. وهضا اليوم اللي نستنى فيه
بابا بمكر .. حاط وحدة في بالك والله امك وخواتك يدورولك
سراج .. لا حاط وحدة في بالي
ماما .. منو ان شاءالله
سراج بتوتر .. حنين
ماما بهدوء استغربناه .. حنين اخت احمد
سراج بصوت واطي لانه استغرب ردت فعل ماما .. اه
ماما .. ياطيب ما اخترت حد يكره بنية زي حنين تكون كنتها
نحن بصدمة .. شنو
ماما بضحكة .. كنكم
بابا .. ماهو غريبة مش بالعادة في عيالك كلهم عارضتي وجيتي عند حنين وافقتي
انا.. وبالذات ان وضع حنين المادي عكس حتى صبايا خوتي الاخرات ومعاها رباها خوها مش والديها
ماما .. اولا مايفيد في شئ اذا الولية عندها فلوس او لا كنهدا راه استفادو خوتك من فلوس صبايهم اللي ما واحد فيهم قرب شور قرش من فلوسهن وثانيا حنين نعرفها كويس عكس الاخرات ونعرفها كيف متربية وكيف ناشطة ومعاها تحب القرايا كيف سراج يعني مش حتعبه بالعكس حتفهم طموحه وتكون معاه في كل خطوة هذا اذا ماتمتش زيه وشنو فيها اذا رباها احمد ياريت خوتك كلهم واحد فيهم طلع زي احمد
انا وفرحت من جواي بكلامها على احمد .. به ليش اعترضتي على عادل رغم انه وضعه المادي مش ضعيف
ماما .. انا اعترضت خفت من الفارق التعليمي وخفت من قصة انه بتاع ورشة ويجي لاماني مشحم ومدهن وانتو عارفين كيف اماني تتجعون لكن في هالشهور هذين حسيت قديش اماني مرتاحة وكيف هو مدللها وعرفت وقتها اني غالطة وان حب اماني ليه كبير فوق كل شئ
بابا .. الحمدلله ما دهشتينا في جرتك زي كل مرة
ماما .. وبعدين نا نشوف لعيالي تو كيف مع صبايهم مرتاحين وهذا اللي يهم وشهادة لله مافيهن وحدة طلعت ماتنفع الحق
انا بفرحة .. مبارك يا سيجو الف مبارك ياخوي
بابا .. عاد الفرحة اثنين تو
سراج .. هذا وين بنعدي نرتاح لكن راه نبي نتزوج بسرعة هيا الاسبوع الجاي بتبدا امتحانات تبي اسبوعين بيش تكمل
انا .. بتكلم احمد انت
سراج .. لا نبي باتي يكلمه الحق نحس فيها تكبيرة ليه نا في الاخير رفيقه
بابا .. خلاص هذي شوري
سراج .. بنعدي نرقد تو ونا مرتاح البال
انا.. تصبح على خير حتى نا بنرقد ورانا بكرة عزومة
أنت تقرأ
نوفيلا.. سرطان اسعدني
Short Storyولان التشجيع على رواية السابقة كان مرتفع سوى هنا على الوتباد او على الفيس فوعدنا متابعاتنا الحلوات بهدية وكانت هديتنا تنزيل الرواية هذي مرة وحدة اتمنى ان تنال اعجابكم
