#سرطان_اسعدني
الفصل الثالث
روحت مع سراج ونا نحاول نبان عادية ولاقاني بابا بالاحضان وماما زيه طبعا بعد ماسمعت كلمات من ماما زي كل حادث انديره ونطلع منه سليمة لاني لو انصبت راه تبكي وتولول لكن بما اني كويسة ومافيا شئ نسمع الاسطونة المتعارف عليها
ماما.. ماهو كان فتحتي عيونك كويس راه مانخبطتش السيارة
بابا.. خلاص يا ايمان المهم ان بنتك كويسة
ماما .. والسيارة اللي انخبطت اكيد ضربتها قوية لدرجة خلت احمد يتصل بسراج
سراج بتنهيدة .. يا امي لاقوية ولا سو وطبيعي احمد بيكلمني شنو بيخليها عنده يعني
بابا.. خلاص يا سراج خشي يا بنتي تمددي وارتاحي
وخشيت دوشت بيش نرتاح مع ان الدوش في حالتي المفروض لا لكن ماغسلتش شعري وهذا هو الاهم ولبست وتمددت ورقدت ونا قاعدة نخمم في شنو بيصير وبعد شوي انتبهت لفوني جاته رسالة قريتها طلعت من احمد يوقض فيا على الموعد بتاع المصحة والسيارة انها تبي يومين
ومشن اليومين اللي قبل الموعد على نار لا وكال وتخميم وبس ومقضيتها دعاء ان ربي يهون عليا البلاء لو ربي كتب ليا فعلا اني نكون من المصابات بيه
وجت حتى السيارة مادورتهاش وخذيت اذن من المدرسة اليومين هذين تقريبا في داري مقضيتهن حتى بابا حاول ايطلعني ماقدرش واحسن حاجة حطو وضع نفسيتي بسبب غياب اماني عليا والحادث اللي صارلي وجاء اليوم الثالث بتاع موعد المصحة وطلعت وماحد دورني لانهم كلهم ارتاحو لطلعوي ولقيت احمد يستنى فيا قدام الباب درست سيارتي وخشيت معاه وقمعزنا على كراسي الانتظار وكأن الكلام بينا اختفى رغم اني كنت لما نلتقى بي احمد مستحيل نسكتو عشان ديمة فكرنا متقارب رغم انه اكبر مني بسبع سنوات ويعجب فيا واجد كيف اهتم بي اخته ومخلاهاش تكبر بين حياش عمامها ويا بخت سراج بيها لو تمت من نصيبه لان مش حيلقى كيف حنين في ربايتها لو لف عمره كله ونادو اسمي ونا كنت سارحة في افكار تاخذ وتجيب
احمد.. هبة هبة
انا بفجعة .. كنك شنو في
احمد.. اهدي اهدي ينادو في اسمك
انا.. معليش كنت سارحة
احمد .. ارمي حمولك على ربي وتوكلي عليه
انا بتنهيدة .. ونعم بالله بتخش معاي
احمد .. شوفي قبل الدكتور شنو يقول وبعدها كلميني كان عادي
انا وفهمت ان احمد مايبيش يحرجني لان مرات الدكتور يسئل اسئلة خاصة .. تمام نسئله ونكلمك كنهدا
احمد.. به وربي معاك
انا.. يارب
وخشيت عند الدكتور وطلعت ليه التحليل وماباش حتى يشوفه
د/ حسام .. تفضلي يا هبة شنو مشكلتك
انا بتوتر .. انا انا كنت
د/حسام .. اهدي وبشوي عليك مافيش حد يجري في جرتك
انا .. انا عاينت عند دكتورة نسائية
د/ حسام .. من شنو تشكي لما مشيتي ليها
انا.. وقت الدورة نشعر بوجع قوي ليا حوالي شهرين وغير ان الدورة تجيني شبه نزيف
د/ حسام .. والدكتورة شنو قالت ليك
انا .. دارت ليا صورة الترا ساون وطلبت مني التحاليل اللي قدامك وبعد ماشافتهن قالت في احتمال ان عندي سرطان رحم ولازم نشوف مختص واهو نا قدامك
د/ حسام .. رغم استغرابي كيف قدرت تخمن حاجة كيف هذي من تحليل وصورة الترا ساون لكن ياستي عدي اتجهزك ليا الدكتورة
انا باستغراب والتفتت للبنت اللي معاه .. دكتورة
د/ حسام بضحكة .. اه طبيبة امتياز
انا على نفس استغرابي .. بس ليش مش بالعادة ممرضة اللي مع الدكتور معليش على السؤال بس فضول
د/ حسام بحب واضح في عيونه .. ماهي زوجتي تكون و تجي ايام تقعد معاي لما الممرضة تكون اجازة وتستفيد مني بالمعلومات ومنها نقضو شوية وقت مع بعض بسبب اشغال كل واحد فينا
انا .. ربي يخليكم لبعض يارب
أنت تقرأ
نوفيلا.. سرطان اسعدني
Historia Cortaولان التشجيع على رواية السابقة كان مرتفع سوى هنا على الوتباد او على الفيس فوعدنا متابعاتنا الحلوات بهدية وكانت هديتنا تنزيل الرواية هذي مرة وحدة اتمنى ان تنال اعجابكم
