#سرطان_اسعدني
الفصل الرابع
نضت اليوم من الصبح بدري ورغم ان ماعنديش حصص اليوم الا اني مش قادر نرقد من بعد ماصليت الفجر ونا واعي لتو جهزت الفطور لحنين وفطرت معاها شوي ماعنديش نية الحق وطلعت اليوم مكلم صاحب المحل اني نمسك فترة الصبح وهو يمسك فترة العشية عشان اليوم بتطلع نتيجة صورة هبة وحجزت ليها للدكتور مرة وحدة بيش يقوللنا شنو اللي طلع عندها ويارب مايطلع عندها شئ وبعد وقت قضيته في المحل بعقل شارد معظم الوقت جاء الموعد مشيت للمصحة ومنها لقسم الاشعة وخذيت التقرير والصور وطلعت قدام المصحة نستنى في هبة وشوي وماعطلتش وواضح الذبول في وجهها قديش وجعتني وبعد السلام وليش تعبت روحي العتاب المعتاد
خشينا نستنو في دورنا وهالمرة بنخش معاها مش حنخليها بروحها ورغم انتظارنا اللي طول الا مافيش واحد فينا نطق كلمة لعند مانادو اسمها
هبة بخوف واضح .. بتخش معاي هالمرة صح
انا.. اكيد
وخشينا وسلمنا ع الدكتور وعطيته التقرير وقعد فترة وهو يشوف في الصور ويقرا في التقرير ونحن قلوبنا على نار
د/ حسام ..مش حنكذب عليك يا هبة
هبة .. اي حاجة مهما كانت يا دكتور قولها
صبيت احذاها وحطيت ايدي على كتفها كنوع من الاطمئنان انها مش بروحها
د/حسام .. بصراحة هو في كتل صغيرة بكل في عنق الرحم لكن للاسف بالزبط مانقدرش اناكد الكلام هذا اذا هنا ورم او لا
انا.. وبه كيف تتاكد يا دكتور انهن مثلا مايكونوش اكياس عادية او بكتريا مثلا
د/حسام .. هو من ناحية انهن احتمال اكياس عادية لا لانهن كانن بانن حتى من صورة الترا ساون لانهن بالاصل مايوصلش حجمهن لحجم كيس
هبة والدموع بدن ينزلن .. به يا دكتور كيف بنتاكد
انا ضغطت ايدي على كتف هبة .. اهدي هبة اهدي
د/حسام .. هو حاليا اقرب مكان ليك هو مصر يقدرو ياخذو عينة وياكدو لو ورم او لا وغير ذلك نحب انطمنك ان الدكتورة ورغم امكانيتها البسيطة الا انها شكت في حاجة فيك بدري يعتبر ولو طلع ورم يبقى اكتشفتيه في مراحله الاولى وماتخافيش منه
هبة .. والحمل دكتور نقدر نحمل ولو طلع عندي مش بيحولو الرحم
د/حسام .. لا مش قاعدة يا هبة لو مراحله الاولى يعني في بدايته ممكن جلسة وحدة بس علاج اشعاعي رغم قوتها لكن ماتقتلش في المبايض او تأثر على الحمل
انا.. بس يا دكتور مش العلاج الاشعاعي قوي بكل حتى ولو جلسة يبان تاثيرها على الجسم عكس الكيماوي مايبانش من كذا جلسة
د/حسام .. شكلك قاري كويس
انا ولا شعوريا .. حتى هيا هبة
د/حسام .. هو صح كلامك بس الاشعاعي اسرع كنتيجة بالذات للنساء اللي مفكرة في الحمل ام الكيماوي فليه تأثير على التبييض والاشعاعي رغم قوته الا انه مايسببش تساقط للشعر او ضعف الجسم بشكل واضح لان عادتا المريض يستحق لجلسة او اثنين مش اكثر
انا.. شكرا يا دكتور ونحن نشوفو ارواحنا ونبلغوك لو بنعدو مصر تعطينا وين نتابعو ووين انديرو العينة
د/حسام .. بس ماتنسوش ان اللي قلت عليه لازم في مدة ماتفوتش الستة شهور لان الورم هذا مرات يقعد ساكن ومايطورش وفجأة تلقاه كبر ووصل مراحله الاخيرة
هبة .. يعني في احتمال انه يرجع لو درت الجلسة الاشعاعية
د/حسام .. اه ممكن على حسب العوامل اللي يتعرض ليها جسمك
هبة .. يعني بيش نحمل كم نبي مدة
د/حسام .. لو قلنا انك بديري الجلسة الاشعاعية لو احتجتي لي وحدة ممكن بعدها بشهر لو انتي سليمة من ناحية الانجاب وزوجك يكون سليم ممكن يصير حمل بس نحن مانسبقوش الاحداث ونشوفو العينة قبل وشنو يصير
انا .. شكرا يا دكتور
أنت تقرأ
نوفيلا.. سرطان اسعدني
Short Storyولان التشجيع على رواية السابقة كان مرتفع سوى هنا على الوتباد او على الفيس فوعدنا متابعاتنا الحلوات بهدية وكانت هديتنا تنزيل الرواية هذي مرة وحدة اتمنى ان تنال اعجابكم
