#سرطان_اسعدني
الفصل السادس
اليومين اللي فاتن مشن عليا ونا مش قادر نوصف شعوري من الفرحة بالذات ونا كل مانصلي استخارة نحس في باب ينفتح في وجهي ومشن الايام اللي فاتن ونحن لاهين مع سراج ومناقشة الماستر واحلى خبر لما عمي خالد طلب ايد حنين لسراج قديش تمنيت تكون ليه زي ماقد ماتمنيت ان هبة تكون ليا وترحيب عمي خالد بطلبي ريحني بالذات انهم خبروني بموافقة هبة قبل حنين اللي حسيتها فرحت واجد ان سراج طلبها واعطيتهم الموافقة طبعا بعد ماشاورت عمامي اللي رحبو بنسب عيلة سراج وقعدو يجهزو للفرح ونا نوتي في الحاجات اللي ناقصاتني غير اني قايل لسراج الشاشة والغاز والغسالة شوري بنجهزن له والحمدلله ان هذين متوفرات عند خو صاحب المحل يعني ناخذهن منه بالتقسيط ونا واخذ غسالة جديدة للحوش فمش مستحق اني نشري غسالة والثلاجة والشاشة قالي عليهن سراج هذين بنحطهن فوق لان فوق مافيشي شئ وانس طلعت معاه اخترت دار النوم والحق ولد عمي ورفيقي ماقصر معاي في دار النوم لاني نبيها تركيب خلاني نختار كل حاجة كويسة ومعاها خذا فرشها كامل فراش السرير وفرشات الدار وورغان كبير وسمح ومخدتين طبيات وهذي الدار ارتحت منها وبما اني داير دار للملابس هذا ليش اخترت دار نوم تركيب يعني السرير زوجي بروحه وركبت ليه كمودينات قريبه لسرير في الديكور ومراية كبيرة عشان نحطها في دار الملابس لان فيها مكان لحط المسلتزمات والمكياج لو بتمكيج وخالاتي بمجرد ماسمعن فرحن وكل وحدة جابت مبلغ كويس هدية ليا ولحنين كثر خيرهن اما صبايا عمامي الحِن كله عندهن مرت عمي عبدالله خذتني للسوق وخلتني نشري دبش جديد ومن ضمنها بدلة الفرح وطلعت متفقة هي ومرت عمي احمد انها هيا تاخذلي دبشي ومرت عمي احمد تاخذ الدبش لحنين واستغليت انها معاي بيش تساعدني في الاختيار بالذات الذهب يفهمن فيه الصبايا خير من الرجالة وخذيت انسيال ذهب لهبة هدية الفرح وخذيت لحنين حديدة بخاتمها ذهب ونعتبر الحمدلله في ظرف عشرة ايام مجهز كل حاجة بالنسبة ليا وحنين مازال ليها شوي وتكمل كل شئ وسراج حتى هو ومعاه انس كل واحد شارق يوتي في روحه غير اللي مساعدهم شققهم اثاث بس ناقص ونا مكسد في المحل
انس .. السلام عليكم
انا.. وعليكم السلام
انس .. اللي واخذ عقلك
انا .. تتهنى بيه ان شاءالله
انس .. ربي مايحرمك منه
انا باستغراب .. شنو
انس .. الحب
انا .. امين يارب والله لتو مازالت ماني مصدق
انس .. صدق صدق كلها ايام وتبقى ليك ... تعال بنقولك حاجة
انا.. ان شاءالله خير
انس .. شوف من لما خطبت رحمة ونا فيا حاجة متغيرة احساس حلو مش عارف كيف نوصفه بمجرد مانشوف رقمها على فوني نبتسم لاشعوريا
انا بضحكة .. الله لا يحرمك منه
انس باستغراب .. شنو
انا بضحكة اكبر .. الحب
انس .. ترد فيها ليا
انا.. لا والله بس فرحان ليك يا رفيقي ورحمة ماشاءالله عليها بنيت عمنا ومنا وفينا
انس .. فعلا ورغم اني ما اختارتهاش على حب بس نحس في روحي ديمة شعوري شورها مش زي حنين وهناء بكل وهذا ليش لما قررت نتزوج معاكم كانت هيا اللي في فكري مافيش غيرها
انا .. به وليلى
انس.. ليلى عدت على حالها لما فضلت اللي ماديته احسن مني ويوفر ليها كل اللي تبيه
انا.. ان شاءالله ربي يعوضك خير ببنت عمك يارب
انس .. امين يارب
انا.. هيا نمشو للمحل عشان تاخذ الغاز والثلاجة اللي تبيهن والشاشة والله لدنك واخذها ومافيش كلمة نسمعها فاهم
انس بتنهيدة .. والله فاهم يا احمد لكن نا عارف وضعك
انا.. بيش نطمنك نا بنخلص حقهن بشوي ماتخافش مافيش ضغط عليا لا هديتك ولاهدية سراج
انس .. به قولي كلمت سماح
انا .. اه
انس .. وشنو صار وشنو قلت ليها
انا.. قلت ليها الحق عشان مانظلمهاش
انس .. شنو قلت ليها
انا.. قلت ليها ان حبي الاول اللي كان من طرف واحد اللي كان حلم بالنسبة ليا واني قديش طلبت منها انها تحاول تنسيني ليه لكن ماقدرتش انه جدت ظروف وخلت حلمي يصبح حقيقة واني بنتزوجها وقريب بكل
انس .. شنو كان ردت فعلها
انا بتنهيدة .. هذا اللي محيرني انها تمنت ليا السعادة تصدق
انس باستغراب .. مستحيل تي هيا بس لما كنت تقول ليها يا بنت الناس ننفصلو نا مقدرتش نحبك تقعد تبكي وادير في حالة وتتصل بيا عشان نحاول نقنعك ماتنهيش اللي بينكم ونا نفوت نين تتصل ونعرف انها في المستشفى ونجي ونقولك وترد اللي بينكم مرعاة لمشاعرها وتو تقوللها بتتزوج وتقعد هادية ومعاها تمنت ليك السعادة مش تحتار بس تي حتى تخاف منها الحق
انا.. وهذا اللي مخوفني انها ادير حاجة لهبة
انس .. مش هبة تعرف بيها
انا.. مانبيهاش ادير حاجة تخلي هبة تعرف انها حبي الوحيد نبي هبة تعرف بالتدريج حبي ليها بيش تقدر تستوعبه وتحبني زي مانحبها
انس .. يستر الله وخلاص
أنت تقرأ
نوفيلا.. سرطان اسعدني
Historia Cortaولان التشجيع على رواية السابقة كان مرتفع سوى هنا على الوتباد او على الفيس فوعدنا متابعاتنا الحلوات بهدية وكانت هديتنا تنزيل الرواية هذي مرة وحدة اتمنى ان تنال اعجابكم
