نوفيلا.. سرطان اسعدني

الفصل الثاني

#سرطان_اسعدني

الفصل الثاني

زي روتين كل يوم انوض الصبح انوتي الفطور مابين حنين ماجهزت روحها نفطر نا وياها ونقرو شوي من القرآن قبل مانطلعو نوصلها لجامعتها ونمشي لمدرستي نعطي الحصص بتاعاتي اذا الحصص عندي الاولات نرد للحوش نحط الغذاء ع النار واذا لا حنين تروح تحط الغذاء نتغذو مع بعض اذا عندها محاضرات بدري واذا بتتأخر ندير سندوتش اي حاجة مانقدرش ناكل بلاها او حتى ناكل بروحي  واذا هيا عندها موخر ونا حصص موخر انديرو سندوتشات وخلاص وانطيبو في العشاء وبعدها نمشي للمحل اللي نشتغل فيه بعد الظهر محل مستلزمات منزلية عوايز وكهربائيات محل كبير وزباينه واجد ويطلع ليا منه مرتب كويس اللي بيه قدرت كل مرة نصين في حوشنا حاجة لعند كملته حوش باتي وامي الله يرحمهم ماتو في جرت بعض امي ماتت وعمر حنين ستة سنوات  وبعدها بسنتين الا شوي مات باتي الله يرحمه وقعدت نا نربي في حنين ومهتم بيها والله يسامحها خيتي كبرت قبل وقتها وديمة تحاول على قد ماتقدر انها تخفف عليا حمل كنت لما نروح من مدرستي وهيا قبلي تروح نلقاها ضامة الحوش ولما يجونا خالاتي الوقت اللي يلقو روحاهن فيه فاضيات وماحد يلومهن حتى هنا عندهن عيلة يهتمو بيها كانت تركز عليهم حنين لما يطيبو وتعلمت تتطيب الرز وهيا عمرها عشر سنوات وتعلمت المكرونة وطبيخة الفاصوليا عشان تقدر اطيبهن لنا لما مايكون حد معانا ورغم ان ماعندناش عمات الا صبايا عمي الاثنين كل وحدة فيهن كانت تجي تقعد معانا يومين  والله ثلاث ايام يضمن الحوش واللي تجي اطيب لينا وجبات حنين ماتقدرش عليهن لكن في الوقت هذا كنت نا نصبي معاهن بيش نتعلم التطييب لان مهما كان مش حنقعدو عابين عليهن عمرنا كله وربي عاطيهن من الحِن يكفي بلاد بحالها لدرجة لما يديرن وجبة زي العصبان او المحشي لازم يبعتو حصتنا واذا عزومة دايرات لازم يكلمونا ولو ماجيناش يبعتولنا حصتنا الحق هنا احن علينا من خالاتي
مانيش ملتزم لكن على قد مانقدر نحاول انكون قريب لربي ومانخليش الدنيا تاخذني واجد محافظ على صلاتي ولله الحمد حتى الفجر في الجامع ونقرا ديمة في المصحف ماتيسر منه وواعد ربي باذن الله تعالى نطمن بس على حنين اني بنخش خلوة نحفظ القرآن 

انا احمد عطية عمري 29 سنة شكلي عادي طويل مهتم بروحي جسمي حلو ولبسي على قد امكانياتي لكن حلو يعني لبيس نعتبر عندي استايل واحد مانغيرش فيه ونعرفت بيه سروال جينز وقميص وجاكيت في الشتاء والصيف سروال جينز وتيشرت ولو في مناسبة فوق منه جاكيت خفيف شعرتي سودا سواد الليل وعادية مش ناعمة ولا حرشة وطبعا محلق زي الموضة تو واندير فيها بالجل ع الجنب وشعر خفيف من الجناب وداير لحية بسيطة بشرتي قمحية وعيوني كبار واسعات قهويات  وعندي صاحبين تقول خوتي سراج خالد وولد عمي احمد خو باتي انس اللي باتي مسميني على باته من كثر ماكان يحب خوه هذوم هم رفاقتي وهذي هيا حياتي
تقدرو تعتبروني مرتبط ومش مرتبط نعرف بنت اسمها سماح علاقتي بيها اتصالات اكثر حاجة وواضح معاها في كل شئ ضروفي ووضعي  وقلت ليها ان في بنت في قلبي لكن بسبب الفارق المادي بينا ماقدرتش انتقدم ليها وطلبت منها تنسيني حبيبتي لان اصعب حب من طرف واحد وللاسف سماح تحسها سطحية ومخليتني طول الوقت حاط مقارنة بينها وبين حبيبتي وبدل ماتنسيني ليها خلتني نزيد نتعلق بيها ونا ندعي لربي ان يجمعني بيها 
تو تستغربو طالما نا هكي ليش درت علاقة مع سماح تو تعرفو لقدام على رنة فوني لقيته انس