#سرطان_اسعدني
الفصل التاسع
انا.. آسفة اني ممكن نموت واني بنخلي ليك مسؤلية عيالي
احمد.. اس معاش تكملي (ولفني شوره وعيونه في عيوني ) انتي حتجيبيهم وحتربيهم وتكبريهم اخرى معاش تقولي هكي
انا وحطيت ايديا على وجه .. الموت علينا حق يا احمد ومرات السرطان ينمو اكثر وياخذ روحي ماحد يعلم
احمد حط ايديه فوق ايديا .. معاش تكملي عشان خاطري
انا ودمعة خانتني .. عشان خاطري نا لازم تكون مستعد لكل شئ لازم تخلينا انسقو حياتنا سوى عشت او متت
احمد مسح دمعتي .. به اللي تبيه حاضر بس خليها شوي على الاقل يقرب موعد ولادتك
انا.. به
وقعدنا شوي اخرى عل البحر نين غربت الشمس بكل وخذينا عشاء من برا وردينا للحوش وبعد العشاء كسدنا وجاء انس ورحمة وحنين وسراج وفرحو واجد بخبر التوأم وقرقزو واجد علينا واننا بنكبرو عيلتنا بسرعة واننا مستعجلين وهما مايعرفوش ان في احتمال كبير انه يكون اول و اخر حمل ليا وعدى الجو حلو
احمد
مشن ايام وشهور على حمل هبة وزاد معاهن تعبها وتتعب واجد تمت لدرجة ان لا فرح نورهان قدرت تحضره ولا جياب اختها يا دوب قدرت تمشيلها في الحوش وما طولتش كثر دواخ راسها وكثر ترجيعها عكس الاول ولما خشت للسادس الوجع زاد عليها لانها تشعر بالالم اسفل بطنها وهذا خوفني عليها بالزايد ولما مشينا للدكتورة
الدكتورة .. يبدو ان الورم بتغير هرمونات المدام خذا وضع دفاعي على روحه وبدا يزيد وهذا ليش المدام وجعها يزيد
احمد بخوف .. وبه والحل يا دكتورة
الدكتورة .. لازم من استشارة الدكتور حسام دقيقة نتصل بيه
واتصلت الدكتورة بالدكتور حسام وبعد وقت جانا وكشف مع الدكتورة على هبة مرة اخرى لان جاب جهاز ثاني معاه وهبة بتموت من الوجع وانا مازالت على خوفي عليها
احمد.. ها يا دكتور طمنا
د/حسام .. الصراحة كلام الدكتورة مزبوط وهذا ليش الالم واعر عليها ومش قادرة تتحمله
احمد.. والحل
د/حسام .. انه تولد او
انا بعيطة .. مستحيل انزلهم
احمد مسك ايديا .. اهدي يا قلبي شوي بس (والتفت للحسام ) او شنو
د/حسام .. او انها تكمل الشهر هضا هنا تحت الرعاية تحسبا لاي طارئ
احمد.. تمام يا دكتور اي حل يكون في صالح هبة نا معاكم فيه بس لازم انا اللي بنكون مرافق ليها
الدكتورة .. مش مشكلة اصلا لانها تبي رعاية خاصة حنخصصو ليها حجرة بروحها
انا .. بس يا دكتورة ممكن لاسرتنا انكم تقولو وجود الزوج ضروري ليا لان اكيد ماما وخواتي وحتى اخته حيعترضو على قعاد احمد معاي كمرافق ونحن مانبوش يعلمو بلي نمر بيه
الدكتورة .. تمام مافيش مشكلة
احمد.. وحنقولو سبب الدخول عشان التوأم حجمهم كبير ومسبب تعب لهبة
د/حسام .. يبقى متفقين نخليكم بيش نوقضهم يجهزو الحجرة للرعاية وانت تقدر تاخذها تجهز دبشها وتجي
احمد.. شكرا يا دكتور ودكتورة على مساعدتكم لينا وتفهمك لوضعنا
د/حسام .. ما درنا غير الواجب وان شاءالله المدام تكون بخير هيا وبيبهاتها
انا واحمد .. ان شاءالله
أنت تقرأ
نوفيلا.. سرطان اسعدني
Nouvellesولان التشجيع على رواية السابقة كان مرتفع سوى هنا على الوتباد او على الفيس فوعدنا متابعاتنا الحلوات بهدية وكانت هديتنا تنزيل الرواية هذي مرة وحدة اتمنى ان تنال اعجابكم
