رواية لحظات مؤلمة
البارت العاشر
للكاتب المصري محمد مالك
جميع الحقوق محفوظة
وفي اليوم تأتي ام شيرين واخواتها الثلاث نورا وبوسي ومرفت لزيارتها ومباركة زواجها وتلاحظ الام ان ابنتها ليست علي ما يرام
الام .. مالك يا شيرين لونك مخطوف ليه كدا ووشك بهتان ؟؟!! هو انتي تعبانه ولا أيه ؟!!
شيرين .. لا يا ماما انا كويسة زي الفل
الام .. لا حساكي مش مبسوطة !! هو انت زعلانه مع اكرامي ولا حاجة ؟!!
نورا .. زعلانه ايه بس يا ماما !! هما لحقوا يتجوزوا عشان يزعلوا ؟!! باين كدا ان اليومين اللي فاتوا دول بنتك كانت بتتشاقي حبتين !!
شيرين .. بنت !! بطلي قلة ادب
نورا.. ايه .. هو انا قلت حاجة غلط ما هو الجواز ايه غير شقاوة وكدا !! عقبالنا يارب لما نتشاقي زيك
شيرين .. بصي البنت !!
بوسي .. بس يا نورا بطلي غلاسة لو سمحتي .. عاملة ايه يا شيرين ؟؟ مبسوطة مع اكرامي ؟
شيرين .. اهوه .. الحمد لله علي كل حال
مرفت .. لا ردك دا ميطمنش !! ولا أيه يا جماعة ؟!!
الام .. مالك يا بنتي في ايه قلقتيني
شيرين .. مش عرفة يا ماما .. حاسة ان البيت دا مسكون !!
الام .. مسكون ؟!! اعوذ بالله من الشيطان الرجيم.. ليه بتقولي كدا يا بنتي ؟!!
شيرين .. مش عرفة !! في حاجات غريبة بتحصل هنا انا مش لاقيالها تفسير !!
الام .. حاجات زي ايه يعني ؟!!
شيرين .. اشباح بتطلع في العتمه وحاجات بتتكسر ودم بينزل من الحنفيات وحاجات بتموت وترجع تصحي تاني !!
الام .. يا ساتر يارب !! ايه الكلام دا يا بنتي ؟!
نورا .. انتي عاوزة تخوفينا عشان منجلكيش تاني ولا أيه ؟!!
بوسي .. اسكتي يا نورا مش وقت غلاستك خالص ! انتي بتتكلمي جد يا شيرين ؟!! الكلام دا حصل فعلا ؟!!
شيرين .. والله ما انا عرفة اذا كان حصل فعلا ولا انا بيتهيألي ولا ايه الحكاية بالظبط ؟!
الام .. واكرامي عارف بالحاجات دي ؟!!
شيرين .. حكيتله طبعا .. بس هو مش مصدق وبيقلي تهيآت !!
الام .. وانتي التهيآت هتجيلك منين يعني ؟! لا كدا الحكاية فيها ان وممكن يكون البيت مسكون فعلا !! انا بصراحة اول ما دخلت هنا قلبي اتقبض يا بنتي !!
مرفت .. مسكون ايه بس يا ماما بلاش تخوفيها من فضلك ..
الام .. اما بتقلك بتشوف اشباح ودم من الحنفيات !! يا ساتر يارب ربنا يجعل كلامنا خفيف عليهم
مرفت .. انتي بس ولعي بخور وقرآن علطول في الشقة .. جايز يكونوا عمار المكان بس .. عشان الشقة مقفولة ليها سنه بعد وفاة مرات اكرامي الاولانيه .. هو قال ان بعد ما ماتت مراته قفل الشقة لأنه مكتش طايق يقعد فيها
شيرين .. تصدقوا اني لما جبت سيرتها وسألته عنها لقيته عرق جامد وجسمه تلج وقعد يتنفض!!
الام .. وليه دا كله ؟!!
شيرين .. مش عرفة !!
نورا .. مفيش غيره المنيل علي عينه اللي اسمه الحب .. واضح انه كان بيحبها قوي وغرقان لشوشته معاها !!
بوسي .. اول جمله تطلع من بقك عدله من ساعة ما جينا !! فعلا ممكن يكون كان بيحبها قوي ومتلعق بيها
شيرين .. جايز .. بس كله كوم وهيثم اخوه كوم تاني خالص !!
الام .. وماله دا كمان ؟!!
شيرين .. صحيت يوم الصباحية لقيته في قلب الاوضة !!
مرفت .. اوضة ايه ؟!! تقصدي اوضة النوم ؟!!
شيرين .. ايوا
الام .. يخيبه البعيد !! وكان في اوضتكم بيعمل ايه المنيل دا ؟!
شيرين .. قال بيدور علي مفتاح المحل اللي تحت .. بس انا خربت الدنيا وزعقت مع اكرامي وقلتله دا ميصحش وانه مالوش حق يدخل شقتي بدون استئذان وطلبت من اكرامي يغير كالون الباب وفعلا غيره
الام .. ايه الاستهبال دا !! ازاي يدخل اوضة نومكم بكل وقاحة كدا وانتوا نايمين ؟!!
شيرين .. لا وحصل موقف تاني غريب جدا !! انا كنت قاعدة اول امبارح في الاوضة هنا وسمعت حاجات غريبة بتحصل بره فرحت اشوف ايه الحكاية فاتهيألي ان هيثم قاعد هنا مطرحك فزعقت معاه وقلتله انت دخلت هنا ازاي وشتمته فراح شاتمني وضربني بالقلم علي وشي وبعدها النور قطع وزي مايكون كان بيتخانق مع حد وحاجات الشقة كانت بتتكسر وتتدشدش !! بعد كدا النور جه ملقتوش !! بس لقيت فعلا الفازات والبراويز متكسره !!.. اكرامي كان تحت عند امه ولما طلع وحكيتله علي اللي حصل قالي تهيآت
الام .. تهيآت ازاي وانتي بتقولي الفازات والبراويز اتكسرت ؟!!
شيرين .. لا ما هي طلعت سليمة !!
الام .. ايه ؟!!
شيربن .. ايوا .. والعجيب ان هيثم اصلا مش في القاهره .. دا في بورسعيد بيجيب بضاعة وهيجي بعد يومين !!
مرفت .. بس انا متهيئلي لمحته واقف في المحل تحت !!
شيربن .. مش معقول !اكرامي قالي انه مسافر وهيجي بعد يومين !! انتي متأكده انك شفتيه ؟!!
الام .. انا كمان شفته واحنا داخلين البيت .. قاعد زي القرد حتي فضل يبصلي كدا بطريقة مريحتنيش !! الواد دا باين عليه خبيث ومش ساهل !!
شيرين .. بس اكرامي قالي انه مسافر !! ممكن يكون رجع من السفر
الام .. قليلي يا شيرين .. انتي شفتي امه ؟!!
شيرين .. لا ما طلعتش عندي لسة .. بس لما سألت اكرامي قالي ان عندها كانسر وحالتها وحشة اوي وان هي بعيد عن السامعين في ايامها الاخيرة
الام .. اها .. عشان كدا مجتش معاه لما جه يطلب ايدك !!
شيرين .. ربنا يشفيها
وفجأة يُسمع صوت فرخة تكاكي
نورا تضحك بسخرية .. ايه دا ؟!! هو انتوا مربين فراخ في الشقة ولا أيه ؟!!
شيرين .. لا دي فرخة متعلقة من رجليها في المطبخ !!
الام .. نعم !! وايه اللي معلقها من رجليها ان شاء الله !! عليها ذنب ولا أيه ؟!!
شيرين . اهي الفرخة دي حكايتها حكاية !!لما شفتها اول مرة كانت متعلقة بنفس الطريقة صعبت عليا فقمت فكتها فراحت ماتت علطول !! وتاني يوم لقيتها رجعت اتعلقت تاني بنفس الطريقة !!
الام .. ايه الكلام الغريب اللي انا بسمعه دا من ساعة ما جيت ؟! اكمنك لونك مخطوف وباين عليكي الهم والحزن !! تصدقي يا بنتي لما جابوا ابوكي اول مره البيت عشان يخطبك انا ما ارتحتلوش !!
شيرين .. قصدك اكرامي ؟!
الام .. ايوا بسلامته اكرامي
شيرين .. بس اكرامي انسان طيب جدا
الام .. وهو فين بسلامته !! مش باين من ساعة ما جينا !!
شيرين .. عند مامته تحت بيشوف طلباتها
الام .. اها .. باين عليه واد امه !!
وفجأة تشعر نورا بأختناق شديد ويزرق وجهها!!
تابعوني والبارت التالي بعد قليل .. تحياتي ..
#محمد_مالك
أنت تقرأ
لحظات مؤلمه للكاتب محمد مالك
Literatura Femininaانا شيرين البستاني ٢٦ سنه صيدلانيه من اسرة متوسطة الحال .. بابا علي المعاش كان شغال في السكة الحديد وماما ست بيت عندي ٣ اخوات بنات انا اكبرهم .. اتجوزت من ست شهور صيدلي زميلي بس ما اتوفقناش مع بعض واتفقنا ننفصل بكل هدوء وبدون مشاكل وفعلا انفصلت بعد...
