لحظات مؤلمه للكاتب محمد مالك

البارت (١٤)

رواية لحظات مؤلمة 

البارت الرابع عشر

للكاتب المصري محمد مالك

جميع الحقوق محفوظة
ويذهب هيثم مع الضابط هشام الي قسم الشرطة
هشام .. تشرب ايه يا هيثم ؟!!
هيثم .. مالوش لزوم يا سعت الباشا
هشام .. لا ازاي ؟!!
هيثم .. طب لو مفهاش رزالة سعتك يبقي قهوة سادة .. عشان انا بصراحة حزين جدا علي فراق المرحومة ( يتأثر بشدة وتدمع عيناه عند تلك الجملة )
هشام .. قلتلي بقي انك تعرف المرحومة وكنت بتتكلموا وتتقابلوا وكدا ؟!!
هيثم .. ما انا سمعتك سعتك التسجيل !!
هشام .. تمام .. طب قلي يا هيثم هو انت اتعرفت علي المرحومة ازاي ؟!!
هيثم .  في خطوبة اخويا اكرامي سعتك .. شفتها في الخطوبه فأستلطفتني واستلطفتها وزي ما بيقولوا سعتك نظره ف ابتسامه ف لقاء ف حب وكدا يعني
هشام .. انتوا كنتوا متفقين علي الجواز ؟!!
هيثم .. تمام سعتك حصل
هشام .. هو انت بتشتغل ايه يا هيثم ؟
هيثم .. انا  فاتح محل ملابس اطفال تحت بيتنا سعتك
هشام .. انت خريج ايه ؟
هيثم .. انا خريج علوم سعتك .. ميغركش منظري واسلوبي وكدا !! انا بس عشان بقيت في السوق فشربت نظامه وكدا  .. بس انا تعليم عالي يا باشا
هشام .. انت تعرف ان شيرين مرات اخوك حكيتلي كلام تاني خالص غير دا ؟!!
هيثم . . يا باشا شيرين دي عدم لامؤاخذه مهووسه بيتهيئلها حاجات بتحصل مش حقيقية خالص  !! انا راضي ذمتك سعتك انت صدقتها في اللي قالتهولك  ؟!!
هشام .. للأسف كلامها غير منطقي بالمره دي حسستتني انها عايشة في بيت اشباح !!
هيثم .. شفت بقي سيادتك !! دي باين عليها هي واخواتها عندهم امراض نفسية !! ربنا بحفظنا يا باشا
هشام .. طب انت كنت عارف ان عندها اكتئاب .. ليه كنت عاوز تربط مصيرك بمصير واحدة بتفكر بشكل جدي في الانتحار ؟!!
هيثم .. انا في الاول مكنتش اعرف سعتك .. بس بعد كدا هي صارحتني بالحكاية دي .. انا ساعتها احترت اسيبها ولا اواسيها .. فقررت اني ما اتخلاش عنها وخصوصا زي ما سيادتك عارف ان المريض النفسي بيحتاج دعم دايما من الناس اللي حواليه وخصوصا اللي قريبين منه وبيحبهم ودا جزء من العلاج بتاعة وبصراحة انا ابن بلد واعرف الشهامه والجدعنه وبعدين انا كنت ميال ليها بصراحة ..
هشام .. تمام .. تمام
ونذهب الي عائلة البستاني والتي تعيش الان اصعب لحظات حياتها الاب لا يصدق ما حدث
مرفت .. دا انسان كداب ونصاب .. دا مش عاوز يجيب لأهله مصيبة فأخترع قصة الانتحار دي
احمد البستاني والد شيرين .. انا كل اللي عاوز اعرفة دلوقتي .. المكالمات والفيديوهات والصور اللي عند الولد دا اللي اسمه هيثم ل نورا ولا لا ؟!!
مرفت وبوسي وامهما ينظران لبعضهاولا يجيبوا علي السؤال
احمد متعجب .. ايه سكتوا ليه ؟!! ما تجاوبوني علي سؤالي !!
بوسي .. هو يا بابا الصوت مقارب لصوتها والصور تشبهها هي والفيديوهات!!
احمد .. يعني هي ؟!!
الام .. لا مش هي .. انا بنتي متعملش كدا ؟!!
احمد .. واللي اسمه هيثم دا جاب التسجيلات والفيديوهات والصور دي منين ؟!!
مرفت .. الفوتوشوب مخلاش يا بابا !!
احمد .. وايه اللي هيخليه يعمل كدا ؟!!
مرفت .. ما انا قلتلك يا بابا انه عاوز يبعد عن اهله وعن بيتهم حكاية ان البيت مسكون وكدا وان في جني هو اللي زق نورا ورماها من البالكون !!
احمد .. كلام فاضي وحجج خايبة بتداروا بيها علي فضيحة اختكم !! مكنتش اتوقع ان بنت من بناتي تكون كدا ؟!!
مرفت .. صدقني يا بابا نورا عمرها ما تعمل حاجة زي دي ابدا .. وانها عمرها ما شافت اللي اسمه هيثم دا ولا تعرفة !! والايام هتثبتلك ان بنتك مظلومة وان الجماعة دول وراهم سر كبير
احمد .. اما نشوف !!
ثم ينصرف والام والبنات في غاية الحزن .. الام تمسك صورة لابنتها نورا ثم تبكي بحرقة شديدة وهي تقول ( هتوحشيني يا بنتي ) .. مرفت تضمها الي صدرها وهي ايضا تبكي وتقول ( هتوحشنا كلنا يا ماما .. ادعيلها ) ثم تقبلها في رأسها ..
تابعوني والبارت التالي ومواجهه ساخنه بين اكرامي وشيرين ..تحياتي ..