اصيل وقف ومشي خطوات لين وصل قدامها قعد لحظات يشوفلها لين فاق على صوتها شبه عالي
رنيم بدموع:انت نكلم فيك
اصيل:اسمي اصيل
رنيم:نبي خويا
اصيل شد شعرها اللي دايراته زوز ضفيرات:ومن هوا خوك
رنيم بعدت:مراد يشتغل جديد
اصيل:ماعندناش حد بالاسم هدا
رنيم:كذاب بابا ورالي الشركه هدي وقلي بنخدم فاها
اصيل:هوا بوك ولا خوك فهميني
رنيم اذكرت كلام البنت وزادت تبكي:انتم علاش هكا كلكم تتهزو عليا مش اول وحدا يموتو اهلها اني وطلعت تجري
اصيل قعد يشوف لمكانها لين حس بحد دفه
عماد:وين سرحان
اصيل:منو هدي الطفله
عمااد:اخت مراد اللي من طرف عمي مصطفى
اصيل:اها قطعه الفرخه
عماد:شن قطع بيها دايرتلي ضفرة زي الرسوم المتحركه
اصيل شافله عالجنب ورجع يخدم في اوراق قدامه
قدت رنيم تتمشى لين وصلت للحوش شافت مراد يدور وواضح عليه الخوف
رنيم:بابا
مراد جاها يجري حضنها:ياروحه وين كنتي بكري ندور عليك علاش طلعتي من المدرسة
رنيم خافت انه يهزبها:انا جعانه
مراد:تعالي دخلها ودارلها تاكل وبعدها شدها من ايدها وقعمزها جنبه بتحكيلي شن صاير ولا
رنيم بدت تبكي:بابا علاش كلهم يتهزو عليا اني يتيمه
مراد حضنها:معاش تقولي يتيمه انا امك وبوك
رنيم:بس هما ضحكو على خاطر نقولك بابا
مراد:ماتعدليش على حد كيف تبي انتي ناديني بهي بنتي الحلوة
رنيم هزت راسها ودفنت راسها في حضن خوها المكان اللي ترتاح فيه كل ماتضايق"وكأن هموم الحياة تنزاح من على قلبي حين يحتويني أخي بحضنه الحصن المنيع 💓💓"
مراد سرح ورجعت بيه ذاكرته لقبل سنين......يتبع
تفاعلو نزل حلقه تانيه
أنت تقرأ
فرحة قلبي 💙
Lãng mạn#الاخ هو السند والظهر اللي نوقفو وراه ومانخافوش هوا النعمه اللي نقعدو طول عمرنا نحمدو ربي عليها 😍 هوا الضلع اللي مستحيل يميل 😊 والظل اللي مايتخلاش في الظلام أوقات يكون هوا الام وهوا الاب والصديق والقريب يحتويك ويكون كل عالمك 💜💜💓 كيف ولد في سن...
