اياك تجني سكرا من حنظل☠
فالشي يرجع بالمذاق لاصله🍯
في الجو مكتوب على صحف الهوى❤
من يعمل المعروف يجزى بمثله🌺🌺
........
اشراق :
سنه ونص مرت على نهاية كل شي حلو بيه ....متت بيوم اللي راحوا الاحباب ...احس روحي غادرتني من يوم طلعت من منطقتنا واخذوا احمد من بين ايديه ....واني مكمشه بي ..انتزعوا قلبي واخذوه من مكانه بقسوة ...
الموقف صعب اسال الله ان ما يحط احد بي والشرح اصعب ...بقيت بامل ها هسه يجي هاا جذب ما مات ...ها ولده وها اني واحمد ما رد ولا اجا ...
كعدتي عالطريق انتظره وصياح حامد عليه والذل اللي شفته من نسرين ...خلوني اعرف وين صرت ..وعرفت احمد ما منه رجعه وعرفته صدك مات ...اهلي ماتوا صح وهم قهرتهم جبيرة بس احمد اخذ قسم من عمري وراح ...١٣ سنه من عمري تقريبا النصف منه كان لاحمد ..تزوجته بعمر ١٦ وقبل وصولي الثلاثين تركني ...
وكفت وتعهدت الباقي من عمري لاطفالي بطلت البجي لان ما راد ميت قبل ولا حيرده الي بس القهر وانعدام الصحه وماكو فايده منه ...هافال وعمر وشروق عندي ثلاث اطفال ...اولادي اشوف باجر بيهم واشوف حياتي الجايه بعيونهم شلت جناحي وضميتهم من هالدنيا وتعهدت اكبرهم شلون ما تصير الدنيا ...
سنه مرت والشغل صعب ...كنت اقتل كل وقت وكل طاقه عندي بس حتى انسى نفسي بي ..كانوا يشوفوها ندارة وسباعيه واني اشوفها قتل للعمر الباقي منا لحد ما يكبرون اولادي ويشيلوني بس دائما اللي نخطط اله ما يجي مثل ما نريد وصار الكلام غير......
اليوم حنة بشرى وحمواتي كلهن اجن رغم بعدهن عنا بالسكن ..بعد التهجير كل وحده صارت تحت نجم ...اجني وكلهن محملات لجهالي ملابس واكثرهن لشروق ...ازواجهن زينه حالتهم فذكروهم للجهال ...شروق لبستها بدله حمره جايبتها عمتها ميسم الها موديلها حلو وهافال وعمر لبستهم دشاديش جدتهم اشترتهم الهم ...
حامد لما شاف شروق ما تركها الا طبعت اسنانه بزندها ولحيته تركت اثارها بخدود الطفلة ..يحبها لدرجة الجنون وهو اصلا يحب البنات اكثر من الاولاد
اني كرديه بس اطفالي عرب وجداتهم تركمان خليط بميزة ..الوجه ابيض بشقار طالعين عليه وعدهم نمش كثيف طالعين لجدتهم ام ابوهم ...وشعرهم بني فاتح حلوين وشروق نسختي المصغره ...بيضه بوجه دائري ووجنات عاليه وشعرها بي شقار كثيف وسرح ..ملامح كرديه تامه ...
بهذاك اليوم بشرى لبست فستان بينصل لونه زيتوني قصير مشغول بفصوص صغار بشكل نقشة ريش طاووس جاي من جوه ويصعد نهاياته يم الصدر قرنصات بشكل نهايات الريش ..كان بدون اكمام وبدون تعلاكه وجسمها مكشوف ...الفستان اختار عمتها وهديتها...اخوات العريس بقوا يصورون بيها وكلهن يراسلن بي ...
