بشرى:
كعدت ولكيت بحضني ابني ...شكد جان شكله حلو ...ابيض ودبدوب وجبير ما يشبهني ابد مبين شكله ولد ..امي وجدته ام ياسر واكفات فوك راسي وفرحانات بينا ...اتلمس بخده ناعم يخبل ..
ما كدرت اطول بكعدتي ولا اباوع اله هواي لان الالم ما ينحمل عبالك احشائي احسها طالعه لبره ..تمددت وضربوني مهدئات ورجعت نمت وره ساعه صحيت لكيت بس ياسر وامي وعمتي ماكو ..بطني موتتني وهذا ما اكدر اطلب منه شي ونيت وكتمت الالم....اجا وكف يمي
-بشرى عيني محتاجه شي اسويلج شي ..
فتحت عيوني ولا اراديا غوركت بالدمع
- اريد امي همست بصعوبه
-هسه يرجعن اخذن سيف يكملون اجراءات البيان والخروج يم الطبيبه
-حنطلع
-اي فد شويه
-بجيت وجاوبته ...ما اكدر اطلع حموت بطني وبجيت بوجع
-عيني هسه بس يجون اروح اصيح ممرضه تنطيج مسكن وهناك بالبيت احسن صدكيني
-وين ؟؟
-بيتنا
-اريد يم اهلي
-يا عيني شنو الفرق اصلا امج ما اخليها تعوفج لما تصيرين زينه واهلج بعيدين عن الممركز يصير شي هاي احنا اقرب للمدينه
ما جاوبت سكتت وحاولت اتحمل ودي اعيط بكل قوتي ..معقولة كل الللي يولدون عملية هيج لو اني حتى بهاي ما اطابق البشر
فاتت امي وعمتي وجلبت بيهن ابجي واشكي الهن المي ..راحوا جابوا ممرضه ضربتني ابرتين مسكنات وراحت ...شويه هديت وسكتت ياسر ما ترك الغرفه ابد
ساعات وطلعنا لان هذا ثاني يوم النا بالمستشفى ...الطريق كله اون وامي وعمتي يصبرن بيه وامي تبجي عليه كنت اظن متعاطفه ويه ولادتي ما دريت موضوعي اكبر
وصلنا للبيت والكل انخبص بينا اني وسيف ..سراب وساره تعاركن منو اللي تشيله اول ومتخبلات عليه ...ضحكنا عليهن وعلى عركتهن عبالك زعاطيط ..
سالم اجا سلم ووكف يم سراب اللي شالت سيف وتشوفه اله وهو يهمس باذنها وتبتسم سالم وسراب لهسه ماكو حمل وهي تريد تروح طبيب وهو ما يقبل يكول بعدنا صغار عالاستعجال للخلفه
...هو اكبر من ياسر بس سراب صدك صغيره وعمتي تركض وراه وتقنع وهو ما يقنع يكول الها اذا ما صار خلينا شويه شكم سنه غريب فعلا هالشخص وعكس اخوه...
...كانوا محضرين الي غرفة جوه لان ما اكدر اصعد بغرفتي ..دخلت الها وشفت تجهيزات البيبي اللي همه جهزوها اله ..جدته وعماته صار كومه يشترون ومنعتني عمتي اشوف حاجه تكول الا تكومين انت وياه بسلامة واليوم كلهن محضريهن كدامي وسريره بمنتصف الغرفه عالي ابو التول مشتريته عمته ام علي من اربيل اله...
فرحت هواي باهتمامهم رغم هو مو اول طفل لكن مهتمين بابسط تفصيل يخصه
ارتاحيت بفراشي بعد ما كوه حطوني بي من الالم ..سيوفي يعيط وهمه ملتهين وياه كلهم ...اني مدده واتأملهم شلون فرحانين والكل يصيح نسخة ياسر ويباركون اله وهو ساكت بس يرد مباركتهم ويسكت ويلتفت الي يشوف ردة فعلي واني بكل تشبيه اغم روحي وغيرها ..شلون خلفت هيج شبه ...
