بشرى :
بعد وصولنا ل..... تقاسمنا الشغل نسرين وامي عالبيت والجهال واني واشراق استلمنا الزرع والغنم ورعايته رغم ما اعرف بس توجيهات امي وحامد ساعدتنا اشراق احسن مني واقوى وبنيتها تساعدها لهيج شغل جانت من تحش الحشيش سريعه ومن تلكط الخضرة(الزرع) بعد اسرع ...
صار موسم المواليد وحامد متقاول ويه ابو المال انه احنا وياهم بالنص بيهن وسبحان الله هذيج السنة رب العالمين بارك والنعاج كلها لزمت وجابت توام ...
اشراق رغم تعبها بيهن حامد راد ينطيها من الفلوس ما رضت ابد تاخذ وطلبت حصه بيهن ..كان بعدهم ما عاقدين بوقتها وامي بقت تلح عليه يعقد عليها وخاصه بعد ما تشاركوا بمال ...
كان السكوت طابع حياتها ونسرين شكد ما تأذيها تسكت واسمعها تستغفر وتضم ما ترد عليها ...واجانا موسم الزرع واشترينا بيتين بلاستيكيات طبعا السيولة من الحجي وزرعناهم بيتنجان وخيار وهم المكسب ذهب ....
زاد الخير عدنا بس بتعب بحيث نرجع للبيت واحدنا جسمه مجنز من التعب ...اني وحامد ما ورانا شي بس المسكينة تتلكاها نسرين تدور منها شغل واطفالها صغار يتعايطون وراها يخبلوها نضطر اني وحامد كل واحد يشيل واحد منهم وهو دومه شايل شروق بحضنه ويمشي....
مرت الاشهر وعقد عليها بس ابد ما تغير شي هي بمكانها وهو بمكانه ..طبعا حامد من يوم تهجيرنا لحد عقدهم ما نايم بغرفة وحده ويه نسرين وبيوم عقدهم سوت مشكله شكبرها على انت هاجرني وانت عايفني وحرام عليك ورحت تزوجت وراح تشمرني ...
امي صاحت بيها بناتها نسوان وهالكلام كدامهن ...حامد عاف البيت وطلع هج من الهوسه وعافنا ..حسبي الله بيها من زوجة لا تريحه ولا تخليه يرتاح وهو اصلا زواجه من اشراق غصب وهي المره سدت بابها عليها وعلى جهالها ما طلعت من رجعت لهسه امي ما تحملت بعد كامت تصيح بنسرين
-ولج شوكت تصيرين ادميه والله لو ما بنت اختي ساعه ما اخليه يبقى عليج ..
-اي وما خليتيه هالتزوج بعد
-ولج ما استحيتي حاطه حمرتج وجايه تطالبين بي ولج عمر وياج مرمرتي وعليتي عيشته هسه تفطنتي
-رجلي واريده الي ليش تاخذه بواكة الزلم
-خفت هالحلك من ايدج والله من ايدج ومو بس تاخذه ولج لا هو رايد ولا هي بس اللي مثلج حلكه خايس يجبر الارملة تاخذ حماها ولج هين عليه واشوف مكان احمد ماكو ....
امي بجت وكامت تنعى احمد وابويه وحاجتنا الهم...اني ما تحملت حظنتها وبجينا الما كلنا بس ...
نامت وغطيتها ورحت لغرفة اشراق مبينه طاعده ضواها مفتوح فتت لكيتها تضحك ويه جهالها ..عايشه بغير دنيا اشراق مرات اشك بيها تخبلت لا تبجي لا تحجي الا نسالها ...ولو هي شبعت بجي باولها وشجاب البجي ما جاب غير الهم والقهر
