بشری:
بالمطبخ ويه عمتي ام سالم وسراب وبحضني ملك كاعده ما تفارقني الطفلة وفعلا بديت احسها بنتي ومن روحي طالعه كثر تعلقي بيها من زواجي لهسه وهي بحضني تنام ابد ما مبتعدة عني... فات من كدامنا يهف مستعجل التفت لامه وطلب منها
-يوم اني طالع اشوف البستان واتأكد من الماطور دامها عطلة والدوام بعد اله هواي ....فدوة مشتهي دولمة بس شنو كون حامضة حلوة بيها ليه هواي وعروك السلك فوك وباقلا جواها وكثري دسمها متت هناك من الجوع
-تامر جنك عل اكل مرتك بعد موجودة وتاكل من ايديها لما تنتهي اجازتك مو بشورة
هزيت راسي موافقتها والله تضحك سالفة رجلج وزوجتك حتى ما مقتنعه
التفت الي باوعلي بنظرة ما عرفت شنو هي بس ما حبيتها ..ترخص وطلع
كرهت تجاهله الي فوك اللي تحملته بهالسنة من ضلم بسببه ...كل مره يجي بيها لهنا يتجاهلني وينطيني فكرة زواجنا الغلط ويذكرني بان اني اللي وافقت عليه وهو مو راغب زواج
.........
مر اليوم بتحضيري للاكل اللي طلبه ...اشتغل واتذكر بدايات زواجي ...ما حضر ياسر العرس ومرت فتره وهو معتصم زرافض يجي وصارت شغلة عناد بينه وبين ابوه ...كنت بعد عروس واخجل منهم رغم همه ما بيوم حسسوني بشي
الحجي والحجيه يحبوني حيل وراضين عني وخاصه من تبنيت الاطفال وربيتهم ...كانوا يقهروني ايتام صغار امهم كانت متوفيه حديثا قبل اشهر قليلة ...لما تزوجت كان فارس عمره خمس سنوات وكذلك الطفلة اللي توها تكعد اثنينهم بعدهم يحتاج الهم هواي طاقات...
تخيلوا من حياة العزوبية لام لاطفال اثنين ..اتعب بيهم واركض واروح واجي والبيت هم مطالبه بالتزامات تجاه العيال ...وكل هذا وعريس الغفلة ما يريد يجي ويتمم زيجته ..اسمع امه تعاتب وتحجي وهو يعارك بيها
لحد ما مر شكم شهر وبديت افكر فعلا بالرجوع لاهلي هواي صبرت وامي تدفعني اصبر اكثر ...اهلي حياتهم مخربطه ومشاكل حامد تفاقمت ونسرين شدت وياه ويه اشراق خبلتهم ومن اروح الهم تحجي الي اشراق هم ملت من المشاكل وتريد تعزل عنهم وتبني بصفحه بصف بيتهم وحامد زعلان عليها ..مو ناقصين مشاكلي اضيفها الهم توهم يلا بدت حياتهم تبين واستقرارنا بالمكان الجديد ما بي رجعه لقريتنا القديمة
بديت بعد الزواج اريد اقدم على تعيين وحجيت ويه عمي الحجي وما اعترض ابد بالعكس شجعني وهم حتى ابطل من قرار رجوعي لاهلي ...
راح وسال بس بعد ايام جاوب كال ما رهمت تعيين بس بروضه اهليه نفس شغلي القديم وويايه فارس وملك تبقى يم جدتها ...بديت اداوم واطلع ويه زيد وساره اصغر العائله واداوم وحياتي حلوة وهذا المسمى زوجي ماكو ويكولون حيرجع وكل فتره يقرر ويتراجع واني بقيت بمكاني لا اني متزوجه ولا اني مطلقه وهم عندي طفلين ..فارس اعتمد عليه كليا وملك عمرها جوه السنه وتعلمت تصيح الي ماما ...
