اشراق:
بفترة مرت عشتها منعزله كليا بديت احس بملل فضيع ..عمتي تجي شويه وتروح لبيت حامد الثاني ..نسرين حاربتني بكل شي وكأن دا اخذ من روحها ...حتى المسواك و الاكل تباوع لما حامد ينزلهن النا رغم احنا طلع النا راتب المرحوم وانطي منه لعمتي تنطيهم لحامد لان ما يرضى ياخذهن لو اموت ولو يدري يتخبل بس اتفقت ويه عمتي تاخذهم وتنطيهم اله
.... اني ما حبيت اكون حمل على احد ابد ..وبنفس الوقت كل شي اشتغل بداخل البستان وازرع قرب البيت هم التهي وهم ناكل منهن
..للحلال والزرع وكاع حامد بعد ما وصلت ولا رحت هناك منه ابتعد عن حامد والمشاكل وياه ومنه اخلص من نسرين واذيتها ما اريد اتواجه وياها خلص بعد اني متنازله ومنسحبه رام هالشي اذاني حيل!!!..
وراها بفترة اجتي بشرى وفرحتنا بحملها فرحه ما تنوصف بس كانت حالتها خاصه وحرجه .. محتاجه رعايه شديده ..تبرعت اخذها يمي لان ما عندي شي وبيتي معزول بمجرد ما اقترحت الامر هي كيفت ما تحب نسرين ولا الكعده ببيتها واجتي يمي ورجع للحياة معنى وياها اكو بشر وياي وليل ونهار نسولف ..
كنا نحط راس يم راس بالليل ونضل ندردش مدري منين تجينا هلكد سوالف ..واكثر حديثنا الومها وتلومني على عدم معرفة تدبير حياتنا ..واحنا الاثنين نفس الحظ ونفس الضعف ونفس الحياة الظالمه ...
مره من المرات سولفت الي عن علاقتها الزوجيه اللي منها حملت وشمسوي بيها زوجها ...هي تحجي واني اتخيل حامد هيج يسوي وياي وكلش وارد يسويها ويكدر وما اكدر اعاتبه اني حتى لان موقفي مو موقف عتب ...حجيت وياها اصبرها
-تره لو ما يريدج صدك ما يكمل زواجكم ولا تصير عنده هيج رغبه تبقين ببيتهم
-لا ما رايدني راد يرد بيه على اهله واذاني لهذا السبب...وهم ولده مستفادين مني مربيه ..
-لا ما اشوف هيج اني لو مثل ما تكولين ما يخاف هيج عليج ويتخبل ولج من جابج كلش اصلا مهتم ويوصي بعمتي عليج
-اي واضح اهتمامه جابوني هنا حتى يخلصون مني
-لا ابد كال ترتاح اكثر يمكم اني واكفه وسمعته وكال الها بس يتعدى الخطر يرجعج لبيتهم
-ههه كل عقله هذا ارجع
-وليش ما ترجعين ...يجوز كان مضغوط تره رجال ويزوجه ابوه بهيج اسلوب منو يقبلها فكري
-اكولج ولا حفكر بي لا تحاولين بشر كرهته كره العمى بس اريد اولد بسلامه وابني اربي وحدي
-يااا شنو تتطلكين
-ههه لا ارجع اله خبله انت
اندارت عني وانطاني ضهرها واني تمددت بعيد افكر اي شكو بيها تتطلك وعدها راتب هي وعدها طفل حيصير وفوك هذا عدها اخ مثل حامد ما تموت وره الرجال
...بس اني مو مثلها ابد اني ما اعوف هنا ابد ولا اروح لاي مكان... اموت اذا ما اشوفه لحامد اموت والله اموت !!!
