بشرى :
بهذاك الليل طلعنا اني وياسر متوجهين لاهلي ...اعرفه لحامد لو فقد ممكن يموتها لعبير ..الطريق كله اخذناه عركه اني وياسر لان موقفه ويه اخوه ابد ما ينطون بي ولا يلوموه حتى لو غلطان واني تعاركت وياهم اثنينهم...
بعد ما اتصلت اشراق ...لبست حجابي ورحت على زيد واني افور دكيت غرفته وطلع ....انهديت بي وهو فاتح عيونه واني رافعه ايدي واهدده بكل جدية
-شوف ولك اذا حامد اذاها لعبير من وراك ما تخلص من ايدي ...الله لا ينطيك ولك جوه عيني وما خلصت
بكلامنا صعد ياسر وشافني معصبه ودا اتعارك ويه اخوه ...اجا وكف يمي وسأل
-شبيج بشرى شكو هاي شنو شبيج ؟؟؟
زيد فاتح عيونه مستغرب عصبيتي
-شنو ؟؟شصاير ..ششبيها
-ولك شوكت انطيتها رساله ولك مو بحضني واكعدها حتى لا توصلها
-عبييير؟؟ابوها ؟؟لا تكوليها بشرى...والله مو قصدي هيج ...
-ولك يا مو قصدك غضب الله على راسك شكد نذل انت...والله يا زيد اذا حامد اذاها اندمك فاهم
-كال ياسر بعصبيه ...كافي لاتهددين ولا تحجين حجي زايد.. اني اتصرف
-شتتصرف ابوها راح يسكطها من وراه
-اشش مو كلت كافي اني اتصرف...وانت امشي اوصلج هناك يمهم والبنيه تديرين بالج عليها منا لما يجون ..وانت زيد امشي نحجي للحجي شمصخم ولك انت تضل ارعن ولا يفيد وياك
رحت ركض بدلت لبست عباتي ونزلت لكيت ابوهم كاعد بنفس الهدوء ويكول الهم سهلة ...يا سهلة كله مني جبتها وورطتها
طلعنا لاهلي بعد ما خليت سيف يم ساره وعمتي ....وصلنا ونزلنا اني وياسر الطريق كله نتلاغى ونتصايح وفتت اركض عالبيت وهو ضل بره
زيد ما خلاه ياسر يجي ويانا وكل اللي بالبيت عرفوا بالسالفة وعمتي شبعتع لزيد رزاله ويكولون اله ما كدرت تصبر هاليومين وتغمه ...استغربت كلامهم ....
اخذني ياسر بسرعه نزلني بالباب وكال راح يجون ابويه والولد انتي فوتي يم عبير ودير بالج عليها اريد اشوفه لحامد صيحي اله..اول ما فتت لكيت حامد لساه يضرب بعبير واشراق واكفه بينهم ..رحت كمشت ايده اتوسله
-فدوة يا خوي عوفها ما الها ذنب
اندار عيونه نار ..جر حزامه ورجع الي كطعني تكطع ...البنات يعيطن وهو فاقد ويصيح
-ولجن اني كو.....ماخذه بنتي تك.....عليها بنات الكلب اليوم ادفنجن اثنينجن هنا الله جابج انت هم
اني انسنحت روحي بسرعه ما اكدر الع بعد مو كلش اتحمل ضرب صرت جوه ايده لا حول ولا قوة وهو مستمر بضربي ...تركني وكمش عبير من شعرها طبكها وياي وبحزامه تكطعنا لا بيها ولا عليها الله يصخم وجهك زيد.....
اشراق ذبت نفسها كدامنا وخطيه تلكت الضرب عنا وتتوسل بحامد اللي من صارت هي جوه ايده خف بضربنا بس هم ضرب
