حكاية خواتي (مكتمله)

الحلقه 8

حكاية خواتي ...حلقه 8
بقلمي ريتاج الموسوي
مسائكم ورد حبايبي هذا البارت وراح يكون بقية البارتات حسب تفاعلكم بعد اذا تردون انتو وشطارتكم

من شافو اضحك جذب
كالو عليه اتعافه

مخفي الحزن جوه الگلب
همزين محد شافه💜

ام سيف گعدت تنتظر وردة
وهيه راحت للغرفه بقيت صافنه ومصدومه بنفس الوقت ليش هيج وردة تغيرت فجئه وشنو گالتلها ام سيف
بحيث خلتها تقبل ترجع وياها للبيت اعرفها ضحكت عليها بشكم حجايه وهاي فقيره تصدگ بكلشي

شويه واشوف وردة طلعت بيدها جنطتها
لزمتها ...تعاي انتي كل وعقلج تردين ترحين وياها
المن رايحه للقهر
ابقي هنا واني اسقطلج الطفل مومجبوره تجيبينه

ام سيف..شنو انتي ماتخافين ربج گلنه غلطنه بس الطفل شنو ذنبه

..لا لا انتي اتخافين ربج
من ضحكتو على هاي المكرودة ماذكرتو الله هسه صرتي متدينه براسي

...لا متدينه ولا شي بس الحگ ينگال
وبعدين انتي ليش محترگه روحج من اختج ماتردينها تستقر
لو مقهورة لان محد مگلبج

حنين ..هيه حجيت هيج واني عيوني نطت من الحرگه
انوب اباوع الوردة ابد ماحجت شي
ولا دافعتلي باوعتلها ...وردة تسمعينها شتحجي
ولج ذوله يردون يدمروج والله

وردة ..حنين خلاص اني اتخذت قراري وانتي مومجبورة تتحمليني وتعذبين نفسج هذا حضي وهذا نصيبي راح اقبل بيه وامري ل الله

..شگول بعد الساني انربط واني اشوف وردة طلعت ويا ام سيف
صدگ حسيت نفسي ضعيفه بهذا الوقت واني اشوف ايديه مربطه مااگدر اسوي شي
من اشوفها رايحه للنار برجليها وماتقبل تسمع مني او ترد عليه

هيه طلعت واني نهاريت بالبجي ..ماادري ابجي على حضي ماادري ابجي على وردة
كلشي بحياتنه يبجي

ام احسان...يوو يخاله هم گلبتيها مناحه شتسوين بعد لازم ترضين بالواقع
بعد غلطتو ويگولون غلطة الشاطر ب الف

...مسحت ادموعي غلطنه خاله شغلطنه
هاي ونتي تدرين بينه احنه بنات وهالشي انجبرنه عليه بهفوه
والسبب ممخالطين الناس ونعرفهم بس للاسف كلها طلعت ذيابه وتنهش بلحم الضعيف

..حنونه يمه الصار صار ومصيبه اكبر من مصيبه
تطلگ وهيه جايبه طفل ولاتطلگ وهيه مسقطه
ترا تفرق يمه
والسان الناس مايرحم وانتن بنيات والبنيه ماعدها غير سمعتها

..اني خايفه عليها منهم

...شنو الخايفه منه؟ لاتشوفين وردة هيج تبين فقيره
هسه بعد فترة تلگينها قويه الضربه الماتموتك تقويك
راح تتعود وان شاءالله تجيها قسمه
الي تجبر خاطرها
وهسه گومي غسلي وجهج وخليج سباعيه اوگفي بوجه الدنيا مو ام دميعه