حكاية خواتي (مكتمله)

الحلقه الاخيرة

حكاية خواتي ...حلقه الأخيرة

بقلمي ريتاج الموسوي

‏و لكني لم أبُح

‏هدّني التعب ولم أبُح

‏اجبرني يا الله 💘.

غافيه واسمع صوت التليفون دگ

گلبي گمز من مكانه خفت لان الوقت متأخر

شفت المتصل ام وليد

الخوف صار بكل جوارحي بحيث گوة نطقت

الوو

اجاني صوتها الغير مفهوم كانو تبجي ..خاله حنين فرح تطلگ عدها ولاده

صار ساعتين وماكو حته ميخلوني ادخل يمها بلكي تجين انتي تشوفينها شصار عليها

اني سمعت هيج لو احس رجليه مايشيلني بعد النعاس طار من عيوني

لا ياربي دخيلك مااريد افقد وحدة من خواتي تعبت سنين واني مخليتهن جوا جناحي

گتلها..خاله فدوة اروحلج خلي وليد يجي ياخذني هسه نص اليل مااكدر اطلع الوحدي

گالت هسه ادزه يجيج

گعدت ابجي بس ماردت ارعب وردة مسحت دموعي وگعدتها

..وردة گعدي اني راح يجيني وليد ياخذني للمستشفى

فزت تفرك بعيونها..ليش شصاير

..فرح عدها ولاده واني لازم اكون موجوده هناك

بقت گاعده لحدما اجه وليد دگلي هورن فتحت الباب شفت سيارته سلمت عليه وصعدت

جان وجهه شاحب طول الطريق محد نطق بحجايه

نزلت امشي ع السريع رأسا دخلت لصاله الولادة

عيونها مورمه وشعرها لازگ على عيونها وكفشه

الممرضات لازماتها وهيه تصرخ

تقربت منها وعيوني تصب اول مرة اشوف وحدة من خواتي تتألم ومابيدي اسويلها شي

بس شافتني بقت تصيح...حنيييين راح اموت لحگيلي

بقيت لازمتها وابجي على بجيها

مااگدر اسويلها شي

تگول سوولي عمليه ..فرح مايصير الطفل بالحوض ماتصيرلج عمليه بس اصبري

كل شويه مغمي عليها الحدما سمعنه صوت الطفل و

وگفت عن الصياح تأن بوجع

مسحت على وجهه وبقيت حاضنتها

...فروحه باعي ابنج يخبل الف مبروك حبيبتي

تشوفه وتبتسم بس ماتگدر تتحرك تعبت من الصياح والألم

طلعت بشرت ام وليد و وليد الي جانو بالباب ووليد يفتر رايح وجاي