CORRINA (COMPLETED)

CHAPTER 10

Saya masuk kerja tengah hari ni. Masa saya pergi di bahagian cashier counter, saya nampak Jarred sedang chit chatting sama satu orang perempuan seksi. Tu siku kanan sana atas counter sambil pegang purse dark blue Bonia brand. Dia pakai spagetthi strap dress navy blue, Dhoroty Perkins brand. Bahagian pinggang ada lace see through dan high heels 5 inchi. Rambut dia curly blond. Dia chat chatting sambil jari jari runcing dia kasi menari menari di rambut. Perlahan langkah saya mau pergi dekat tu counter. Nda berkedip mata Jarred saya perhatikan tingu tu perempuan.

‘O…sexy lady…’

Lagu Oppa Gangnam Style bermain di otak saya.

Saya check Counter, Jarred sudah update semua.

“Oh, hi Sophie…” Jerrad yang baru perasan saya di sana tegur saya.

“Oh, hi juga…” Saya bilang. Tidak pun tingu diorang becerita-cerita sana.

“Oh, hi…” Tiba-tiba ni sexy lady tegur saya.”

“Hi, miss…” Saya bilang tingu dia dan tarik senyuman. Salah satu girlfriend si Jerrard kali ba… Bilang dalam hati saya.

“I am Mellia. Kau mesti Sophie.” Dia bilang. Saya tingu Jarred. Jarred angkat bahu.

“Oh, hi Mellia. Ya but… Dari mana kau tau nama saya?”

“Tu… Handsome guy depan saya yang bagi tau and I’m quiet little jealous of knowing that you as one of the famous staff here.” Dia bilang becakap sambil kasi lenggang lenggok badan dia. Dia dengan senyuman menggoda dia lagi.

“Is it so, Jarred?” Saya tanya Jarred sambil tingu dia.

“Well, I came here to picked Jarred actually… Kami ada date ba.” Dia bilang. Uik, tadi bukan main lagi slang KL dan British dia. At last, tekeluar juga ‘ba’ dia. I smiled a little sambil anggukkan kepala.

“Tunggu saya ja laitu tadi?” Saya tanya Jarred. Mata saya besar tingu Jarred.

“Oh, Sorry Sophie. Kejap ja ba… Saya sudah tolong kau update counter semua so, I go first.” Dia bilang sambil remove apron yang dia pakai. Dia bagi saya senyuman manis and I… oh, my heart…

No…no..no…

Saya kasi hilang tu perasaan tertarik sama dia. Saya pejam mata. Geram, gerigitan. Jadi satu. Kalau saya boleh jadi binatang buas, mau juga transform jadi harimau ka, serigala ka, beruang ka…

“I go first, Sophie.” Jarred bilang sambil tap pipi saya. Lagi la saya geram. What happen to me? Kenapa saya marah ni Jarred jalan? Bukan satu dua kali pun dia gitu tapi banyak kali ba… Saya tidak tingu dorang. Saya bagi action tangan saya saja suruh dorang pergi. Saya tingu dorang guna anak mata. Bukan main manja lagi tangan si Mellia melingkar macam monyet sana lengan si Jarred.

Lepas dorang jalan tu, terus staff yang lain belarian pergi counter tempat saya.

“Fi, real life drama kan tadi…?” Bilang si Melly.

“Uik…Punya cun tu sexy lady tadi. Memang ba si Jarred high taste.” Bilang lagi si Noni.

“Bagus juga dia pergi daripada kami kena arah-arah macam budak tadika.” Bilang lagi yang satu dan banyak la membawang dorang tu.

“Itu la girlfriend dia yang saya nampak di IG. Oh my God…Punya cantik depan-depan. Sabahan baitu kan tapi macam model lagi.”

“Sudah… Back to work. Nanti boss tegur kita.” Saya bilang. Sakit telinga saya dengar cerita-cerita membawang dorang pasal si Jarred. Kenapa la nda ramai customer hari ni. Dorang sudah beredar dari counter pun masih lagi becerita sambil ketawa-ketawa.