_تفسير سورة الكوثر تفسيرًا مُيسرًا باللغة العامية🌸_
_تعالوا الأول نعرف شوية معلومات عنها_
عدد آياتها : 3
وهي سورة مَكية "ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة"
وسُميت بالكوثر نسبة إلى نهر الكوثر الموجود فى الجنة
سبب نزولها : احنا طبعا عارفين ان سيدنا محمد صلى الله عليه وسلم مكانش عنده أولاد صبيان وكان عنده بنات بس لان أولاده الصبيان كانوا بيموتوا..وفى أيام الجاهلية كانوا بيقولوا على اللي معندوش صبيان أبتر..وكان في واحد اسمه العاص بن وائل وهو دا اللي قال على سيدنا محمد صلى الله عليه وسلم لقب الأبتر فربنا نزل سورة الكوثر ردًا على الراجل دا وفرَّح سيدنا محمد صلى الله عليه وسلم بالنهر الجميل اللي هيكون له
أعوذ بالله من الشيطان الرچيم
بسم الله الرحمن الرحيم
إِنَّا أَعْطَيْنَاكَ الْكَوْثَرَ (1)
فَصَلِّ لِرَبِّكَ وَانْحَرْ (2)
إِنَّ شَانِئَكَ هُوَ الأَبْتَرُ (3)
انحر "يعني اذبح"
الأبتر "يعني المنقطع عن كل خير"
_تفسير السورة بصفة عامة💜_
ربنا عز وچل بيقول لسيدنا محمد صلى الله عليه وسلم انه أعطاه نهر فى الجنة اسمه الكوثر والنهر دا بياضه أبيض من اللبن وطعمه أحلى من العسل والطينة بتاعته من المسك وهو النهر اللي بإذن الله هيتصب منه فى حوض الرسول صلى الله عليه وسلم واللي بيشرب من النهر دا عمره ما بيحس بعطش نهائي..
وبيأمر سيدنا محمد صلى الله عليه وسلم انه يصلي ويعبد ربنا ويقترب منه بالذبح وتقديم الهدايا وهنا ربنا جمع بين عبادتين "العبادة البدنية اللي هي الصلاة والعبادة المالية اللي هي النحر"..وان اللي بيبغضك وبيكرهك يا محمد هو اللي هيكون الأبتر المقطوع اللي مش هيشوف أبدًا خير ولا بركة فى حياته كلها.
ربنا يجعلنا من الناس اللي هتشرب من حوض الرسول صلى الله عليه وسلم اللهم امين🤲🏻🌸
المُتفائلة بالفردوس🤲🏻
#مُنى_صالح💜
