_تفسير سورة العصر تفسيرًا مُيسرًا باللغة العامية💜_
صلي على النبي يا مُسلمة🌸
تعالي الأول نعرف شوية معلومات عنها وبعد كدة نعرف تفسير السورة بصفة عامة💜
عدد آياتها : 3
وهي سورة مَكية "ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة"
سبب نزولها : موَردش ان في سبب معين لنزولها👇🏻✨
لم يرِد في كتبِ الحديث الصحيحة سببٌ لنزول سورة العصر حيث إنّ الواحدي وهو من أوائل من كتب المؤلفات وبحث في أسباب نزول السور لم يذكر سببًا لنزول هذه السورة.
لكن سورة العصر هي السورة التي حاول مسيلمة الكذاب أن يؤلف على منوالها ما يعارضُ به القرآن الكريم؛ فقد دخل عمرو بن العاص قبل إسلامه على مسيلمة الكذاب، فسأله ماذا أُنزل على الرسول -صلّى الله عليه وسلم-؟ فقال عمرو: أُنزلَ عليه سورةٌ بليغةٌ وجيزةٌ "، فقرأ سورة العصر،
فقال مسيلمة: لقد أُنزل عليّ مثلها ثم قال: "يا وبر يا وبر، إنّما أنت أذنان وصدر، وسائرك حفز نقز"، لكنْ هذا الكلام لم ينلْ استحسان عمروٍ وأقر بكذب مسيلمة وهو لم يدخل في الإسلام بعد.
✨ ✨ ✨✨✨✨
أعوذ بالله من الشيطان الرچيم
بسم الله الرحمن الرحيم
﴿ وَالْعَصْر * ِ إِنَّ الْإِنْسَانَ لَفِي خُسْرٍ * إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ ﴾.
العصر : المقصود بهِ الدهر "اللي هو يعني الزمان اللي الإنسان بيعمل فيه كل أعماله سواء أعمال صالحة أو أعمال سيئة"
ُإِنَّ الْإِنْسَانَ لَفِي خُسْرٍ : يعني الإنسان دا هيبقى فى خسارة وهلاك
وتواصوا : يعني كل واحد من المؤمنين بيوصي التاني على القرب من ربنا والبُعد عن المحرمات والصبر على المصائب وهكذا
_تفسر السورة بصفة عامة💜_
ربنا عز وجل بيقسم بالوقت والزمان ان في ناس هتبقى خسرانة دنيا وآخرة بسبب انها مش بتآمن بالله وبتعصيه وبيبقى همها متاع الدنيا وبس..لكن اللي هيبقوا كسبانين فعلا فهم الناس المؤمنة اللي بتسعى علشان ترضى ربنا عز وجل وبيقوموا بكل الأعمال الصالحة اللي ترضيه..
وان من صفات المؤمنين دول انهم بيساعدوا بعض على القُرب منه والبُعد عن الأعمال اللي بتغضبه..
وانهم كمان لازم يهونوا على بعض مصائب الدنيا ويصبَّروا بعض ويفكروا بعض إن الله يحب الصابرين فلازم نصبر على مصائبنا ومشاكلنا
_وهنا بنتعلم فى سورة العصر اننا لازم نسعى علشان نبقى مؤمنين فعلا بالله عز وجل بالفعل والقول مش مجرد كلام كدة وخلاص..واننا لازم نتعلم كل حاجة ربنا أمرنا بيها علشان نعملها ونتعلم اللي نهانا عنها علشان نبعد عنها..وكمان نتعلم الحمدلله اننا لازم كمسلمين ومؤمنين بالله عز وجل نسند بعض وننصح بعض..مش نفضل نعاير بعض بذنوبنا ونتريق على بعض!!..انصحي اختك فى الإسلام واسنديها ودليها على الصح..ولما تعرفي معلومة عن دينك روحي عرفيها دا كفاية بس الأجر اللي بتاخديه علشان علمتيها ما بالك بقى لو هي فضلت طول عمرها تعمل بالمعلومة دي بسببك..
وافضلي عرفيها كمان ان القرب من ربنا مفيش أجمل منه وانها دنيا فانية ومتاعها ملهاش أي لازمة ولازم نصبر على أي حاجة بتحصل لنا فيها لاننا بإذن الله هنبقى كسبانين جدا فى الآخرة🤲🏻💜
قال رسول الله صلى الله عليه وسلم "لبيك إن العيش عيش الآخرة✨"
وفعلا مفيش أجمل من عيش الآخرة..ربنا يجعلنا من الفائزين بالفردَوس الأعلى اللهم امين✨
المُتفائلة بالفردَوس🤲🏻
مُنى صالِح💜
