تفسير سورة الإخلاص والفلق والناس تفسيرًا ميسرًا باللغة العامية🌸
ملحوظة: "دي أول وآخر مرة اللي هفسر فيها كذة سورة مع بعض بس جمعت دول بالذات لسبب معين هتعرفوه فى الاخر🌸"
_تعالوا يلا الأول نعرف شوية معلومات عن سورة الاخلاص💫_
عدد آياتها : 4
وهي سورة مَكية،ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة يعني نزلت ف مكة أو ف الأماكن المجاورة لها،،
وسُميت بالإخلاص لان ربنا سبحانه وتعالى أخلصها لنفسه ومتكلمش فيها غير عن نفسه وان اللي بيآمن بيها فهو بإذن الله مخلص لله عز وچل🌸
_تعالوا بقى نعرف الكلمات الصعبة شوية علينا وبعد كدة نفسر السورة بصفة عامة🌸_
"أعوذ بالله من الشيطان الرچيم"
"بسم الله الرحمن الرحيم"
قُلْ هُوَ اللَّهُ أَحَدٌ (1)
اللَّهُ الصَّمَدُ (2)
الصمد يعني الله سبحانه وتعالى هو الوحيد اللي الناس كلها بتلجأله ف احتياجاتهم لأنه كامل فى رحمته وفى علمه وكامل فى جميع صفاته
لَمْ يَلِدْ وَلَمْ يُولَدْ (3)
وَلَمْ يَكُن لَّهُ كُفُوًا أَحَدٌ (4)
كفوًا يعني مماثلا أو مشابها يعني ربنا سبحانه وتعالى مفيش حد فى خلقه بيماثله أو بيشابهه فى أي حاجة
_تفسير السورة بصفة عامة🌸_
ربنا بيأمر سيدنا محمد صلى الله عليه وسلم انه يقول للناس كلها ان ربنا واحد بس ومفيش أي إله غيره وانه الوحيد اللي الناس كلها بتلجأله فى أي حاجة بيحتاجوها لانه كامل فى رحمته وكامل ف جميع صفاته وان ليس له زوجة أو ابن أو أب وان مفيش أي حد ف العالم كله بيشابهه فى صفاته وأسمائه وأفعاله فربنا سبحانه وتعالى واحد وبنخصه هو عز وچل بالعبادة
________________________
_سورة الفلق🌸_
عدد آياتها : 5
وهي سورة مَكية
"أعوذ بالله من الشيطان الرچيم"
"بسم الله الرحمن الرحيم"
قُلْ أَعُوذُ بِرَبِّ الْفَلَقِ (1)
الفلق يعني الصبح اللي ظهر بعد الظلام
مِن شَرِّ مَا خَلَقَ (2)
وَمِن شَرِّ غَاسِقٍ إِذَا وَقَبَ (3)
غاسق يعني الليل شديد الظلام،،
وقب يعني أتى ودخل
وَمِن شَرِّ النَّفَّاثَاتِ فِي الْعُقَدِ (4)
النفاثات يعني الساحرات
وَمِن شَرِّ حَاسِدٍ إِذَا حَسَدَ (5)
_تفسير السورة بصفة عامة🌸_
ربنا بيأمر سيدنا محمد صلى الله عليه وسلم انه يعتصم ويحتمي بالله فالق الصبح من الليل وفالق الحَب من النوى وانه يستعيذ به من شر كل مخلوقاته سواء إنس أو جن أو حيوان ويستعيذ به من شر الليل شديد الظلام اللي فيه شر وأذى للإنسان ويحتمي به من الساحرات اللي بينفخوا سحرهم فى عقد ويأذوا به الناس ومن شر كل حاسد بيتمنى زوال نِعم غيره وبيفضل يحقد عليه
___________________________
_سورة الناس🌸_
عدد آياتها : 6
وهي سورة مَكية
بسم الله الرحمن الرحيم
قُلْ أَعُوذُ بِرَبِّ النَّاسِ(1) مَلِكِ النَّاسِ (2) إِلَهِ النَّاس
ِ
(3) مِنْ شَرِّ الْوَسْوَاسِ الْخَنَّاسِ
الخناس يعني اللي بيختفي عند ذكر الله
(4) الَّذِي يُوَسْوِسُ فِي صُدُورِ النَّاسِ (5)
مِنَ الْجِنَّةِ وَالنَّاسِ (6)
الجنة يعني الجن
_تفسير السورة بصفة عامة🌸_
ربنا بيأمر سيدنا محمد صلى الله عليه وسلم انه يعتصم ويحتمي بالله اللي خلق الناس ورباهم وهو الملك والإله الوحيد للناس المتصرف والمسئول عن كل شأن يخصهم وانه يستعيذ بالله من شر الشيطان اللي بيفضل يوسوس للناس ويزرع الشر فى قلوبهم ولكنه بيختفي على طول أول ما يسمع حد بيذكر الله وانه كمان يستعيذ بالله ويحتمي به من شر الجن والإنس
____________________________
بصي بقى يا غالية ال3 سور دول بالذات سيدنا محمد صلى الله عليه وسلم كان بيحصن بيهم نفسه من أي شر وأذى ولو تلاحظي هما دايما موجودين فى أذكار الصباح والمساء والنوم.. وسورة الفلق والناس اسمهم المعوذتين يعني من خلالهم بنستعيذ بالله من أي شر وأذى وحسد،،وفي حاجة جميلة جدا عن سيدنا محمد صلى الله عليه وسلم هتلاقيها ف الحديث ده👇🏻🌸
عَنْ عَائِشَةَ رَضي الله عَنها أَنَّ النَّبِيَّ صَلَّى اللَّهُ عَلَيْهِ وَسَلَّمَ كَانَ إِذَا أَوَى إِلَى فِرَاشِهِ كُلَّ لَيْلَةٍ جَمَعَ كَفَّيْهِ ثُمَّ نَفَثَ فِيهِمَا فَقَرَأَ فِيهِمَا قُلْ هُوَ اللَّهُ أَحَدٌ وَقُلْ أَعُوذُ بِرَبِّ الْفَلَقِ وَقُلْ أَعُوذُ بِرَبِّ النَّاسِ ثُمَّ يَمْسَحُ بِهِمَا مَا اسْتَطَاعَ مِنْ جَسَدِهِ يَبْدَأُ بِهِمَا عَلَى رَأْسِهِ وَوَجْهِهِ وَمَا أَقْبَلَ مِنْ جَسَدِهِ يَفْعَلُ ذَلِكَ ثَلَاثَ مَرَّاتٍ ) .
يعني كان بيجمع كف ايديه الاتنين ويحطهم على فمه وينفخ فيهم ويقرأ ال3 سور دول وبعدين يمسح بكف ايده على راسه و وشه وجسمه وكان بيعمل كدة 3 مرات يعني يقرأ ويمسح ويقرأ ويمسح وهكذا
فحافظي انك تقرأيهم على نفسك دايما وتتحصني بيهم💜
ربنا يجمعنا مع بعض فى الفردوس الأعلى يارب💫
#المتفائلة_بالفردوس🌸
#منى_صالح💜
