_تفسير سورة الماعون تفسيرًا مُيسرًا باللغة العامية💜_
تعالوا الأول نعرف شوية معلومات عن سورة الماعون🌸
عدد آياتها : 7
وهي سورة مَكية "ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة
سبب نزولها : يقال انها نزلت فى واحد كافر اسمه العاص بن وائل السهمي أو نزلت في الوليد بن المغيرة أو في عمرو بن عائذ..
ويقال انها نزلت في ابي سفيان بن حرب لانه كان بيدبح كل اسبوع جزورين والجزور يعني واحد من الابل فجاله يتيم بيطلب منه لحمة فأبو سفيان عامله معاملة وحشة جدا وضربه بالعصاية بتاعته فنزلت سورة الماعون اللي بتتكلم عن التكذيب بيوم الحساب والمعاملة السيئة للأيتام
يلا بينا بقى الأول نعرف معاني الكلمات الصعبة شوية علينا وبعدين نفسر السورة بصفة عامة💜
أعوذ بالله من الشيطان الرچيم
بسم الله الرحمن الرحيم
أَرَءَيْتَ الَّذِي يُكَذِّبُ بِالدِّينِ (1) فَذَلِكَ الَّذِي يَدُعُّ الْيَتِيمَ (2)
وَلَا يَحُضُّ عَلَى طَعَامِ الْمِسْكِينِ (3)
فَوَيْلٌ لِلْمُصَلِّينَ (4) الَّذِينَ هُمْ عَنْ صَلَاتِهِمْ سَاهُونَ (5)
الَّذِينَ هُمْ يُرَاءُونَ (6)
وَيَمْنَعُونَ الْمَاعُونَ (7)
معاني الكلمات🌸
_يدُع اليتيم : يعني بيعامله معاملة سيئة جدا مليانة عنف وقساوة وبيظلمه وبياخد حقه
_لا يحض على طعام المسكين : يعني لا بيجعل نفسه يأكل المساكين ويعطف عليهم ولا بيجعل كمان غيره يعطف على المساكين
_ويل : كلمة للعذاب الشديد والتهديد ويقال ان ويل اسم وادٍ فى جهنم والله أعلم
_يراءون : يعني لما بيصلوا مش بيصلوا علشان بيعبدوا ربنا ولكن بيصلوا علشان منظرهم قدام الناس وخلاص
_يمنعون الماعون : يعني بيمنعوا اعطاء أي شئ للمساكين حتى لو الشئ دا مش هيضرهم فى حاجة زي مثلا الماء والملح والفأس والدلو وهكذا
_تفسير السورة بصفة عامة💜_
ربنا بيقول لسيدنا محمد صلى الله عليه وسلم أرأيت يا محمد حال اللي بيكذب بيوم الحساب واللي بيقول ان مفيش آخرة وبعث بعد الموت؟!..
وربنا سبحانه وتعالى هنا استخدم همزة الاستفهام للتعجيب من حال الكفار..لانهم كمان بيظلموا اليتامى وبيعاملوهم معاملة وحشة جدا وبياخدوا حقهم ومش بيرضوا يأكلوا المساكين ولا بيرضوا يخلوا حد يأكلهم..
وبعد كدة ربنا بيتكلم عن الناس اللي مش بتصلي واللي بتسيب الصلاة بمزاجها لدرجة انهم بينسوها أصلا واللي كمان بيصلوا لمجرد بس ان الناس تقول عليهم انهم مؤمنين..
وحقيقي الآيات دي المفروض يبقى فيها كمية وجع وخوف للناس اللي مش بتصلي..لان ربنا اتكلم عنهم ووعدهم ان هيبقى ليهم عذاب شديد جدا فى جهنم..
وربنا سبحانه وتعالى اتكلم كمان عن الناس اللي بتستخسر حتى تعطف على المساكين بحاجات مش محتاجينها..زي مثلا واحد غني لو خرَّج شوية مياة أو شوية ملح فأكيد مش هيخسر حاجة أبدا صح؟..
أهي الناس دول بقى بيبخلوا لدرجة ان حتى الحاجات اللي مش هتضرهم فى حاجة لو اتبرعوا للناس منها فمبيرضوش أبدا يتبرعوا بيها ودا بيدل على قد ايه هما قلبهم مليان جحود وبيكرهوا العطف على غيرهم.
أتمنى بجد بعد اما عرفتوا تفسير السورة دي انكم متسيبوش فرض أبدًا لاننا مش هنستحمل نظرة غضب من ربنا ومش هنستحمل أبدًا اننا نشوف حتى النار فما بالكم لو دخلنا جواها!!
ابدأوا صفحة جديدة مع ربنا وتوبوا واستغفروا على كل اللي فات وبإذن الله حبيبنا هيغفرلنا كلنا💜
المُتفائلة بالفردوس🤲🏻
#مُنى_صالح💜
