_تفسير سورة المسد تفسيرًا مُيسرًا باللغة العامية💜_
_تعالوا الأول نعرف شوية معلومات عن السورة🌸_
عدد آياتها : 5
وهي سورة "مَكية" ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة
سبب نزولها : سيدنا محمد صلى الله عليه وسلم كان فى مرة خرج لمنطقة اسمها البطحاء وطلع على الجبل علشان ينادي على أهل قريش علشان يقول لهم حاجة فاجتمعت قريش..فسيدنا محمد صلى الله عليه وسلم قال لهم فيما معناه "لو انا قولتلكم إن العدو هيجيلكم فى الصباح أو فى المساء هتصدقوني؟"
فقالوا "نعم"
فقال صلى الله عليه وسلم "فإني نذير لكم بين يدي عذاب شديد"..يعني انا ربنا بعتني علشان انذركم واحذركم من العذاب الشديد فى الاخرة..
فلما قال كدة راح عمه أبو لهب قال له "انت بتجمعنا علشان تقول لنا كدة😒؟!! تباً لك"
فربنا سبحانه وتعالى نزَّل سورة المسد بسبب كره وبغض ابو لهب لسيدنا محمد وكمان ذكر فى السورة زوجته اللي كانت بتساعد أبو لهب على أذية سيدنا محمد صلى الله عليه وسلم
_تعالوا بقى نعرف معاني الكلمات الصعبة شوية علينا وبعدين نفسر السورة بصفة عامة🌸_
تَبَّتْ يَدَا أَبِي لَهَبٍ وَتَبَّ 1
مَا أَغْنَى عَنْهُ مَالُهُ وَمَا كَسَبَ 2
سَيَصْلَى نَارًا ذَاتَ لَهَبٍ 3
وَامْرَأَتُهُ حَمَّالَةَ الْحَطَبِ 4
فِي جِيدِهَا حَبْلٌ مِنْ مَسَدٍ5
تبت يعني خسرت يد أبي لهب
وخاب ظنه وضل عمله
سيصلى نارًا "يعني النار هتحاوطه من كل جانب"
جيدها "يعني عنقها"
حبل من مسد "يعني حبل من الليف الخشن"
_تفسير السورة بصفة عامة🌸_
ربنا عز وچل بيقول على أبو لهب انه خسر دنيته واخرته وانه هلك بسبب كرهه وأذيته لسيدنا محمد صلى الله عليه وسلم وان مفيش أي حاجة من فلوسه ولا من اللي كسبه هيقدروا يبعدوه عن عذاب ربنا وانه هيتعذب وهياخد جزائه..
وجزائه ده هيكون ان النار هتحاوطه من كل ناحية وهتكون نار شديدة جدا والحرق بتاعها شديد ومحدش هيقدر يتحمله وان مراته اللي كانت بتساعده على أذية سيدنا محمد صلى الله عليه وسلم هيتلف حوالين رقبتها حبل من الليف الخشن وهتتشد منه وتترمي فى النار مع زوجها
"يارب يكون التفسير كان مُيسر عليكم وياريت تبعتوه لأصحابكم علشان يستفيدوا🌸"
المتفائلة بالفردوس🤲🏻
#منى_صالح💜
