_تفسير سورة الفاتحة تفسيرًا مُيسرًا باللغة العامية🌸_
تعالوا الأول نعرف شوية معلومات عن سورة الفاتحة💜
"عدد آياتها : 7
وهي سورة مَكية،ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة..
وسُميت بالفاتحة لانها السورة التي يُفتتح بها القرآن العظيم..
وليها كذة اسم زي السبع المثاني والصلاة والوافية والكافية وأم الكتاب وهكذا"
_تعالوا يلا نعرف تفسير الآيات الأول وبعد كدة نتكلم بصفة عامة عن السورة كلها🌸_
بِسْمِ اللَّهِ الرَّحْمَنِ الرَّحِيمِ (1)
أصلها قُل باسم الله الرحمن الرحيم أو أبدأ باسم الله الرحمن الرحيم ولكن اتحذف فعل الأمر لدلالة الكلام عليه..واتحذفت الالف ف باسم للخفة ولاننا بنستعملها كتير فبقت "بسم"
يعني ربنا هنا بيقول للعبد ابدأ قراءة القرآن الكريم باسم الله سبحانه وتعالى مستعينا به ولا تستعن بأحد غيره لانه ذو الرحمة الواسعة العظيمة التي وسعت كل شئ وكل الخلق
الْحَمْدُ لِلَّهِ رَبِّ الْعَالَمِينَ(2)
الثناء على الله بصفاته ونِعمه وأن المستحق للحمد هو الله وحده المُربيِ لجميع خلقه بالإيمان والعمل الصالح
الرَّحْمَنِ الرَّحِيمِ (3)
هما اسمان من اسماء الله الحسنى واللي بتدل على كثرة رحمة ربنا بعباده فرحمته وسعت كل شئ
مَالِكِ يَوْمِ الدِّينِ (4)
الله وحده هو مالك يوم القيامة وهو اليوم اللي كل واحد هياخد فيه جزاء أعماله سواء كانت خير أو شر والآية دي تذكير للإنسان ليوم القيامة وانه يعمل أعمال صالحة تنفعه فى اخرته ويبعد عن المعاصي والأعمال السيئة
إِيَّاكَ نَعْبُدُ وَإِيَّاكَ نَسْتَعِينُ (5)
يارب احنا بنخصك وحدك بالعبادة وبنستعين بك وحدك فى كل أمورنا والآية دي فيها شفاء للقلوب من مرض الرياء والكبرياء والتعلق بغير الله
اهْدِنَا الصِّرَاطَ الْمُسْتَقِيمَ(6)
يارب دلنا وثبتنا على الهداية وعلى الاسلام وثبتنا على الطريق اللي هيوصلنا لجنتك
صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ (7)
صراط الذين أنعمت عليهم: يارب اهدنا الصراط اللي انعمت بيه على الأنبياء والصديقين والشهداء والصالحين
غير المغضوب عليهم ولا الضالين : يارب احنا مش عايزين صراط اللي عرفوا الحق وبعدوا عنه ومعملوش به زي اليهود..ولا صراط الضالين اللي ضلوا طريقهم زي النصارى..
والآية دي فيها شفاء للمسلم من مرض الجحود والجهل والضلال
_تعالوا بقى نتكلم عن السورة باختصار وبصفة عامة🌸_
النصف الأول من السورة اللي هما أول ثلاث آيات..ربنا سبحانه وتعالى بيأمر عبده انه يبدأ قراءة القرآن الكريم باسم الله ذو الرحمة الواسعة واللي مفيش أرحم منه فهو الرحمن الرحيم بكل خلقه وعباده
والواجب علينا اننا نحمده هو وحده فهو المُربيِ والخالق لجميع المخلوقات وربىٰ أوليائه بالإيمان والعلم..وهو المالك الوحيد ليوم القيامة ويوم القيامة دا هو اليوم اللي كل واحد مننا هيلاقي جزائه على أعماله سواء كانت صالحة أو سيئة
وبعد كدة فى النص التاني احنا بنخص ربنا وحده سبحانه وتعالى بالعبادة ومش بنستعين بحد غيره وبندعي انه يهدينا ويثبتنا على الصراط المستقيم ويثبتنا على الاسلام والطريق اللي هيوصلنا لجنته وبنطلب منه انه يهدينا الصراط اللي أنعم بيه على الأنبياء والصالحين والشهداء..غير المغضوب عليهم اللي هما اليهود وغيرهم لانهم عرفوا الحق ومعملوش به ولا الضالين اللي هما النصارى لانهم ضلوا الطريق وتركوا الحق بسبب جهلهم
_اقرأوا بقى الكلام الجميل دا👇🏻🌸_
عن أبي هريرة رضي الله عنه قال : سمعت رسول الله - صلى الله عليه وسلم - يقول : قال الله تعالى : ( قسمت الصلاة بيني وبين عبدي نصفين ولعبدي ما سأل ، فإذا قال العبد : الحمد لله رب العالمين ، قال الله تعالى : حمدني عبدي ، وإذا قال : الرحمن الرحيم ، قال الله تعالى : أثنى علي عبدي ، وإذا قال : مالك يوم الدين ، قال : مجدني عبدي ، وقال مرة : فوض إلي عبدي ، فإذا قال : إياك نعبد وإياك نستعين ، قال : هذا بيني وبين عبدي ولعبدي ما سأل ، فإذا قال : اهدنا الصراط المستقيم ، صراط الذين أنعمت عليهم ، غير المغضوب عليهم ولا الضالين ، قال : هذا لعبدي ولعبدي ما سأل )
وفي رواية : ( قسمت الصلاة بيني وبين عبدي نصفين ، فنصفها لي ونصفها لعبدي ) رواه مسلم وأصحاب السنن الأربعة .
الصلاة دي هي المقصود بيها سورة الفاتحة وربنا سبحانه وتعالى بيقول انه قسم سورة الفاتحة نصفين
نصف "لربنا سبحانه وتعالى" وهي أول ثلاث آيات من أول الحمدلله لحد مالك يوم الدين والنصف التاني "للعبد" وهي من أول إياك نعبد لحد الآخر وربنا بيرد علينا فى كل آية بنقولها زي ما مكتوب فى الحديث القدسي اللي فوق دا
فهي سورة ليها فعلا أجر كبير ولازم نكون حافظينها كويس ونحفظها لأولادنا علشان يصلوا بيها بإذن الله
وبكدة نكون خلصنا سورة الفاتحة ويارب يكون التفسير كان ميسر عليكم وربنا يجمعنا كلنا فى الفردوس الأعلى يارب💜
المتفائلة بالفردوس🤲🏻
#منى_صالح💜
