_تفسير سورة قريش تفسيرًا مُيسرًا باللغة العامية💜_
صلي على النبي يا غالية🌸
تعالي الأول نعرف شوية معلومات عن السورة وبعدين نعرف تفسيرها💜
عدد آياتها : 4
وهي سورة مَكية "ومَكية يعني نزلت على سيدنا محمد صلى الله عليه وسلم قبل هجرته من مكة إلى المدينة"
سبب نزولها : ربنا نزَّلها فى قبيلة قريش ليذكُر نِعمهُ عليها وانه فضَّلها على أي قبيلة تانية👇🏻💜
قال رسول الله صلى الله عليه وسلم : " إن الله فضل قريشا بسبع خصال - لم يعطها أحدا قبلهم ولا يعطيها أحدا بعدهم - : إن الخلافة فيهم ، وإن الحجابة فيهم ، وإن السقاية فيهم ، وإن النبوة فيهم ، ونصروا على الفيل ، وعبدوا الله سبع سنين لم يعبده أحد غيرهم ، ونزلت فيهم سورة لم يذكر فيها أحد غيرهم
ويقال ان سورة قريش متصلة بسورة الفيل وان ربنا عاقب أصحاب الفيل علشان قريش تكون آمنة وتستمر رحلتيها..
باختصار ان صاحب الفيل دا كان عايز يهد الكعبة وياخد الأحجار بتاعتها علشان يبني بيها بيت فى اليمن يحج الناس اليه..
فربنا أهلكهم وعاقبهم
وعموما ان شاء الله هنبقى نعرف تفسير سورة الفيل والقصة كلها المرة الجاية
أعوذ بالله من الشيطان الرچيم
بسم الله الرحمن الرحيم
لِإِيلَافِ قُرَيْشٍ (1)
إِيلَافِهِمْ رِحْلَةَ الشِّتَاءِ وَالصَّيْفِ (2)
فَلْيَعْبُدُوا رَبَّ هَٰذَا الْبَيْتِ (3)
الَّذِي أَطْعَمَهُم مِّن جُوعٍ وَآمَنَهُم مِّنْ خَوْفٍ (4)
لإيلاف قريش : الإيلاف اللي هو يعني انك اتعودتي على حاجة واستقريتي عليها وفي أُلفة بينك وبينها ومش بتزهقي منها..
فهنا طبعا قريش كانت دايما بتذهب الى رحلتين "اللي هما رحلة الشتاء الى اليمن ورحلة الصيف الى الشام" ..
والرحلتين دول كانوا بيستفيدوا منهم جدا من ناحية المحاصيل الزراعية اللي اتحرموا منها وهكذا
هذا البيت : المقصود به الكعبة
_تفسير السورة بصفة عامة💜_
ربنا هنا بيتكلم عن فضله على قبيلة قريش وانه أنعم عليهم بنعم كتيرة جدا زي انها القبيلة اللي يُنسَب إليها سيدنا محمد صلى الله عليه وسلم وانهم ساكنين بجوار الكعبة وان ربنا أنعم عليهم برحلتين "رحلة الشتاء الى بلاد اليمن ورحلة الصيف الى بلاد الشام" ..
وأصلا قبيلة قريش دي أرضها مكانش فيها زرع ولا أي حاجة وبسبب الرحلتين دول كانوا بيقدَروا يحصلوا على حاجات كتير هما محرومين منها ولولا الرحلتين دول كان زمانهم عايشين فى جوع وفقر..
وان ربنا كمان جعلهم عايشين فى آمان وجعل في قبول فى قلوب الناس من ناحيتهم وكانت الناس بتحترمهم جدا أثناء السفر لانهم ساكنين بجانب بيت الله "الكعبة" ومكانش حد بيقدر يحاربهم أو يستولى على فلوسهم أبدا..
يعني ربنا أنعم عليهم بنعم كتير جدا فالمفروض انهم يعبدوه وحده ويشكروه على نعمته لانهم أصلا عارفين ان كل اللي هما فيه دا بسبب فضل الله..
لكن للأسف بعد اما فضلوا يعبدوا ربنا سبع سنين جه واحد اسمه عمرو بن لحي وبدأ يعرض عليهم الأصنام وبالتالي بدأت ناس كتير من قبيلة قريش تعبد الأصنام دي وتتجه الى الكفر بالله وبسيدنا محمد صلى الله عليه وسلم..
والسورة دي فيها تعجيب من حال القبيلة دي لانهم مقدَّروش نعم الله عليهم لأ وكمان فى الآخر للأسف عبدوا غيره..
ومن سورة قريش المفروض تتعلمي انك دايما تحمدي ربنا على النعم اللي عندك حتى لو شايفاها قليلة جدا لان حقيقي غيرك محتاج حاجة واحدة بس من النعم اللي عندك دي🌸
المُتفائلة بالفردوس🤲🏻
#مُنى_صالح💜
