_تفسير سورة النصر تفسيرًا ميسرًا باللغة العامية💜_
_تعالوا الأول نعرف شوية معلومات عنها🌸_
عدد آياتها : 3
وهي سورة مَدنية "ومدنية يعني نزلت على سيدنا محمد صلى الله عليه بعد هجرته من مكة إلى المدينة المنورة"
وبتُسمى كمان بسورة التوديع لان ربنا سبحانه وتعالى ذكر فى سورة النصر اقتراب موت سيدنا محمد صلى الله عليه وسلم
"أعوذ بالله من الشيطان الرچيم"
"بسم الله الرحمن الرحيم"
إِذَا جَاءَ نَصْرُ اللَّهِ وَالْفَتْحُ 1
وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا 2
أفواجًا "يعني جماعات كتيرة"
فَسَبِّحْ بِحَمْدِ رَبِّكَ وَاسْتَغْفِرْهُ إِنَّهُ كَانَ تَوَّابًا 3
"سورة النصر نزلت قبل اما الرسول صلى الله عليه وسلم يفتح مكة وربنا كان بيبشره فى السورة دي على إنه هينتصر على كفار قريش وهيفتح مكة وهيكون النصر له وللمسلمين..
وكان كمان بيوجه رسالة لقريش على انهم هينهزموا ويخسروا وإن عدد المسلمين هيفضل يزيد..وكان بيعرف سيدنا محمد صلى الله عليه وسلم إن خلاص موته قرب وهيروح لربنا عز وچل فأمره انه يفضل يسبح بحمد الله ويستغفره وانه يستعد للقاء ربه"
_تفسير السورة بصفة عامة💜_
في سورة النصر ربنا بيقول لسيدنا محمد صلى الله عليه وسلم لو انتصرت على كفار قريش وفتحت مكة و لقيت ناس كتيرة جدا بيدخلوا فى دين الإسلام بعد ما كان عدد قليل بيدخل الاسلام بقوا بيدخلوه جماعات كتيرة فلو ده كله حصل سبح بحمد ربك واستغفره لان ربنا هو التواب اللي بيتوب على كل المسبحين والمستغفرين واللي بيرحمهم برحمته وبيقبل توبتهم وكان بيعرَّف سيدنا محمد صلى الله عليه وسلم إن اقترب موته وانه هيروح لربنا عز وچل فأمره انه يفضل يسبح ويستغفر.
"يارب يكون التفسير كان مُيسر عليكم"
"متنسوش تعودوا لسانكم على ذكر الله🌸"
المتفائلة بالفردوس🤲🏻
#منى_صالح💜
