مستشفى المجانين 🏨💔

الحلقه الثانية عشر 1️⃣2️⃣

#مستشفى_المجانين 🏨
.
.
.
.
.
.
.
.
.الحلقه الثانية عشر 1️⃣2️⃣
.
.
.

#صدام
كملنا وراقي المستشفى وطلعنا ع اساس بنفطرو ف مطعم بس مابتش اسمهان قالت تبي ترتاح ..كملنا للحوش ونزلنا انا واسمهان
• اسمهان : شارعكم مريح وهادي ..
• صدام : ايه ..وبوي وامي يبو الجو هذا ..هذا علاش بنينا هني ..
• اسمهان : ان شاءالله عتبت خير عليكم وتسكنوه ع خير..
• صدام : ان شاءالله ..تفضلي ..وفتحت الباب وشفت منظر ولا مرة تخيلت نشوفه ف حياتي 😳😠
• صدام : جنى 😠
• جنى : ص ص صدام 😱
اخر شيء ممكن يخطر ف بالي ان نلقاء أختي مع ولد لا عاري 😡 هذا اي عقل يتحمله او شني نفهم انا وبدون مقدمات كنت شاد ف ايدي اسمهان لما شفت المنظر ما تحملت وع طول مشيتلها شديتها من شعرها وجيت بنضربها ..بس ف حد عترض وشد ايدي وكان نفس الولد 😡
• صدام : انت خيرك مستعجل ع دورك ..وعطاه بوكس لين طاح ع اللوطا ..عاود ناض ورجع بيتكلم
• ماريوس : غر اسمعني ياراجل ..
• صدام : راجل صار باهي وراجل مايرضاش هذا خودا وزاده بوكس وانا مصدومه اول مرة صدام يمد يده .. صدام يضرب بغل وماريوس يدافع ع روحه ويحاول يتافدا ضربات صدام... لما شفته هكي كنت نعرف ان ماريوس مايبيش نشوف خوي ينضرب وفعلا بديت نعيط ونجبد ف صدام من فوق ماريوس
• انا : وراسك يا وخي فاهم غلط وراسك سمعني ...غر حول من عليه اضربني انا هوا ما دنبه شي ...ونجبد وهوا يدفني نطيح ونوض تاني ..يا صدام وراس وخي الغالي وربي ما درت حاجه غلط ..وانا مزال ما كملت كلمتي وهوا ناض من على ماريوس وجاني عطاني كف لين حسيت راسي لف وطحت .. وجاني تاني بيقيمن .. جت البنت تجري الي كانت مع صدام ..خشت بيني وبينه وهوا يقوللها حولي اليوم موتها ع ايدي
• اسمهان : صدام اسمع منها اختك يا صدام اختك ادكر ربي ...وهو يحاول يحولها وبيجبدني وانا ...حتي صوت هرب ..لين جاه ماريوس بيكلمه لفله بيعطيه بوكس بس ها المرة شده ماريوس
• ماريوس : كلنا نعرفو نتعاملو با العضلات بس لازم مرات نستعملو العقل وانت عاقل ياصدام
• صدام : اووو وقالتلك حتي ع اسمينا وطلع لسان مشاءالله جاء بيضربه بايده الثانية ..شده ماريوس بايده الزوز وطبق عليه ..
• ماريوس : لازم تسمعنا انت كيف تحكم علينا هكي ..اختك اشرف من شرف وانا ما نرضها لأختك والي يمسها كانه مسني ..وسيبه ...وهدا وجهي اضربني ولو تبي تقتل اقتلني انا هي ما خصها بس حبت تساعدني ..
صدام حس انه يتكلم جد لف ل جنى وقرب منها وانا كنت ندس ف روحي وراء البنت وهي كانت كانها دافع عليا ...
• صدام : بعدي شوية يا اسمهان ..جنى ما تهبلنيش من هذا ومن وين تعرفي وعلاش هوا هني اصلا ..هكي اخرتها يا جنى تكسريني يا جنى انا صدام تكسري خوتك وبوك ف عقاب عمرنا شن نقصنا عليك نستهلو منك هذا كله ...رغم نعرف ما درت شيء بس وربي هوا يتكلم وانا نبكي بس لما وصل تكسرينا خلاص نار شعلت ف داخلي ..
• انا نعيط : انت صدام العاقل يشك فيا انا جنى تربيت ايده انا اخرتها نوسخكم ولا نكسركم نموت ولا يوصلكم مني هذا بس عندك الحق وربي انا ماتربيت اني ندس عليكم شي..والعبرة خانقتني ودموع ينزلو ...المفروض احكيتلك بس وربي ع اساس اليوم بنقولك بس قضاء ربي سبقني ..
• صدام بغل وصوت رجولي : ربي ماعاتش تجبديه ع اللسانك..
• أنا زاد صوتي وزادو دموعي : وعلاش انت تحكم هكي عليا ..وربي ما درت شيء حرام ولا غلط ..باش تكلمني هكي ..وفجاة خشت مودة ..
وصدام جاء بيتكلم ..قطعت عليه
• مودة وهي تلعلع : اسمع منها قبل ما تحكم ووطي حسك وافهم وانت طالق نار وتعيط ..الي داراته انا معاها واي شيء صح غلط انا مشتركه معاها ..لو انت هذا يريحك ..اختك يامحترم او بنتك زي ما معتبرها والمفروض ..هربت واحد من مستشفى لانه كان حابسينه ويبو يقتلوه وهي نقداته ..
صدام وكان حد صب عليا مية مصقع ثلج هادي شن تقول ومن المجنون ..
• صدام بقله ستوعاب : تجري بيا انتي ولا عابية بنصدقك .. تي تحسابي روحك ف فيلم هندي ..
• ماريوس جاء بيتكلم : كلام الي ت..
• صدام : انت ولا حرف مانبي نسمع منك ولا كلمه .. وشبحت لجنى ..الي نسمع فيه صح تكلمي ..
• هزيت براسي با ايه
• صدام بصوت يخوف : احككككي برري اي شيء قولي كلام البنت صح ولا غلط ..
• انا بخوف : وربي ايه والله ما تكدب هذا كان مريض ف المستشفى من زمان كانو يخدرو ويعدبو فيه بس انا عرفت ونحيتله كل الادوية وهربته لهني لين نحلو مشكلته ..وشبحت لماريوس ..
• صدام هداء شوي وبدا يخبط برجليه ع الحيط : باهي علاش ماحكتيلي علاش ماجيتي ليا وقولتيلي ..من امتى دسي عليا علاش تخليني ولو واحد ف المية نشك فيك علاااااش فهميني ..وقعمز بقلت حيله ع الارض ونزلو دموعه ..علاش تخليني نمد ايدي عليك علاش يا بنتي ياجنى تعرفيني نموت ولا يمسك حتي بوي يا مبال اني 💔 ..نضت وانا نحاول نوقف نبي نمشيله ساعدتني البنت اني نوقف ومشيتله ..ضميته وقعدت نبكي..
• انا : لااااا بالله عليك لا يارب نموت يارب نموت ماتبكي بالله عليك الا دموعك ما تكسرني والله ربيتوني احسن تربية وربي طول عمري نبي تفتخرو بيا والله الي درته ماهو حرام والله لو انت تعرف حا دير زي وازود وربي ....ضمني وباس راسي ..
• صدام : سامحيني والله ما قصدي نضربك ..وبدا يمس ف خدي توجع ..
• انا : توجع لكن مية مية 😂😂😂 .. ماعرفتنا واشرت بحواجبي ع اسمهان .. هادي اسمهان وبعدين نهدرزو ..
صدام ناض ومشى ل ماريوس في خاطري نقول يارب استر ..
• صدام مد يده : صدام علي ال....سامحني ع التعارف الرقي الي بدينا بيه ..
• ماريوس : مد ايده ولا يهمك عادرك بس اعدرني ان خشيت حوشكم بلا ادن بس ..
• صدام : مادورش ..
• ماريوس : ممكن لحظة بس نستر روحي ونجي ...
• صدام : تفضل ..
• مودة : الله حوشكم قداش كبير ومحلاه باهي الي تعركتو باش نشوفه ..اهو فيه دار هني فيها كراسي تعالو نقعمزو هني ..لان شكله فيه هلبا قصص سايرة وشبحت ل اسمهان ..
نضنا كلنا حولنا ...