قصة
#العروس
ج 1
بعد الحاح استمر اكثر من سنه..ومناوشات ونقاشات ..وبعد ماگمت اسمع المقام المعهود من امي يوميه ( يمه اني كبرت وبعد مابيه حيل وتعبت ومريضه وضغطي وگلبي )
رغم انه خواتي ممقصرات يجن يوم الخميس حتى يساعدن امي اثنينهن ويرحن السبت بالليل..
على اساس ينظفن ويساعدنها ..بس الله وكيلكم عدهن قروده يخلوني اظل ابلع مهدئات وماالحك .. ينگلب البيت على راسنه ...نوم ماكو ..العطله تتحرم عليه...غرفتي تنهجم ..
حتى على راسي يصعدون...
آخر شي قررت وره هاي البلاوي كلها والحاح الحجيه المستمر انه اتزوج بعد ماكنت مسوي اضراب...
استسلمت اخيرا وكتلها الامي دوريلي وحده بنت اوادم ..ونطيتها المواصفات ..
امي ماصدگت ... وطارت من الفرح ..
وبما انه هي استاذه بالعلاقات الدوليه والاجتماعيه..ومصادقه كل نسوان المنطقه..لا وحتى جوارين بيت خالاتي وعماتي واقاربنا ..وتعرفهن وحده وحده...
فبدأ البحث على نطاق شامل او واسع..
من البدايه كتلها اقارب ماريد ... لان الگرايب من تجي للبيت بعد لايبقى عدنه سر محفوظ ولا شغله مضمومه ..وهي مجربه
وجوارين هم ماريد لان كلهن اعرفهن والزينات البيهن اتزوجن ..والباقيات لو جكمات لو امهاتهن وكحه .
اريد من بعيد ...
اللي صار انه امي المريضه المابيها حيل كامت تطلع من الصبح ترجع بالليل... سياره تاخذها وسياره تجيبها...ويه صديقاتها او ولدهن اوبناتهن.. وبيوم الماتطلع ..تشتغل التليفونات والرسائل..
وكل شويه تجي تراويني شوف هاي يمه ..صديقة اختك رشا...وهاي بنت اخت صديقة خالتك ام احمد ..وهاي بنت اخت صديقة اخت فلانه...
واني اگولها ..هاي سمره وهاي سمينه وهاي قصيره وهاي هيج وهاي هيج ...
وبقينا على هالموضوع اكثر من اسبوعين ...
خبلتني ..حتى اذا نايم تكعدني تعال شوف فلانه هسه دزولي صورتها...
واخيرا گدرت صديقتها ام محمد تقنعها على على وحده معارفهم ..وگالتلها بنيه حبابه واهلها ناس معروفين وخريجه و..و..و..
وظلت امي تقنع بيه خلي نروح نشوفها شخسرانين ..؟
وهم استسلمت ورحت ..
كان استقبال الناس حلو ..ومبينين عائله محترمه ..
وانتظرت اشوف العروس .. واني كلي تفاؤل انه اخلص من هالموضوع..
وره دقايق جتي العروس ..وبما انه اني جنت خجلان ومو خبره ..منزل عيني واستحي اباوع ..الى ان وصلت يمي وقدمتلي العصير شلت عيني ....
ويابوووووووويه عالصار بيه
لك هاي شنو ... ؟
اخذت گلاص العصير ولو عليه انهزم بنفس اللحظه ..
شدعي عليج ام محمد خليتيني بهالموقف ... اووووف
هاي مو بنيه ... استغفر الله ..هاي ولد شاب حتى شوارب عدهه..
باوعت على امي .. وامي وجها ينطي الوان ...
دقايق وطلعنا .. واول ماصعدنا بالسياره اني استلمت ام محمد على محلوه ومابيها انوثه ..وام ومحمد تگولي الجمال مو مهم ..اهم شي التربيه والعائله..
اني كتلها خاله الله عليج هاي لو الابنج تخطبيها ؟
هي سكتت ... وعرفت نفسها غلطانه .
والظاهر الجماعه دافعيلها..
وامي ساكته منطقت ولا حرف ..
الظاهر الصدمه سطرتها سطر وخلتها ساكته ..
ويستمر البحث عن العروس 😊
بقلمي
شيرين الصفار
