قصة
#العروس
ج 8
تأكدت انه الاختيار بالزواج شغله صعبه ومهمه ...وانه البدايه ممكن تحدد النهايه دائما.. لان الزواج شركه طويلة الامد مو شغلة يوم او شهر ... هذا عمر كامل ... والدنيا تتقلب بينا .. واللي تعيش ويايه لازم تتقبل وتتحمل وتخلي ايدها بيدي وتعيني عليها..
واني هم بدوري لازم احافظ عليها واحبها واحترمها ..لان بنات الناس امانه بيدنه... وهي هم اهلها تعبو عليها وربوها ويخافون عليها مثل ميخافون على نفسهم ..
يعني مثل مااشوف راحة خواتي مهمه عند ازواجهن ... البنت اللي راح اتزوجها هم لازم اوفرلها حياة كريمه وعيشه طيبه واهتم بيها وماقصر وياهه..
وكل اللي رحت وخطبتهن ماكانن بالمستوى المطلوب ... بقن ابالي البنات اللي شفتهن يم ابو الكباب..
وعرفنا انه بيتهن يم بيت الناس اللي رحنالهم اخر مره..
اتفقت ويه امي انه تسال عليهن وتشوف بلكي وحده منهن تصير قسمتي..
امي كالت انه هي راح تروح بنفسها البيتهم وتتعرف عليهم ... وكالت انه هي شايفتهن سابقا بس ماعدها معلومات عنهن
واتفقت ويه رشا اختي يروحولهم بدون موعد اول مره حتى يتعرفون عليهن... واذا شافو الامور مثل منريد نكمل الموضوع بعدين
وصلت امي ورشا البيت البنات..
ورجعت للبيت وبقيت القروده يمي ... وصدك قروده ماخلو شي بالبيت بمكانه ... واني تخبلت ..الزم واحد ينهزم الثاني ..ارجع غرض المكانه الكي اللاخ طاير ...لكم انتو اطفال لو شياطين ؟
نص ساعه ودكت عليه رشا
رحت عليهم ... واول ماصعدن بالسياره كتلهم
- ها... حمامه غراب ؟
امي ردت
- يمه البنات وحده متزوجه وجانت جايه خطار الاهلها بيوم الشفتها..والثانيه مخطوبه
اني راسا حسيت بنفسي ضجت بس شسوي كلها قسمه ...وخيرها بغيرها مثل ميگولون
كتلها الامي
- الله يسعدهن وخيرها بغيرها ...
امي جانت متعجبه عليهم..كالت خوش ناس مبينين والبنيه كلش حبابه شافتهه..ورشا هم مدحت بيها ..
المهم ... كان البحث جاري ومستمر ...
وفد يوم بالدوام جنت... وحده زميلتي صار حديث بيناتنه عن الزواج وكتلها والله اني داادور على بنيه ...سالتني على مواصفاتها اللي اريدها...من كتلها ..كالت هاهيه لكيتها الك ...كتلها ياالله وينها يمعوده...كالت باجر ارجعلك خبر..
اني محجيت كدام امي ..لان امي عايشه بغير وادي ...مستمره الاتصالات والفرفره ...وماريد اقطع سلسلة ابحاثها خطيه مخليها بواهسها...
وانتظرت ثاني يوم وجتي زميلتي اللي بالشغل مبينه بوجها بشاره
- ياالله ..ها بشري خيتي ؟
- اي والله ابشرك
- ياالله
- البنيه صديقتي ..اعرفها اصل وفصل واخلاق ..بس هي متقبل باي واحد يتقدملها مثلك ... تريد انسان هم بي مواصفات معينه
- اي طبعا شي اكيد
- فاني حجيتلها عنك .. وهي مبدئيا وافقت وكالت اشوفه واحجي وياه واقرر
- خوش حجي ...بس اكو صوره الها ؟ شنو مواصفاتها ؟ لازم معلومات اوليه
- اي طبعا كلشي اكو
وراسا فتحت موبايلها وطلعتلي صورها هي وياهه ... البنيه مو قاصره حلوه كلش ومرتبه..
وكالتلي انه هي مكمله معهد اداره ... وموظفه ايضا..اهلها كمستوى مرتبين ..
وكالتلي هي هم تريد تشوف صورتك اول ...دزيتلها وحده من صوري وكالتلي بالليل ارجعلك خبر
بالليل اتصلت عليه..كالت باجر وره الظهر بعد الدوام نلتقي بكافتيريا وتتشاوفون ويصير خير ان شاءالله..
طبعا لهنا واني كلشي مگايل للحجيه عن الموضوع كلت كلشي يصير ماريدها تنقهر..
ثاني بعد الدوام ... اتفقنا نروح كافتيريا ..طلعت اني وعلا زميلتي
رحنا عليها ..المكان كان قريب
دخلنا گعدنا هي بعدها مجايه..
خلال ربع ساعه وصلت ..
اول مادخلت شفتها الهيئه والشكل حلو ..
جتي وصلت يمنه ..سلمت ..
استقبلتها طبعا ...
مبينه مرتبه وحبابه ومثقفه من اسلوبها وكعدتها وشكلها...
عرفتنا علا على بعض
وكعدنا بقينه نسولف ..
شويه ودك تليفونها ... سدته
رجع دك ..جاوبت
- اهلا ..هسه مشغوله شويه واتصل
استمرينه بالكلام ..وانتبهت موبايلهه كل شويه يدك وتسده ..
كلت اكيد تسده لان احنا جايين نتفاهم ونتعرف مو معقوله تكعد ترد عالتليفونات..
وره ماتعرفنه ع بعضنه
كالتلي
- شوف..اني اريد انسان يفهمني وينطيني حريتي ومايقيدني باي شي
- مافهمت شنو يعني ؟
- اول شرط حتى اوافق عليك انه اكعد بيت وحدي ...
- اني ماعندي احد بس امي
- هههههههه بس اني اريد وحدي ...
امك اكيد عدهه غيرك تكعد وياه
- لا ماعدهه بس اني
- اها ... اذن هاي اول مشكله
- ليش انت ماعندج ام ؟
- عندي طبعا ... بس خو ماالزك بيها طول العمر ..
- لا والله اني امي لازك بيها طول العمر وماعوفهه حتى لو عدهه عشره غيري ... النسوان هوايه بس الام وحده
اني عصبت من كلامها وضجت منها ..
هي ردت عليه
- اوك .. عود نتفق بعدين ..شرطي الثاني حريتي الشخصيه ..اطلع ارجع ويه صديقاتي ..اسافر ... اتونس متمنعني
اني استغربت كلامها وحسيتها كلش منفتحه ومتحرره جاوبتها
- عزيزتي احنا عايشين بالعراق مو اوربا ... شنو اسافر واطلع براحتي؟
- والله مبين عليك متخلف ...دقه قديمه
- اها..يعني من احافظ على زوجتي واصونها واخاف عليها هذا تخلف بنظرج ؟ واني اشوف اللي دتحجين عنه انفتاح وتحرر احنا بعيدين عنه كل البعد
وظلينه نتناقش واني كلش ضجت مبينه افكارها وعقلها عايشه بغير عالم
شويه وطلعت جگاره
هاي شنو ؟ ..جكاره واتدخن واحنا بمكان عام
ياسلام ..
شويه ودگت امي عليه تسالني ليش تاخرت ؟
هي من يمها كامت تضحك ... وتستهزيء ..
- هاي شنو الماما تسالك وين ؟... ليش انت طفل وضايع وادور عليك
اني لهنا تحملتها وبعد مااتحمل ..
كتلها
- اي هاي الماما اللي شيلتها تسوه الف متحرره وبايعه تقاليدها ودينها على اساس هي مثقفه ومتطوره..
عمي بطلوهن سوالفجن هاي
راسا علا كالتلي
- يمعود شبيك صلي عالنبي
هي وجها ينطي الوان وتكولهه العلا
- هو هذا العريس المتخلف الجايبته الي ... لو يبقى بس هذا رجال بالدنيا مااعترف بي
اني صفنت عليهه ..هسه اذا اطيح حظها منو يگولي ليش ؟
وانتهت الكعده بجدال ..وتندمت لان دزيتلها على غده وعصير ..حرامات بيها والله ..لو شاوي بيها كيلو كباب وماكله اني والحجيه هوايه احسن
هي راحت ويه علا
واني ظليت صافن على هالدنيا شنو بيها من مصايب وبلاوي
وطبعا ماحجيت الامي ماردت اضوجها
بس امي خطيه صارت اكثر نشاط بالبحث والتقصي ...
وخلي نشوف وين نوصل
ولا زال البحث جاري ☺️
شيرين الصفار
