قصة
#العروس
ج 9
عرفت بمرور الوقت انه شغلة زواجي تعقدت ..وانه حظي مبين ...ماعندي حظ ... وبديت أأيس من انه الگي بنت الحلال اللي اريدها ..يعني اني ماطلبت وحده خارقه بكلشي ..وانما انسانه طبيعيه ..بس ليش هيج حظي ماادري ؟
امي استمرت بالبحث ..
فد يوم العصر اندكت الباب..
طلعت لكيت وحده من صديقات امي جايه عليها ..
فتحت الباب استقبلتها...هي هم ظلت تسلم وتدعيلي وتسالني ..
وطلعتلها امي هم ..
دخلو جوه ... واني اترخصت منها حتى افوت الغرفتي كالتلي
- تعال يمه وين رايح ؟
- ها خاله خير ؟
- تعال شوف شلون عروس لكيتلك
اني ضحكت كتله
- يله خاله كوليلي شلونها العروس ؟!
- تعرف بيت ابو سرمد ؟ هي كرايبهم .. شفتها عدهم ذاك اليوم تخبل ..وسالت ام سرمد كالت بعدها تدرس بالكليه ...وتذكرتك يمه
- اشكرج خاله...بس شعرفتي عنها؟
وظلت تحجيلي .. خوش وطيبين ..وهي حلوه وكذا وكذا
كتلها
- وشلون اشوفها
هي ضحكت والظاهر مرتبه الموضوع ويه الحجيه امي وكالت
- جبتلك الصوره واذا عجبتك نتفق
- اوك ..خوش سالفه
راوتني الصوره ..وفعلا حلوه طلعت
واتفقنا نروحلهم وره يومين
طبعا كالعاده امي اشتغلت اتصالاتها ...وفرقة حسبو صار عدهم علم ..وانعزمو ...
والتحضيرات كملت ..
واجا اليوم المعود
گعدت من الصبح راسي يوجعني ..
تريكت وشربت جاي ..جانت جمعه ..
امي صاحتلي
- تعال يمه هذا بوري الحمام انكسر بيدي ...
فتت لكيته نافوره صاير .. ويه الهوسه دخل ابن رنا اختي وجان يتزحلك ويوكع على راسه
منا المي ..ومنا هذا يبجي وامه كامت تلطم ...انكسر راس ابني ..
ونسكت بيها يمعوده مابي شي ..
وهي كلساع تسوي لا وجهه اصفر ..راح يموت
والنافوره بالحمام
كوه هدأناها ..كتلهم سدو المي من الميزانيه خلي اصلحه
وساعه اشتغل بي الى ان صار
وراسي بعده ثاولني ..
وجهال خواتي كالبين البيت على راسنا ..
صار وقت الغده وصبو وكعدنا ناكل ..
دك التليفون ... فتحته صديقي بالشغل مضروب جلطه وميت
شبعت قهر ..عفت الاكل وكمت
كلت هاي شكو اليوم ياستار ؟
امي كالتلي يمه لاتوهس مرات صدفه تصير وتلتم عالواحد
شويه واجتي فرقة حسبو ... والبيت انكلب بالزايد كلهم يحجون وجهال خوالي وهوستهم
حسيت نفسي اختنكت .
واتفقنا نطلع البيت البنيه
بدلت ملابسي وطلعت وياهم
وكلهم فرحانين بس اني راسي مسطور .. والفرقه كلهم يحجون سوه . يعني غير افتهم شديكولن ...
شلون بله ويه هالحفله اللي على راسي ...
طبعا صديقة امي ويانه والطريق كله تمدح باهل البنيه وتهمبل ...
واني من الدوخه والهوسه وراسي ردت اندعم اكثر من مره
ساعة الگشره ساعة اللي فكرت وقررت اتزوج..
الطريق جان بعيد ..وازدحامات والمسجل مال الحجيات ميسكت مستمر بالسياره ..
وبدون ماحس وكأنه انعميت واشوف رجال على بايسكل كدامي ... منين طلع مااعرف
حاولت الحك الزم بريك
هالمره الصراخ صار بفلس بالسياره كلهن يصرخن
واني من خبصتي ضربته او وكع
مااعرف شصار بيه
واشتغل اليبوووو....كلهن يصيحن يبووووو مات الرجال
مااعرف شلون فتحت باب السياره ونزلت اركض ...
العالم التمت ..والسير انكطع ..والرجال واكع بالكاع ..اريد اشوفه ميت طيب ...
ونزلن امي وخالاتي يلطمن ويصرخن
والناس تركض... اني مااعرف شسوي ..
جيت عليه لكيته فاتح عينه ويتحرك ...ياالله يعني مميت
حجيت ويا كتله
- والله عمو مشفتك خلي اوديك للمستشفى
كال
- لا عمو مابيه شي ... اني مباوعت من دااعبر الشارع انت ماالك ذنب
من شفته هيج وحسيته متاذي اتذكرت ابويه وكعدت ابجي
بقيت ابوس براسه ..
هو كعد على حيله ..الناس جابوله مي غسل وشرب ..والحمد لله اني مجنت امشي بسرعه لان الشارع شويه ازدحام
بس البايسكل مالته تضرر
كتله
- عمو عليه البايسكل مالتك
- كال لا عمي هو قديم راحلك فدوه ..
اهم شي طلع خوش رجال ...
والحمد لله فضت وره مااكلتلي هبطه بكد الدنيا
جيت اصعد بالسياره ..احس الدوخه زادت وجسمي تعب واعصابي تعبت ...
وزادت الهوسه مال الحجيات ..كل وحده تعبر عن مشاعرهه من صار الحادث..
وهاي تكول جسمي كله مات
واللخ تكول كلبي وكف
واللخ تكول يمه ردت اموت
اوووف يالساني هسه بيهن عركه اطلع قهر الدنيا كله وياهن
صعدنا ..اني من اول استداره افتريت داارجع للبيت
كلهن فد صيحه
- هاااااي ويييين ...مو منا الطريق
اني معصب
- كتلهم راح ارجع ماريد زواج الشؤم هذا
وانفتحت المسجلات مالتهن
- ارجع وعيب والناس تنتظرنا وميصير
اني وصلت عندي حدها وجان اصرخ بيهن
- سكتن الخاطر الله مو موتوني ...ماريد زواج ..ساعة السوده ساعة الكلت اتزوج
صارت صنطه ... وسكتن بعد مافتحن حلگهن
وانتهى اليوم المشؤوم بهوسه وهبطه ...
رجعنا للبيت جنت ضايج
بس شفت امي مقهوره ...جيت بستها من راسها وگتلها
- امي ...سدي موضوع الزواج نهائيا ...مااتزوج بعد انسي ..حظي وعرفته ..مابيها مجال بعد
هي ماردت عليه بعد .. بس حسيتها كلش انقهرت
وفعلا سدت الموضوع
وبدت امي بعمليات التبليغ ...لاتدورتدن بعد ابني تعقد بعد ميتزوج
الحمد لله راح ارتاح من هالموضوع ... وبعد محد يجيب طاريه كدامي
وتوقف البحث عن العروس☺️
لكن للقصه بقيه
شيرين الصفار
