قصة
#العروس
ج 7
(تحذير : لبسو كمامات)
هاي البنيه اللي شفتها اخر مره كلش عجبتني ..وتمنيتها تكون نصيبي..بس الخير فيما اختاره الله ..واللي بي خير الله يقدمه
طبعا احلى شي (انه اليأس لايعرف طريقا الى قلب امي ... )
امي مستمره بالبحث عن العروس .. وكل اللي شفناهن جان الي حق ارفضهن لان هذا مو بطر وانما اختيار شريكة عمر والاختيار صعب
مرت اكثر من شهر والبحث لازال جاريا ...
وطبعا اني هم اشتركت بالبحث ...وگلت بلكي اني اشوف بالصدفه وحده تعجبني ..
وبيوم العصر خواتي عدنه ..امي كالتلي
- يمه روح اشويلنه كباب يم ابراهيم الكببجي
- اي صار يمه .
اني بصراحه افرح من يجن خواتي ..صح تصير هوسه بس يتغير روتين البيت وتصير بي روح ..
نكعد نسولف ونضحك ..والقروده مالتهم اهم اتونس وياهم رغم مقالبهم وجلابتهم ..
ورحت دااشوي الكباب ..
واكف يمه انتظر السره ...
طبكت سياره ونزلت منها بنات اثنين سبحان الخالقهن من جمال .
سلمن والكل يتفرجون عليهن ..
ورادن هم كباب شوي وكلوله مستعجلين وخطار يمنه..
وهو مبين يعرفهن ...
كاللهم امشي الجماعه .. لان الكل مستعجلين .. اني صرت شهم گتله
- مشيهن قبلي ابراهيم
هنه بقن واكفات مبينات خوات ويتشابهن ... مرتبات كلش وملابس محتشمه
اني اباوع عليهن من جوه الجوه لان استحي ...
شويه وجتي مره جيرانه
هنه اول مشافتهن سلمت عليهن ...
ولمحتني الي هم سلمت عليه .
مااعرف ليش فرحت ..يمكن حسيت اكدر اعرف معلومات عنهن من هاي المره..
راحن هنه قبلي
واني كملت الكباب ورجعت ..فتت للبيت فرحان
امي شافتني فرحان كالت
- ها يمه فرحان ..لان راح تاكل كباب . اي انت تحبه
- لا يمه ياكباب...لكيتهه
- المن ؟
- العروس
هي ضحكت وكالت
- ياا ...وين لكيتها بالمنقله مال الشوي ؟
- يمه يامنقله ؟...لكيتها بمحل الشوي
- اييييي...احجيلي منو شنو ؟
وخواتي هم فتحن عينهن والتمن عليه ... وكل وحده سؤال
كتلهم الجواب عند ام رائد جيرانه
المهم نطيتهم المعلومات
وبعده الكباب منازل المعدتنا ..امي لبست عبايتها وطارت على ام رائد ..
انتظرنا نص ساعه ...ورجعت امي ..
- ها يمه بشري شنو الاخبار
_ اي يمه ...ذوله عرفتهم ..بيتهم يم المدرسه الثانويه ..بس ام رائد ماعدهه معلومات عنهم ..تكول اشوفهن ويه امهن يجن بالمجالس الحسينيه..ومرات اشوف امهن بالسوگ..
- يعني متعرفون عنهم كلشي ؟
- لا ... بس گلت الام رائد تمرلهن وتگولهن .. واذا ماعدهم مانع نروح الهم ..لان انت البنات شفتهن
- اي ..خوش فكره
وبيومها خطيه امي للساعه 3 منايمه..
بلغت فرقة حسبو ..وفرقة نعمة الله (ذني عماتي ) وفرقة ام علي الغنائيه ... وهم سوتها هوسه علينه
ثاني يوم جتي ام رائد على امي وكالتلها
-المره امهن عرفتكم ..وفرحت من كتلها تكول هلا بيهم خلي يجون
امي الهلهوله بطارف لسانها ...
وركصت و غنت ...گالت
- هاهيه ...هاي قسمتك وانت اختاريتها
- گولي الله كريم يمه
واتصلت امي علىيهم واتفقنا على موعد ...
وبيومها تحضرنا ..وفرقة حسبو هم جتي ..
كلنا فرحانين ...وتوجهنا البيت العروس..
من وصلنه ...طبگت السياره ونزلنه
ظلت امي والفرقه وحتى اني نباوع عالشارع گدام بيتهم ...والباب ..تراب واوراق اشجار ..كتلها
-يمه خاف غلطانه مو بيتهم
- لا يمه ..بيتهم مره سوو ذوله الگبالهم مجلس وجينه وشفتهن ..اني اتذكر
بس المعروف من يجينه خطار انظف الباب اول شي..
المهم دگينه الجرس ..طلع ابوهم اتلگانه ..لابس بجامه غريبه وعجيبه ..
دخلنا جوه...
بس الطرمه كلش وصخه ..شنو الفلم ؟
دخلنه للاستقبال ..اول شي سطرني ..ريحه گبت بوجهي ..ريحة مجاري على ريحة بصل ..وعفونيه
خررررب...شنو هاي ..وين دخلنه احنا ؟
اختنگت رأسا ...ولعبت نفسي ..بس بعد دخلنا
شويه وجتي امها لابسه دشداشه مال بيت .. وشال ..
سلمت وگعدت وظلت تسولف ويه امي
باوعت بالغرفه الكاشي وصخ ..الطبلات كلها مطكعه ..منين ماباوع وصخ ..
ياربي استر ... كلشي ولا النظافه
يعني اخذت فكره عن حظي من البدايه
اووووف ياحظي الحلو ..شوكت تگعد ..بس اني شفتهن مرتبات وسياره نظيفه .. شنو القصه ..؟
شويه ... وجتي البنيه شايله گلاصات بيها عصير ..
باوعت عليهه...امها گالت هاي بنتي اللي ابنكم شافهه
( ياحلاااااوه.....يابنتج ياشايفها ..لاشايفها ولااعرفها والحسين .. )
اتضح انه احنا جايين بالغلط وام رائد الله يستر عليها غلطانه بالعنوان( مو اعرفه...حظي واعرف )
بس لازم نكمل الفلم عيب طبينالهم بعد ...
اجتي تقدم العصير ...وصلت يمي گالت تفضل ....
( يااابوووويه عالصار بيه ... هي كالتلي تفضل تسممت من ريحة حلگها ...اويلي يابه راح ازوع )
مااعرف شصار بيه ...
شدعي عليج ام رائد
وريحه هم بجسمها بعد كيلو متر تشتمها ..شنو هاي مسابحه طول عمرها ؟ اويلي يابه حموت والنبي محمد
فعلا تخربطت ...كلت خلي اخذ فد رشفة عصير بلكي يروح لعبان النفس
واول ماخليت حلگي عالكلاص ..وتطلع بخشمي ريحة زفره مال سمج
احس روحي خبطت ... ودخت من صدك ..اباوع على امي وخالاتي وجوهن متنعرف بعد
خرررب ...راح اتقيأ
مطولنا عشر دقايق ...گتلهم خلي نروح عندي شغله
طلعنا نركض واني روحي لاعبه وخابطه ودخت فد مره ..
وبس صعدت السياره
وگبن عليه امي وخالاتي يصيحن
(انت صدك هذا ذوقك؟ ..متشوف متفتهم ..متشتم ..حظك اسود )
اني متخربط ..
مجاوبت ...مشينا شويه . وهنه يحجن والريحه بعدها ضاربه براسي تخبلت منها
طبكت السياره
ونزلت بمكان فارغ ظليت اتقيأ
نزلن امي وخالاتي
(ويمه شبيك وشصار بيك ..وهاي عين .. )
جابولي مي غسلت ..وصعدت بالسياره ارتاحيت شويه ورجعنا للبيت ...
امي راحت گبل على ام رائد ... وعاتبتها . طلعت المره غلطانه بالعنوان ...وامي هم متندل ..وبيت ذوله البنات الشفتهن بنفس الشارع
المهم بقيت مريض والريحه ماراحت من بالي يومين ..حتى اكل مااكدر اكل ..والنهار كله ارش معطر جو ومالحگ
يعني معقوله بعد اكو هيج وصخات بالدنيا واكو انواع المنظفات والشامبوات والعطور ؟
اعوذ بالله ..وهي الوصخه وصخه ميصيرلها جاره
وهالمره مو بس امي لازمه التليفون وتنشر ... وانما فرقة حسبو كلها ... وكلساع تصفن امي ...وتكول (يمه شگد صار عمري ..هيج وصخ مشايفه
لو المي غالي لو مكطوع شلون يصيرن ذني؟ )
والله ماادري شيصيرن ...بس اكيد نلكي الحشرات تمشي عليهن
وبقن ذني البنات الشفتهن بعقلي ..وكون تصير وحده منهن قسمتي
ادعولي ☺️
شيرين الصفار
