العروس

٣

قصة
#العروس
ج 3

بعد صدمتين متتاليه طلبت من امي انه الاختيار يكون بهدوء ..
يعني لاتباوعون عالشكل بس او العائله بس او ..او ..
كتلها
- اني اريد بنيه بنت ناس متوسطة الجمال وعلى قدر من الثقافه واهم شي متربايه والام خوش مره ..
وانت وصيتيني الف مره قبل متاخذ البنيه شوف الام .. هاي قاعده ثابته تقريبا ..

امي هدأت شويه ... وقللت من الهوسه والاتصالات ..
واني هم ارتاحيت ... لان فعلا تعبت نفسيتي بسبب المواقف الصرت بيها..
ومر شهر تقريبا ...

وبيوم دخلت للبيت ولكيت امي مرتاحه وفرحانه
- ها يمه خير ان شاءالله ...اشوفج مرتاحه كلش اليوم
- اي يمه ..هالمره البنيه كامله مكمله وتاكدنه منها قبل مانكولك
- يابنيه هاي ؟
- اللي نريد نخطبها الك
- رجعنااااااا...خليني ارتاح ياامي
- يمه شتنتظر مو تدري بيه اني تعبت ومريضه و..
واشتغل المقام مره لخ ...اووووف
- يعني من الاخير يمه شنو المطلوب؟
- نشوفها غير
- روحه البيتهم ماروح وكلتها الكم قبل
- زين خلي اراويك صورتها واذا معجبتك منروح
- اوك راويني ..خلي اشوف تاليها وين راح اوكع بيا صخام
وفتحتلي الموبايل مالتها وطلعت صورة البنيه
بصراحه اول مشفتها عجبتني .. وجها كلش حلو ..عيونها..ابتسامتها ...ومحجبه
كتلها الامي
- اي حلوه...بس اريد بعد تفاصيل
- عائله طيبه وناس معروفين ..وابوها مدرس وامها مدرسه ...وهي طالبه ثالث كليه ..
- ياالله ..بلكي فرجت عليج يمه
- فرجت عليه ؟ شنو هاي ؟
- اي والله اني اريد اتزوج حتى تفرج عليج وترتاحين مو مهم اني ..

وظلت هي ادردم عليه واني اضحك
وصار الاتفاق نروح نزورهم ...وهمه تعرفنا عليهم عن طريق جماعه تعرفهم امي
ورحنا...
مااوصفلكم فرحة امي ..وبصراحه اني ارتاح من اشوفها فرحانه وهي تجري اتصالاتها وتبشر ...هههههه
وصلنا البيت العروس ..وفعلا طلعو خوش ناس ...والبنيه هم طلعت وشفتها ومابيها كل نقص .. لا واحلى من اللي ابالي واحسن ..

جمال وادب وحشمه وعائله طيبه..
بس ....
اي ...بس امها ...مبينه مو سهله ..كله تحجي معلك
كلت يله نتجاوز هاي الفقره مادام البنيه زينه..
وبوقتها محجينا بالتفاصيل ..بس تعارف ... وحجي فوكاني..واتفقنا يسالون علينه واحنا هم واذا وافقو يرجعولنه خبر ..
طلعنه منهم مرتاحين .. امي وخالاتي ورنا اختي..
والطريق كله امي مره تهلهل ومره تكولي افتحلي اغنيه خلي نصفك ونحتفل
-يمعوده حجيه بعد كلشي مصار خلي يردولنه خبر اول..
- لا يمه مبينه الناس عجباهم وعجبونه ...وهلا بالعريس وربعه يزفونه ...
وخالاتي وياهه ..لاكولكم ولاتكولولي ..انكلبت السياره الى فرقة حسبو المصريه ..
رجعنه للبيت ... وبدت امي تخطط ..
هيج نشتري وهيج نسوي واني مخليها براحتها وبس اضحك
الى ان رجعولنه خبر اهل العروس..

(تفضلو عيني نتفاهم عالتفاصيل)
وبده النقاش على موضوع التفاصيل
( هلكد مهر وهلكد ذهب والحفله والملابس والصالون والغرفه )

واخيرا ..وبيوم اللي متفقين يرحولهم امي وخالاتي التمت فرقة حسبو وطلعنه حتى اوصلهم وارجع ..
ذبيتهم بالباب ..ورجعت وعلى اساس زوج رنا يرجعهم ..
وكعدت انتظر ..ساعه ..ساعتين ..
شنو شديسوون .. دكيت على امي طبكته ...هاي شكو ؟
وره شويه وسمعت سيارة زوج رنا وكفت وصوت هوسه بالباب ..
شنو عركه هاي ؟
طلعت اركض انفتحت الباب البره..
وطبت الفرقه گالبه هذا على هذا .
شكو يمعودين ؟
دخلن جوه وكعدن .. واشتغلت رحمة الله
كل وحده وجها لون . اصفر واحمر وبنفسجي ...
وكلهن يحجن سوه ..
وبس اسمع كلمة . يطبهم مرض ..قحط بنات
هلا . تبين عالكه ..بيها مرض وقحط ...هاهيه تفلش الزواج
رنا طبت للمطبخ تجيبلهن مي ديبلعن حبوب الضغط ..
رحت وراهه ..
-لج شكو احجي ؟
-تعاركن ويه امها
-ليش ؟
-طلباتها تعجيزيه واستهزأت بخالتي وصارت عركه وحتى غلط صار
-يابوووووويه على الحظ الحلو ...وصلت للغلط

وتفركشت الخطوبه الثالثه
وياريت لو بس متفركشه ...الا امي بقت شهر مخليه التليفون عالشحن وكرسي بصف الشاحنه لان بعد متلحك تشحن التليفون ... ماخلت ...العراق كله سمع بالعركه..

والله ياامي كم مره وصيتيني باوع عالام واخذ البنيه ...تالي ام البنيه هيج سوت بيج ... خلتج تحجين الف كلمه بالثانيه

ويستمر البحث عن عروس ⁦☺️⁩

بقلمي
شيرين الصفار