قصة
#العروس
ج4
بعد الصدمه اللي اكلتها امي وخالاتي والعركه ...وتأثرو بيها كلش ..ظلن اكثر من شهر يسولفن بيهه ..وكل متصير گعده لو لمه يعيدوهه... ومن يتذكروهه يصعد ضغطهن ...
هاي الشغله صارت من يمي لان نسو موضوع العروس شويه وخلوني ارتاح
وشويه شويه انسد موضوع العركه ونسوه ..
ورجعت ريمه العادتها القديمه...وهم اشتغلت رحمة الله على راسي
وبدأت عملية البحث عن عروس جديده...
صدفه جان زواج ابن خالتي..
واكيد احنا نروح بلا عزيمه..
والحفله بقاعه ..واهل العروس كلهم جايين..واقاربنا
ولمه حلوه وفرحانين
الوحيده اللي مجانت حاسه بالفرحه وحايره بزمانها هي امي ..
افترت بالقاعه كلها وتفرجت عالبنات وحده وحده ..
وكلسع تجيني..
-(.تعال اراويك هاي والله حلوه جنهه گمر )
واعصب عليها..اكولها
-( يمه بنات العالم مو فرجه كافي عاد )
وترد تختفي وهم تجي
- ( بس شوف ذيج من بعيد مو تخبل )
اكولهه
- يمه لاتخبل ولاتجنن ماريد اباوع على وحده عيب الناس انتبهت علينه ...
شلون ابتلاء هذا ياربي ...صار بيها مرض
المهم عجبتهه وحده راوتها الي ...من بعيد مشفتها زين بس مبينه زينه ..ولو لبسها مو كلش عجبني ...بس هي گالتلي عادي حفله كل البنات لابسات
وراحت سالت وكدرت توصللها..
طلعت گرايب العروس..
خلال يومين اتصلت بيهم .
طبعا هي خبره بهاي الامور ..
وجابتلي اخبارها ..
بنيه مكمله تجاره وتشتغل بروضه اهليه ..
وسوتها گمره وربيع ..هم عادي طبعا ..
وهم رحنالهم ..
وفرقة حسبو كلها ويانه ..
وبالسياره الطريق كله هم تذكرن بالعركه ...وكلهن يحجن سوه ...واني ليهسه مااعرف شلون وحده تسمع اللخ وهنه كلهن يحجن سوه ..عجيب والله
واني اويييلي يابه راسي راد ينفجر ..كلهن يصيحن براسي...
واخيرا
وصلنالهم ...الحمد لله بس اخلص من الهوسه
واستقبلونا ...وطبعا اني گمت مااستحي واتعامل ويه الموقف بكل جرأه ورحابة صدر .. لان تعودت عالشغله
دخلنا بالاستقبال..
وره شويه جتي العروس ..
شفتهه ..شكلها زين وجسمها حلو وهي لابسه فستان ضيق معجبني ...شعرها طويل وحلو
قدمت عصير وكيك وكعدت ..
امي سالتها
- شلونج يمه ؟
وكانت اول مفاجأه ...صوتها وصواصه وهي تحاول تنعم صوتها ودلع معجبني
جاوبت
-نينه خاله ..( يعني زينه )
واني بگلبي اكولها
(هاي شنو بعد خالتج ..)
امها گالت الافضل هو وياهه يكعدون وحدهم ويسولفون ويتعرفون على بعضهم ...
(يابه بعد احسن )
رحنا كعدنا بالصاله بس اني وياهه ..هي مبينه جريئه مو خجوله ..
وسالتها امور عامه عن دراستها وشغلها وعمرها ..
وتحملت الوصواصه والتمثيل الوقت كله ..
جابولنه عصير وكيك
وهي مدت ايدها ودتشيل كلاص العصير طخ اظفرها بالصينيه وانثلم ..
راسا سمعت صوت غريب
وي وي وي وي وي
شنو هذا ياستار ؟
طلع الصوت صوتها بس بغير نغمه
-شكو شبيج ...؟
-اوووووو اذفري ..(يعني اظفري) ..انكسو ..(يعني انكسر)هاي راح اترجمهن الكم ..
اباوع عيونها تصب دمع
وكعدت اسكت بيها ..
-يمعوده يرجع يطول ..لاتديرين بال ... لاتهتمين هو اظفر گصي وفضيها
وهي تسويلي
- نااااااا...(يعني لااا) ...انت متدري شكد تئبت أليهن اذافري وتولتهن ..
مامد ايتي عل اي شي بالبيت حتى لايخربن ...شلون شسوي ؟(هاي انتو ترجموهه اني تعبت)
واني بحالة صدمه من اللي داشوفه واسمعه واكولها بكلبي( ولج انت شسوين لو اني شسوي الحظي الاسود الجابني عليج)
اووووف ياحظي المصخم ...
المهم خلصت الساعه واني اعزيها واواسيها على اظفرها ...
وطلعت منهم عيوني صايره براسي ...
واول ماسالتني امي بالسياره
-هااا يمه شگلت ..عجبتك ؟
رأسا كمت اصيح ..
- يمه اذا تجيبين طاري الزواج بعد والله انتحر ...عوفيني رحمه الاهلج
وهم كان الصمت سيد الموقف والحمد لله من شافوني معصب الطريق كله لو يتشاورن بيناتهن ويحجن على كيفهن .. لو يسكتن ..الحد مارجعنا للبيت
بقيت وره هاي الخطبه الگشره يومين راسي يوجعني ..
يعني معقوله اكو هيج بنات ؟
زين هاي امها شنو ذنبها النهار كله تشتغل وتخلي بحلكها وهي تخاف على اذافرها قصدي اظافرها ؟
ولو اكيد هي تربيتها وتستاهل هيج يصير بيها...بس والله حرام ..يعني معقوله هاي تروح عند الرجال تصير مره يعتمد عليها بتربيه اطفاله ويسلمها بيته ؟
ليش هيج الناس تغيرت والتربيه تغيرت وين الخلل؟
وكالمعتاد هم امي لازمه التليفون وتحجي الاخبار التازه الخواتهه..وبناتهه وحبايبها..
بس احسن شي هالمره عافتني بحالي وبعد متكولي على زواج
وخلي اشوف راح تسكت لو هم فتره وتبدي بالبحث مره اخرى ☺️☺️
بقلمي
شيرين الصفار
