العروس

٦

قصة
#العروس
ج 6

بعد اللي صار بأمي .. والله نجاها .. فكرت تفكير جدي بموضوع الزواج
وگمت اخاف على امي من تبقى وحدها بالبيت واني اروح للدوام ..
ابقى على اتصال وياهه ..اخاف تتخربط وماكو احد يمها...
ورجعت الاتصالات والبحث عن العروس ..حتى اني وصيت جماعتي واصدقائي وبنات ويايه بالدوام اذا يعرفون بنيه بنت حلال وحبابه حتى اتوكل ..
وهالمره كان الاختيار من طرف صديق الي ..
وگلي
- اكو بنيه ماتتصور شگد حبابه صديقة زوجتي ..ناس مستورين ويخافون الله
- ياالله...هو اني شريد بنيه حبابه تشاركني حياتي وكل واحد من عدنه يعين الثاني على هالدنيا..
بس شلون اشوفها ؟
- اي ادزلك صورتها اليوم ..بس هذي امانه ..شوفها وامسحها
- لااااا ...انت متوصي حريص ..
وصدك لليل دز صورتهه .. ومن شفتها حسيت براحه نفسيه ..وجه رحماني وملائكي سبحان الخالقها...
راويتها الامي كيفت ...
وثاني يوم سألت صديقي عن تفاصيل..گال هي صديقة زوجتي معلمه وياهه بالمدرسه..خوش بنيه بس اهلها منعرف عنهم شي
گتله مادام هي زينه اكيد اعلها هم زينين
واتفقت ويه صديقي انه نزورهم وطبعا تجي زوجته ويانه بعد متفاتح البنيه بالموضوع ونشوف رايها طبعا
وصار الاتفاق نروحلهم يوم خميس العصر . يعني بعد يومين..
واتفقت امي ويه فرقة حسبو تجي ويانه ...هو احنا نكدر بلياهه ؟
بس راح اخلي كطن باذاني هالمره..
واجا الخميس..وجتي الفرقه كلها..
طلعنا من البيت .. وكل وحده منهن تعبر عن مشاعرها واحاسيسها .. وشلون گلبها عالمها هالمره الشغله راح تصير وراح نهلهل ونفرح..
وتعاركن منو التهلهل احلى ..
وصلنا البيت صديقي واخذنا زوجته لان هي صديقتها وتندل بيتهم
وصلنا للبيت .... كان بمنطقه قريبه على بيت صديقي...بيت بسيط
طلعت امها استقبلتنا استقبال حلو ..
دخلنا ..شويه واجا ولد شاب كالت الام هذا ابني الوسطاني ..اخو البنيه
هم گعد ...وره ماسلم ..
بس انتبهت عليه نظراته مااعرف شلونهه ... غلست
شويه وطلعت البنيه
سبحان الله ..تبارك الرحمن ..ملاك..
جمال وحشمه ونزاكه وهدوء...محجبه وذرة مكياج ممخليه بوجها ..
ارتاحلها گلبي راسا ... ياالله تصير من قسمتي ...اول مره بحياتي ادعي هالدعوه
امي وخالاتي فرحن بشوفتها..
وگعدنا نسولف وياهم
كلش طيبين وحبابين.
بس استغربت ابوها ماكان موجود
شويه واجا رجال جبير ...كالت الام هذا جدهم ابو ابوهم ..
امي سالتها
-وين ابوها لعد؟
كالتلها
-والله مريض
كعد جدهم رحب بينه كلش خوش رجال
فعلا ارتاحيت الهم كلش
بقينه تقريبا نص ساعه نحجي ..جابو جاي وكيك ...
اهم شي البنيه جانت مؤدبه وظلت زوجة صديقي تسولف وياهه
تحجي بادب وهادئه ومبينه حبابه كلش
يارب انت اللي تقدم بي الخير..
وهناك وسمعنه صوت هوسه جوه .
عراك ..صياح ..بس كلشي منفتهم..
الام خطيه وجهه كام ينطي الوان ..
ركض ابنها فات جوه يمكن ديسكتهم
اني وامي وخالاتي واحد يباوع بوجه اللاخ ..والبنيه خطيه اباوع على ايدها ترجف..كلش انحرجت وارتبكت وكلش انقهرت عليها

شنو هاي شكو ...شصار عدهم؟
وطبعا نستحي نسال شكو
صار صوت ضرب وتكسر
گامو الام والبنيه يركضن جوه
ظلينه احنا منعرف شنسوي
امي سالت جدهم
-حجي شكو خاف من ورانه؟
گلها
- لا يابه..اخوانها اثنين بيهم تخلف عقلي وابوهم اخرس
ويوميه تعلگ...بعد مخابيل

( اويلي على حظي الاسود  )
امي كامت تضرب على وجهه
وخالاتي فقدن النطق..
طلعت العائله نص متخلفين ونص خرسين خطيه ...وبس هاي البنيه زينه بيناتهم وهذا اخوها الگعد يمنه هم نص ونص
سبحانك ياالهي..
وطلعت زوجة صديقي متعرف كل هاي التفاصيل ..
تگول رحتلهم مرتين ..ومسمعت هيج بس اسمع منها ابوهه اخرس ..
وطلعنا منهم .. شبعانين قهر
اول مره انقهر هيج قهره
لان البنيه تخبل وعجبتني...وانقهرت من شفت هيج مأساة ..عائله كامله ماكلهم المرض
اللي افتهمنا انه الام والاب ولد العم ..وهمه عدهم هيج وراثه بالعائله ..
طول الطريق الكل ساكتين
شنحجي يعني شنگول..
هاي شغله صعبه او وراثيه ...يعني ميه بالميه يطلع واحد لو اكثر من اطفالنه على خوالهم ..
هذا قدرهم وحكمة رب العالمين
(وعسى ان تحبوا شيئا وهو شر لكم )صدق الله العظيم
بقيت كم يوم احس كآبه ومخنوك وتعبان ...

بس هو الزواج قسمه ونصيب

وهم راح يبقى البحث جاري عن العروس ⁦☺️⁩

شيرين الصفار