قصة
#العروس
ج 5
الحمد لله ..فاتت مده والامور هادئه..
وامي ساكته وبعد مفتحت الموضوع .
واني بديت ارتاح نفسيا رغم انه صارت عندي عقده نفسيه من البنات بصراحه..
ورجعت حياتنه طبيعيه ...وخواتي يجن يومين بالاسبوع..والقروده مالتهم گمت اشوفهم غزلان ..
عمي خليني عليهم ويهجمون الدنيا وشيسوون خلي يسوون وراضي ..
ولا ذيج التبجي على اظفرها ... وهاي الزرزور المنقش ..واللخ امها مسترجله وتحجي بس بالملايين ..
خليني مرتاح شلي بهالدوخه..
بس مااعرف ليش گمت احس امي مو على بعضها .. تعبانه لونها مخطوف ...واسالها يوميه
- يمه اوديج للطبيب ..خومابيج شي ؟
تكولي
- لايمه هو الضغط ماذيني ..
جان ضغطها يصعد يوميه وعلى الحبوب والاعشاب وينزل
وهي هم متكعد ..النهار كله تشتغل ..
مره كاعدين نسولف ..كالت راح اسوي جاي ..
راحت للمطبخ واني ملتهي العب بوبجي ...سمعت حس شي وكع وتكسر استكانات..مواعين ..مااعرف ... صحت
- ها يمه خو ماكو شي ؟
ماكو جواب
ركضت للمطبخ لكيت امي واكعه ولا ايد ولا رجل ..
اصيح عليها ..اطش مي على وجها ..وماكو
اني تخبلت .. گلت ماتت مااعرف شسوي ..
كمت ابجي واصيح يمه بس جاوبيني
يمه لاتعوفيني وحدي يمه
بلحظه ..حسيت الدنيا اظلمت بعيني ...اثاري امي هي الدنيا ..وهي الشمس وهي الضوه..
ركضت طلعت من البيت وعلى جوارينه ..
لحكولي امي يمكن ماتت
وركضو الشباب والنسوان ويايه..
وشلناهه وگبل للمستشفى
وخابرت على خواتي
لحكولي امي راحت
فقدت كلش ...مااعرف شسوي
قبل اربع سنين مات ابويه وعافني وبقيت اشهر الحزن موتني
بس امي اذا راحت شلون ؟
من وصلنه للمستشفى..
الاطباء جوي فحصوها ..كالو اغماء عدها قاسو ضغطها عالي ..وطلع سكرها معلك وصاير عدهه اغماء بسبب السكر
يارب احمدك واشكرك ..المهم امي بعدها عايشه ..
وظليت ابجي واشكر الله
جوي خواتي ...وخالاتي
وكم ساعه ..وفتحت امي عيونهه.
وكأنه مو فتحت امي عيونهه ..كأنه روحي رجعت الجسمي والله
ابوس بايدها وراسها
اروحلج فدوه يمه لاتعوفيني بهالدنيا ماعندي غيرج
هي باوعت عليه وجان تگولي
- يمه هاي الممرضه اللي تجي كل شويه حلوه وخوش بنيه ..خلي اخطبها الك
فدييتج اني يمه هههههههه
ميخالف انت بس طلعي وصيري زينه ونروح نخطبها
والحمد لله طلعت من المستشفى ...بخير وسلامه
بس خواتي معافوهه كل يوم تجي وحده يمها ..واني اقيسلها الضغط والسكر باستمرار الى ان استعدلت وصحت والحمد لله
بس كمت اخاف عليها من التعب والطلعه ومن كلشي..
وهسه بديت افكر بكلام امي من تكولي انت منو الك ..اريدك تتزوج وتستقر ويصيرون عندك جهال ..
صح الزواج استقرار ..بس غير كون البنيه التعجبني
وهالمره ..قررت اتزوج ...
رحت على امي وكتلها
- يله يمه بلشي بالبحث من جديد
هي طارت من الفرح
گالت
- اي ابني هيج اريدك
وبدينه بالبحث مره اخرى ☺️
شيرين الصفار
