قصة
#العروس
ج2
طبعا اني اكره هيج مواقف ..ومن جنت اسمع واحد يروح يشوف بنيه ويرفضها اظل بداخلي انتقده واكول حرام يجرح مشاعرها..
وصرت بنفس الموقف..
رجعت للبيت ضايج ومعصب ..
وظليت ادردم واحجي على ام محمد وعلى امي لان حرجوني..
وامي طبعا ساكته وتحاول تبرر..
طبيت غرفتي ..
وسمعتها تحجي بصوت ناصي بالتليفون ويه اختي رنا ...وتكولهه
- لج يمه حتى شوارب عدهه...عبالك مزينتهه بموس..
اني خربت ضحك ...وانقهرت عالبنيه ..يعني هي خلقة الله شسوي النفسها خطيه
بعدين اتفقت ويه امي ..كتلها
- يمه زواج بهالطريقه ماريد بعد ..لان ماحب اصير بموقف ارفض بنيه واجرحها ..حرام عليه
كالتلي
- هي هاي الخطوبه والناس كلها متعوده على هالشي ...
كتلها
- يمه اني معليه بالناس ..شوفولي طريقه لخ ...
كالت
-صار
واستمر البحث ...
وكل يوم تكولي على وحده ...
اكولهه (روحه البيتهم ماروح انسي ..)
وبقت امي ادور ...
الى ان فد يوم اتصلت بيه رشا اختي وكالتلي
-لكيتلك وحده تخبل . تلوكلك ...
-يابه وين لكيتيها؟ وشلون اشوفها؟
-اني رتبتلك كلشي انت عليك الباقي
-الله يستر
ومرت كم يوم ..وكل مافوت للبيت الكي امي لازمه التليفون وتبشر
لكيناله وحده تخبل ...
واكول ويه نفسي (الحمد لله امي ماعدهه فيس وانستا ... جان صارت اشهر من المشاهير ..واخبارنا توصل الكل القارات ..)
هي من تشوفني تنصي صوتها لو تغير الموضوع
اني اضحك واكولها (كملي يمه كملي ..فضحيني براحتج
خلي اشوف شلون تاليهه)
وره كم يوم خابرتني اختي وكالتلي
- رتبت كلشي
-اي شلون ؟
-اتفقت ويه صديقتي نلتقي بمطعم ..هي بنت خالة صديقتي ...
تجيبها للمطعم ونسوي روحنه التقينا صدفه هناك ...
وانت تشوفها بلا ماتدري ..لابيها احراج ولا مشاكل
- اي هاي خوش طريقه ..موافق
-والموعد الجمعه عالغدا
واجا يوم الجمعه اخذت الحجيه عزمتها عالغده واختي والقروده مالتها ورحنا للمطعم
وامي مستبشره وتخطط ...
وكل شويه ادك عليها وحده من خالاتي..وهي تنطيهم الاحداثيات اول باول ...هسه وصلنا لهنا ..وهسه عبرنا الجسر وهسه ..هيج ..
الى ان وصلنه للمطعم قبل الوقت
دخلنا وصارت كعدتنه من جهة الشارع ..
شويه وصاحت اختي ..
-اي اجني .. ذني هسه نزلن من التكسي
كتلها
- وينها؟
كالت
- هاي اللابسه بنطرون جينز وبدي احمر ..
بس اختي وهي دتحجي حسيتها انصدمت شويه
واني اول مشفتها عيني كامت تسورب
دخيلك ربي هاي شنو ..؟
بعدهن توهن نازلات من التكسي التمت عليهن الجماهير ..
ملونه من فوك ليجوه ..
سترك ياالهي ...باوعت زين ..
صدك كذب ..على كد ماعبرت الشارع الدنيا كلها تفرجت عليها ..
ظليت ساكت ومصدوم ...
واحلى شي امي .. ظلت تتبلعم ومتكدر تعبر عن مشاعرها..ويمكن صار بيها زهايمر ونست الحجي ...وياهو التخابرها تسد التليفون بوجها..
دخلن للمطعم ... وعينك ماتشوف الا النور على گولة اخوانه المصريين.مابقى واحد ماتفرج والتفت عليها
شعر اصفر منفوش... حمرتها احمر صارخ .. العيون عدسات ورموش ..والحواجب والخدود
اما اللبس .. لازك وانتو تعرفون شنو يعني لازك ...
اختي متعرف شسوي بعد
كامت تحجي ويه نفسها ..(صخام بعينج هاي شمسويه بروحهه )
كتلها
-لا والله صخام بعينج انت ...الظاهر متشوفين زين
هاي اذا گعدت يمنه تخزينه وتجيبلنه شبهه والناس تظل تباوع على راسي عبالهم اني عندي گرون ..
بس منعا الاحراج اختي طبعا ..كملنه التمثيليه..واضطريت احط نص راتبي عالغده اللي طلع زقنبوت ... واني گاعد وياهم وكلساع الزم راس ..ها طلعن ؟ لا لا بعدهن بس اذا اطول بعد نص ساعه اكيد يطلعن ( الگرون يعني )
وحاولت انهزم باي طريقه
وسويت روحي عندي شغله وطفرت ... والظاهر هي جايه وتعرف اكو عريس وسوت هيج بروحهه ...
بعض البنات ميدرن الشباب صح يتفرجون على هيج وحده ويمكن يركضون وراهه بس وقت الزواح يردون وحده محتشمه ومحترمه ..
مو القصد طبعا الا محجبه بس كلشي اله اصوله
ورجعنا والطريق كله الصمت كان سيد الموقف ...
بس اللي قهرني امي ..خطيه قفلت تليفونها وكعدت ..
ومن رجعنا للبيت ..
وره ماصحت من الصدمه ..اشتغلت التليفونات وهم اسمعها تحجي بالتليفون تكولهم
- يمه اخترعت من شفتها ... عبالك جايبيها من الملهى ..باقي بس يدكولها وتركص..
هههههههههه والله يايمه راحت ايامجن انتن .. امي جانت دائما تكول ( قبل جانت بس المتزوجه تخلي مكياج من تطلع وبس المتزوجه تحف... هسه بعد ماينعرف رجلها من حماها )...
بس هم المستورات وبنات الاوادم هوايه ولو خليت قلبت
والله يستر على كل بناتنه
ولا يزال البحث عن عروس جاري 😊
بقلمي
شيرين الصفار
