قصة : ( دميتي ) ل سهيلة سعيد المنجي ، فكرة : نور عمر

الحلقة ١ و ٢

قصة : { #دميتي } 🎭

الحلقة الأولى { ١ } 🗝

( جوة ڤيلا ، يعدي شاب من قدام اوضة ، يسمع بنت بتتكلم ف الفون ، يقف )
البنت من جوة : وانت والله واحشني ، هحاول بس موعدكش إن دة يحصل ، بقا صعب حالياً ، ايوة م انت فاهم الوضع 
( برة ، الشاب واقف شياطين الدنيا بتتنطط قدام وشه ، يفتح الباب مرة واحدة بعصبية ، تتخض البنت وتقفل الفون بسرعة )
الشاب وهو بيقرب عليها بعصبية : هاتي !
( ياخد الفون من ايدها بعنف ، تقوم البنت تقف بعيد خايفة ، يلاقيه قفل )
الشاب بزعيق : وحشك هاااا !
( يحدف الفون ف الأرض ويقرب عليها ، تترعب البنت وتجري ع البلكونة )
البنت بخوف : لو قربتلي والله هرمي نفسي !
الشاب بعصبية : مهو دة اخرك تموتي كافرة ، عيشتي رخيصة وهتموتي رخيصة
( تتخض من كلامه ويوجعها ، تقعد ع سور البلكونة وتلف نفسها ع برة ، يتخض الشاب ، تغمض عيونها وتسيب نفسها ، وفجأة ................................. )

*( فلاش باااااااااااك )*

*( شهر 9 )*

( جوة ڤيلا ، ف اوضة ، نايمة بنت ، برة الأوضة )
سليم بزعيق : طب وريني هتعملي الحفلة دي ازاي ي سميرة !
( تصحى البنت ع صوت الزعيق ، تغمض عيونها بضيق وتقوم من ع السرير ، تقرب ع باب الأوضة تفتحه وتقف تبصلهم )
سميرة ب انفعال : انت حتى حفلة عيد ميلادي مش عاوزني اعملهااا !
سليم : المشكلة مش ف الحفلة ، المشكلة ف الناس الزبالة الي بتعزميهم ف بيتي ⁦!
سميرة بغيظ : متقولش ع صحابي كدة ي سليييم !
سليم بتحذير : انا قلت الي عندي ، الناس دي مش هتدخل بيتي ، ⁦فاهمة ؟
( يمشي سليم ، سميرة تبص للبنت )
سميرة بقرف : ابوكي بقا يخنق شبهك
( تمشي سميرة ، تدخل البنت اوضتها تاني وتقفل الباب ، تفتح دولابها وتطلع هدوم ، تلبس بنطلون چينز وسويت شيرت وكوتشي وتمشي ، بعد شوية ، جوة كلية ، شلة شباب واقفين بيهزروا ويضحكوا ونفس البنت قاعدة ف الكافتيريا مراقبة شاب فيهم ، تقرب عليها بنت تانية )
فاطمة وهي بتقعد : افضلي انتي راقبي ف صمت بس ، نفختيني صراحة !
نورا بهدوء ورقة : وايه الي المفروض اعمله غير كدة عشان منفخكيش ي فاطمة هانم !

*( ملحوظة .. نورا بنت جميلة ، شعرها اسود طويل ، بشرتها بيضة ، عيونها دهبي ، ملامحها صغيرة ورقيقة ، جسمها مظبوط وطولها متوسط ، لابسة نضارة نظر ودايماً رابطة شعرها عمر م حد شاف طوله ولبسها دايماً بسيط ومبتحبش الميكب واهم حاجة عندها الدراسة لإنها ذكية جداً ، نورا من عيلة غنية واصلها م الصعيد ، ليها اخت تؤام اسمها مايا ، من بعيد هما شبه بعض لكن لو تقرب تطلع الفرق بين ملامحهم وبين شخصياتهم ، نورا شخصيتها مقفولة جداً وخجولة اما مايا بنت مرحة والناس بتحبها ولبسها ع الموضة وبتحب الخروج ، مامتهم مبيهمهاش حاجة اد الفلوس والخروج وصحابها ، الي مسؤلة عنهم اكتر هي خالتهم لإنها مش متجوزة وقاعدة معاهم ، نورا عندها ١٩ سنة ، فاطمة تبقا صاحبتها الوحيدة )*