قصة : ( دميتي ) ل سهيلة سعيد المنجي ، فكرة : نور عمر

الحلقة ٥ و ٦

قصة : { #دميتي } 🎭

الحلقة الخامسة { ٥ } 🗝

( يعدي الوقت ، ف بيت منصور ، منصور ف اوضته نايم ، وفجأة ، يدخله بنتين بيصرخوا ويتنططوا ع سريره حواليه )
انجي وأية بفرحة : منصوووووور
( يهجموا عليه يحضنوا ويبوسوا فيه )
منصور ب اشتياق : وحشتوني ي كلاب

*( ملحوظه .. انچي وأية اخوات منصور ، انچي ٢٥ سنة ، ع اد زعلها ووجعها من موضوع جوزها بس فرفوشة جداً ودمها خفيف وكل الناس بتحبها ..... أية ١٩ سنة بتدرس ف كلية ألسن ، فيها من صفات انچي بس ع شوية تهور ف شخصيتها ، الأتنين محجبين ولبسهم واسع ومحترم جداً )*

أية بحب : وانت واحشنا اوييييي ⁦
انجي : مقالولناش ليه الجزم دول إنهم رايحين يجيبوك م الصبح ، كنا صحينا ورحنا معاهم
منصور : محبوش يتعبوكم 
أية : تعب ايه بس !
منصور : المهم انتوا عاملين ايه ؟
انجي : احنا تمام ، قلنا انت الي عامل اي برة لوحدك كدة ؟!
منصور : وحش من غيركم 
انجي وهي بتبوسه من خده : حبيبييي
( يحضنها ، يدخله الشباب )
ساجد : صحتوه برضوا !
انجي : واحشنا ي اخي
اسر : يعني هو هيطير ، م خلاص بقا هنا ع طول
أية بغيظ : وانت ايه الي مزعلك هو اخوك لوحدك ، مش كفاية جيبتوه من غيرنا !
اسر : وهو يعني كان مستنيكي انتي ي معفنة الي تجبيه
أية : انا معفنة ي ارخم خلق الله انت !
اسر : انتي .....................
منصور وهو باصصلهم ب ابتسامة : الله !
( ينتبهوا لوجوده ، يسكتوا )
أية : اسفة !
منصور وهو بيقوم : يلا اخلعوا خلوني افوق
الكل : ماشي
( لسة هيمشوا ..................... )
منصور : انچي
انجي : نعم ؟
منصور : استنيني تحت ، دقتين ونازلك
انجي بخضة : اوك !
( يعدي الوقت ، منصور قاعد مع انچي )
انجي : مكانش في اي مشكلة بينا وتمام انت عارف
منصور : اة
انجي : بس فجأة حسيت كأن كل حاجة اتغيرت ١٨٠ درجة ، مش دة خالد الي اعرفه دة !
منصور : كل حاجة زي ايه ؟
انجي : معاملته ليا ، دايماً بيتلككلي ع حاجات تافهة وبيحصل عليها مشكلة كبيرة ، حاجات تافهه جداً ، والاقيه مد ايده عليا كمان !
( تنزل دموعها )
انجي : بقا بينتقد اسلوبي وطريقتي ، جه ف بالي إن كل دة ميحصلش إلا لو في حد تاني ف حياته وبدأ يقارن بينا ، راقبته وقتها لحد م شوفته معاها ، فجأة كل حاجة اتهدت ، حبي ليه ، بيتي ، حياتي ، كله اتهد ع دماغي !
( يقوم منصور يمسك ايدها ويطبطب عليها )
منصور بحزن : اهدي طيب
انجي بعياط : لما شافني انا كنت مصدومة متكلمتش ولا اتحركت من مكاني ، جسمي كله نمل وتلج ، حسيت كأني اتشليت ، هو خدني بكل هدوء وروحنا والبيت ، اول م بدأ يتكلم حسيت إني عاوزة اقوم اقتله ، مش طايقة صوته ، قالي اسف ، وكأني كنت مستنية الكلمة دي عشان انفجر واطلع كل الي جوايا ، صرخت ، صرخت كتير وبقيت اضرب فيه واكسر ف البيت ، كنت مدمرة وقتها ، كأني ملبوسة وجاتلي حالة هزيان ، معرفش يسيطر عليا نهائي ، لا ع لساني ف شتيمته ولا ع ضربي فيه ، مدتوش فرصة ل اي كلمة تانية من بعد كلمة اسف ، لإني حسيتها قليلة اوي قصاد احساسي وقتها ، لقيته فجأة ضربني ، قعد يضرب فيا عشان اسكت ، وانا كنت بزيد مش بسكت ، بعدها محستش بنفسي غير وانا ف المستشفى !
( يزيد عياطها )
منصور : وربي ل اجيبلك حقك
انجي : ازاي ، دة حتى مش عاوز يطلقني ، وقضية الطلاق شكلها هتاخد وقت طويل !
منصور : هقولك هنعمل ايه
( تاني يوم ، ف نادي ، جوة الچيم ، واقف خالد بيتمرن بوكس بكل قوته ، يدخل منصور ، يشوفوه صحابه ، يجروا عليه يرحبوا بيه ويسلموا عليه ، يشوفه خالد ، يوقف تمرين ويبصله )
احمد : ايه ي عم ، مقلتش إنك جيت ليه !
منصور : سيبتهالكم مفاجأة
( منصور يلمح خالد الي باصصله بغل ، يبصله ، يقرب عليه )
احمد بقلق : ربنا يسترها !
مروان : في ايه ؟!
( يقف منصور قصاد خالد ، ينتبه الكل ويقفوا يتفرجوا )
خالد بتريقة : صاحبك وحشك للدرجة ، نزلت م السفر تشوفني !
منصور : م الطيارة عليك ع طول
خالد : عارف إني غالي عندك
منصور : كنت ، ومش اغلى منها ⁦
( يسكت خالد ويفهم إن الموضوع جد ومش تريقة )
خالد : انا .....................
منصور : انت مصونتش ، لا صونت صاحبك ولا صونت اخته ، غرتك شهرتك ونسيت انت كنت ايه مش كدة ، ونسيت انا عملتك ايه ، بسيطة ، افكرك ، وقفت جنبك لحد م بقيت خالد عمران لاعب البوكس المشهور ، حتى اختي معزتهاش عليك ولما كلمتني وافقت ، وافقت عشان تصونها ، مش عشان تهينها !
خالد : هي ....................
منصور بزعيق : اسمعنييي
( يتخض الكل ويسكت خالد )
منصور : ورحمتك ي صاحبي لإنك بالنسبالي دلوقتي ميت ، لهدفعك تمن الي عملته فيها غالي ، ودراعها الي كسرتهولها واستقويت عليها هلبسك بداله بدلة جبس ، وهعرفك معني القوة الي بجد ، بكرة هيكون عندك مُحضر م المحكمة بيبلغك إن اترفع عليك قضية خلع مش طلاق
خالد بخضة : خلع !!
منصور : سلام ، ي صاحبي
( يمشي منصور ، ييجي الليل ، منصور واخواته الولاد قاعدين ف كافيه بس من برة ف الشارع ، يقربوا نورا وشلة من صحابها وباسل ، يقعده ع ترابيزة ، صوت ضحكهم وهزارهم يملى المكان كأنهم قاعدين ف night club مش كافيه ، يلفتوا نظر الشباب )
اسر وهو بيبص ل نورا : مش دي نورا ؟
ساجد وهو بيبص : اة ، هي !
اسر ب اعجاب : يخربيتها كل مادا م بتحلو اكتر !
منصور ب استغراب : هي مين دي ؟!
ساجد : نورا بنت عمك سليم
منصور ب استغراب : بنت عمي سليم قاعدة مع شلة الأو**خ دول ؟!
اسر : دي اقل حاجة عندها ي عم
منصور بخضة : نعم ، انت بتهزر صح ؟!
اسر : لا والله جد
منصور : هي مين فيهم ؟
اسر : الي لابسة بادي نبيتي دي
منصور وهو بيبصلها : ايه المنظر دة ، دي ولا الي طالعة من مجلة !
ساجد : مكانتش كدة والله ، كانت ادب واخلاق ، بس متعرفش ايه الي قلبها مرة واحدة !
منصور بعدم تصديق : ادب واخلاق ايه ، دة مش شكل واحدة عندها ادب واخلاق !
اسر : ي بني هي بقت اعوذ بالله من تصرفاتها خربانة ع الأخر ، هو عمك مات من شوية !
منصور : عمي مات بسببها ؟!
اسر : بيقولوا كدة
منصور : وهو عشان عمي مات تصيع بالمنظر دة !
ساجد : فكك ي عم الله يهديها
منصور : وفين امها من كل دة ؟!
ساجد : امها انيل منها ، مش فالحة غير إنها تهتم بنفسها ، اما بناتها لأ
منصور : وانتوا متصرفتوش ليه ؟!
اسر : نعمل ايه يعني ؟!
منصور بعصبية : تكسروا رقبتها
اسر : انسى دي محدش بيقدر يحكم عليها
منصور : يعني ايه محدش بيقدر يحكم عليها ، ملهاش كبير يعني !
ساجد : ي بني فكك بقا احنا مالنا
منصور بزعيق : بطل ام الكلمة دي ، يعني ايه فكك ، شايفين لحمكم عريان قدامكم وتقولي فكك !
( يقوم منصور ويشوط الكرسي وراه ، يتخضوا اخواته ويقوموا يقفوا ، يقرب ع نورا )
منصور : قومي
( تبصله نورا ب استغراب )
نورا : نعم ؟!
منصور بنفاذ صبر : قوووومي
( يقف باسل قصاده )
باسل : انت تعرفها عشان تتكلم معاها كدة ؟!
( منصور من غير م يبصله يزقه يقعده ع الكرسي تاني ويشد نورا من دراعها من وسطيهم )
نورا بخضة : ايه دة انت اتجننت ، اوعاا !!
( يقوم باسل يشدها منه ويضربه بالبوكس ف وشه )
اسر بخضة : ينهار اسود !