الحلقة 15
#شغفي_انت
وجهة نظر غيداء :-
غيداء مرتاحة بالهدوء النسبي يلي صاير في الحوش و هي بعيدة على دوشة آلاء يلي تحولت انسانة تانية في اقل من 24 ساعة غيداء فكرت معقولة عريس يمكن يغير نفسية بنت و يخليها مسالمة و تفكر في نفسها بس ؟ لو آلاء كان جايها بعلاقة شن كانت حدير .
بوها عطلوا الرجالة عنده و غيداء ملت من تخطيف آلاء بين الصالون و الكوجينة غيداء طيبتلهم القهوة و حطت الحلويات و امها مقعمزة قدامها تشوف لـ آلاء غيداء مكانتش تعرف انها طيبت قهوة عريس اختها يلي تحبه بإيدها و تت الحلاوات باش يتقدمو لـ ايمن ، صبت العصير و ضمت الصالون لـ ايمن كانو قراب على بعض مايفصلهمش الا حاجة اقل مِن بسيطة
غيداء قعدت تفكر لو انها كانت توتي لـ ايمن لما هو يخطب فيها كيف بتكون فرحتها .
بس ايمن كان زي الأطرش في الزفّة يقول ايه لفتحي و ايه لعصام و يرضي في الطرفين و غيداء كانت سبب كل ايه قالها .
روح ايمن و عصام و فتحي قريب يطير ارتاح مسؤولية و تفكا منها و في نفس الوقت فرحان بأيمن .
عصام كان مستعجل و خايف ولد يغيره بمأنه مايقدرش يغيره لانه كلمة عصام كلمة بس هو يحاول اتفق مع سعاد انها تمشي تخطب السبت و في نفس الوقت تكون النظرة الشرعية .
اما ايناس لما سمعت بخوها فرحت لانها تحب آلاء و آلاء تساير فيها على القرمة و التفتفيت و في نفس الوقت يشبهو بعض بس الفرق أنه ايناس حنينة على خوتها و تحبهم .
اما احمد الضايع كيف روح و سمع بموضوع اخته و فرح و بمأنه اخته تتحشم من بوها هو حيكون موجود في النظرة الشرعية احمد مستحيل يمشي مكان و مايذكرش حاجة بسيطة لغيداء رغم و عارته الا انه يحب اخته الصغيرة و مايرضا فيها شيء .
غيداء فرحت بجية احمد لانه اقل شي توسع خاطره معاه و تهدرز كانت حياتها بعد مانخطبت آلاء مستقرة لانه الاء مخيلتها في حالها و بوها يخطط الفضانية و امها كالعادة لا تهش لا تنش .
مر باقي الأسبوع على خير و اليوم يوم السبت يلي يستنو فيه الاء و فاطمة و فتحي بفارغ الصبر فاطمة ماخلت ماخدت و فتحي ما خلا ما جاب يبو على شيء في مكانه مافيش حاجة ناقصة
أما ايمن كان يوتي في روحه باش يشوف الاء مكانش بادل جهده في لبسته أو شيء بحكم أنه متخايل نفسه بيشوف غيداء أو يلي صاير كله مش حق .
غيداء كانت توتي معاهم و خشت لدارها تقرا لانه اليوم يلي بعده اول يوم لإمتحاناتها اول ما فتحت كتابها قعدت تبكي خاطرها تكلم ايمن و تسمع صوته قبل امتحانها تبي شخص يدعمها و هو في داخله يحبها مش اَي كلام .
قعدت تسمع صوت ناس عرفت انه خطابة اختها جو و هي تدعي ان شاءالله يصير منهم لانها تبي ترتاح غيداء بطبعها ماتحبش تطلع للناس مش يا بال خطابة لكن بتوتي نفسها باش تطلع في التقديم
