الويكا (3)
بقلم .. القطة الشريرة
ماما.. نوضي عاونيني عرس خوك ماقعد عليه شي وانتي حاطة ايدك ع خدك وخلاص
انا.. فوتيني ياماما ماعندي نية نتحرك
ماما.. توا يجي خوك يتفاهم معاك
انا.. الواحد ف شني وهما ف شني لكن خلي نوض نلهي روحي نحس ف روحي بنهبل من التفكير
ماما.. كانك زي البنات راهو المخزن مش هكي صاير فيه الطناجر ف كل مكان والماكينات كل وحدة ف جيها
انا.. بالله حادفينه ف الجنان وتبيني نطلع ف الليل ونقعد نحط ف الطناجر ف مكانهم عارفتني نخاف
ماما.. انتي تخوفي تخوفي مش تخافي
انا.. ضميه بروحك ولانادي بنتك وحفيداتك ومرات ولدك وطلعت وخليتها
ماما.. ياشماتي وخلاص
انا.. والله حتى الواحد بيدير الخير مايخلوه وخديت تلفوني حي وصلتني رسالة وفتحتها
السلام عليكم
انا صديق محمد الويكا اكيد تعرفيني مهند نبي نقولك ان محمد دار حادت ومات اليوم ليه 4أيام ميت أطلبيله الرحمة
انا.. خلاص بنموت ودموعي يتقاطرو مش مصدقة الى قاعدة نقرا فيه كيف محمد يموت ويسيبني لامستحيل يسيبني وقعدت نبكي بالعبرة ونتصل بيه بس ماردش عليا
فاتو الأيامات وانا نبكي وحالتي حالة ومش حاسة بطعمه الفرحة ولا هامني عرس خويا
سيدرا.. خالتي خيرك تبكي
انا.. مانبكي عيوني يوجعو فيا
ميار.. خلاص حتى الصغار لاحظوك اطلعي من جو الحزن ادعيله بالرحمه
انا.. مش قادرة والله مش قادرة نصدق انه مات
ميار.. سلم وخيتي أمسحي دموعك خلاص وإدعيله لازم توا توقفي مع خوك والله شايل همك وخايف عليك
انا .. انا نحاول عشانه بس
ميار .. نوضي دوشي وغيري دبشك وأطلعي من الجو هذا
انا .. هزيت براسي تمام
ميار.. سلمها الحلوة
انا.. طلعت وكان الحوش زاحم شوي الجيران والعيلة
ماما.. قعدت تزغرط
انا.. قعدت نتبسم ونجامل وقلبي محروق من الداخل
بابا .. غيث برا نادي خالتك توتو
غيث ..خالتي يبيك جدي
انا.. توا نجي قوله ونضت مشيتله
بابا.. تي وينك انتي يابنت ستاحشتك
انا.. قاعدة يابابا
بابا.. بري وتي روحك بنمشو لطرابلس
أنت تقرأ
الويكا 🔥 ( روايات ليبية )
Romansaللكاتبة : القطة الشريرة تعتبر من اجمل الروايات العاطفية الليبية تدور الاحدات حول علاقة حب بين طرفين فما نهاية هذا الحب ❓
