الويكا
(17)
بقلم.. القطة الشريرة
مازن.. بدا يضرب فيا ليش ماتبيش نقربك ليش
انا.. بديت نعيط وندف فيه لعند طلعت من الدار
الويكا.. كيف خاش للحوش وسمع العياط
سارة وناجي جو يجرو
الويكا.. شافني قاعدة ع الارض ومازن يضرب فيا وظلمت قدامه ودف مازن وضربه ع وجهه
ناجي.. وسعو بالكم ياولاد
مازن.. دف الويكا انت شن دخلك بيني وبين مرتي
الويكا.. وانت من باش تمد ايدك عليها
مازن.. انا زوجها وهدي مرتي نقتلها حتى القتل ماعندكش علاقة
سارة.. رفعتني من عن الارض ودخلتني للصالة
ناجي.. وقف بين ولاده الى كانو بيتقاتلو اي كلمه زيادة منك انت وياه اقسم بالله نغضب عليكم ليوم الدين
انا .. نبكي وحالتي حالة
سارة.. خلاص يابنتي وتمسحلي ف الدم الى نازل من فمي شن صار بينكم ليش ضربك
انا.. نبكي والله مادرتله حاجة بروحه قعد يضرب فيا
ناجي.. ألحقوني للصالة وجو قعدو جنبنا
الويكا.. كان ضاغط ع سنونه ويحك فيهم ع بعض لعند صوتهم كان واصلني كان مقهور لإنه عاجر يشوف فيا نبكي ومش قادر يمسح دموعي يشوف ف الدم يصب ومش قادر يدير شي
ناجي.. أهدي يابنتي خلاص
انا.. نبي نرجع لحوشنا نبي أمي وبابا
ناجي.. عاجبك هكي عاجبك الى درته يعني راجل توا انت لما درت هكي
مازن.. مرتي وندير فيها الى نبيه
ناجي.. ضم فمك مرتك هكي تعاملها بوها عطهالك امانه باش تحافظ عليها تمشي تضربها
مازن.. حتى هيا مقصرة
ناجي.. انت خيرك مولي هكي بتكلب من امتى عندك الحركات هدي
مازن.. خاف أهله ينقلبو عليه ويساندو تازيري اسف يابوي
ناجي.. تأسف للبنت الى ضربتها
مازن.. اسف تازيري والله لحظة غضب والله يلعن الشيطان وساعته وتأسف للويكا
انا.. نبكي نبي نرجع لحوشنا
ناجي.. حاضر ليك وعد مني نرفعك انا ونوصلك لكن خلي يدفى الجو شويا الصقع متع الجبل يخوف باهي يابنتي
انا.. نمسح ف دموعي باهي
الويكا.. ناض وخش لداره وقعد يخبط ف راسه ف الحيط كله مني كله مني كله مني
هديل .. تراسل ف مازن ع النت لكن مايردش عليها غبي يامازن غبي
ناجي.. هيا نوضي سلم بنتي ارقدي ورتاحي
انا.. نشوف لسارة
سارة.. مازن امشي ارقد ف المربوعه وانا نرقد معاها
ناجي.. لاترقدي معاها لاشي خليها تتصالح مع راجلها خود مرتك وبرا
مازن.. تمام يابوي
سارة.. نوضي سلم بنتي ساعدي روحك بشويا عليك
انا.. نبكي ونرعش خشيت للدار
مازن.. سكر الباب وقرب مني أسف والله أسف عصبت ع الفاضي والله مش قصدي
انا.. هذا كله ومش قصدك
مازن..ساعة غضب والى تبيه أنا فيه تبي تضربيني أضربي كان هالشي يرضيك
انا .. ماتربيتش هكي انا
مازن.. عارفك بنت أصول هذا ليش حبيتك انا وحاول يحط ايديه ع وجهي
انا.. بعدت عنه لو سمحت ماتقربنيش
مازن.. تمام براحتك ارقدي ورتاحي
الويكا.. انا قاعد نتعذب مش قادر نتحمل حد غيري يلمسها ولايقرب منها وف نفس الوقت مش قادر نتصرف لازم ندير حل وبسرعه
مازن.. شوفتك ياويكا اليوم وانت عاجز فرحتني هلبااااا بس مزال ماشفت شي
ف الصبح
نضت دوشت ولبست قفطان زيتوني فيه حزام وشعري درته ديل حصان
مازن.. انا طالع توا نجي
انا.. بدون ولاكلمه
سارة.. وين ماشي بنفطرو
مازن.. مش معطل
سارة.. خلي نجيب زيت الزيتون من المخزن
انا.. نقطع ف الخبزه
الويكا.. صباح الخير
انا.. بدون مانشوف فيه صباح النور
الويكا.. كيف حالك اليوم
انا.. الحمد لله بخير
الويكا.. ااا
انا.. بنطلب منك طلب بما ان نحنا ضحينا بحبنا ارجوك حتى كان شفته يدبح فيا ماتتدخلش وياريت تسيطر ع مشاعر وفكر بعقلك مش بقلبك
الويكا.. بس
انا.. انا معايا ربي متخافش عليا ونقدر نحل مشاكلي بروحي
الويكا.. حس من كلامي انى قاعدة نلوم فيه وكأني نحسس فيه ان هوا السبب بس انا قصدي كان واضح كنت نبيه يحس اني قوية ونقدر نعتمد ع نفسي
الويكا.. براحتك وطلع من الحوش عشان الإفتتحاية
سارة.. هذا زياد الى طلع
انا.. ايه
سارة.. هالولد ديما مستعجل ربي يهديه وخلاص
قعمزنا فطرنا وغسلت الماعين
سارة.. بعد العصر نمشو عند مزدة
انا .. ياريت والله
سارة.. خلاص توا يرفعنا مازن
مازن.. كأني سمعت اسمي
سارة.. نبوك ترفعنا حوش خوك بعدين
مازن.. حاضر
سارة.. خلي نمشي نشوف بوك شن يدير البرا
مازن.. تعالي نبيك
انا.. مشيت معاه للدار نعم
مازن.. مدلي بوكس صغير ومغلف هديه اعتدار بسيطة
انا.. شكرآ
مازن.. ماتبيش تفتحيها
انا.. نشوفله وفتحتها كانت سلسلة فيها حرفي وحرفه ووووه ماسد واقفلي ف رقبتي زيادة بنعلقه تاني ياخوفي نموت مشنوقه بيها
مازن.. عجباتك
انا.. حلوا
مازن.. هاتي ف حركه نشوف فيها ف المسلسلات خاطري نجربها وخداها مني ولبسها ليا صح كان خاطري فيها الحركه لكن مش منه هوا
فات اليوم عادي جدآ
مهند.. مبروك ياشريك
الويكا.. خداه بالأحضان الله يبارك فيك
مهند.. خيرك مش فرحان اهو حلمك وتحقق
الويكا.. مش عارف والله فرحتي ناقصة ياصاحبي
مهند.. خليها ع ربك
الويكا.. ان شاء الله خير
مازن.. تي خير امك ياحصله شادتها ف جرتي مكالمات فيديو
هديل.. ليش ماترد عليا +شن صار ف الموضوع
مازن .. تي باهي وانتي بصلتك محروقه وقعد يحكيلها شن صار
هديل.. لحد الان مافي شي ف صالحي انا نبي محمد
مازن .. باهي حاضر محمد هوا ليك
هديل.. توا نشوف
انا.. مازن هياااا الغداء
مازن.. تمام جاي
ناجي.. وين محمد
سارة .. تصلت بيه مقفل لكن عقبناله
انا.. حطيت السفرة وقعمزت بعيد
ناجي.. هيا يابنتي خيرك
انا.. صحتين ياعمي شبعانه
سارة.. معاش عاجبتني ماكلتك يابنتي
انا.. والله ناكل ياعمتي غير مخلية مكان للحلويات الى بناكلهم عند مزدة
الويكا.. السلام عليكم
كلنا وعليكم السلام
ناجي.. بكم الأفانتي عندك ف المعرض
الويكا ومازن .. هههههه شن الكبيدة معاش تمشي امالا
سارة .. هيا ياولد حماتك شكلها تحبك
الويكا.. من قال عايشة
مازن.. لاعايشة وبصحتها مشاء الله شني بدس علينا تحسابنا اغبياء بتفوتها علينا لاياحبيبي كل شي واضح ومعروف وانا توا بنفلق الشكارة لأمك وبوك خليهم يعرفو حقيقة ولدهم المحترم
يتبع ❤❤❤❤❤❤
أنت تقرأ
الويكا 🔥 ( روايات ليبية )
Romansaللكاتبة : القطة الشريرة تعتبر من اجمل الروايات العاطفية الليبية تدور الاحدات حول علاقة حب بين طرفين فما نهاية هذا الحب ❓
