Peripherals

1: Sora

Hanggang sa matapakan ni Archer ang nakatagong patibong ng kalaban, akala ni Sora ay mananalo na siya.

Tiningnan niya muli ang mapa at nasiguro na dadalawa lang si Archer at si Mage sa middle lane. Malamang itinanim ni Mage ang patibong noong nagsisimula pa lang ang laro.

Pinaatras na ni Sora si Archer dahil alam niyang di na niya mahahabol si Mage. Mas malaki ang tiyansang mamatay si Archer kapag ipinilit pa niya ang paghabol dito at baka mapaligiran siya ng mga kalaban.

"Babawian kita mamaya, maghintay ka." Babala ni Sora sa palayong imahe ni Mage.

Pinabalik ni Sora si Archer sa base para makapag-recharge at para ma-upgrade niya ang mga gamit nito.

"Palitan natin ng armor para tumaas ang depensa natin saka ng weapon na rin para mas mataas ang damage." Tumingin si Sora sa camera na nakatapat sa kanya. "Always go back to basics. Pag maganda foundation mo, mahirap kang patumbahin."

Pinapunta na muli ni Sora si Archer sa gitna ng mapa kung saan dinedepensahan ni Healer ang tore mula sa umaatakeng si Cavalier. Pinatago ni Sora si Archer sa mga bush hanggang sa mapunta ito sa likuran ni Cavalier at saka siya umatake.

Mas malakas ang weapons ni Cavalier pero sa tulong ni Healer ay naipanalo ni Archer ang laban. Namatay si Cavalier at sumugod si Archer at Healer sa huling tore ng kalaban na ngayo'y wala nang bantay.

Sa kabilang parte ng mapa ay natalo rin ni Berserker ang kalaban na si Bomber pero agad itong umatras nang sinugod siya ni Mage.

Nang bumagsak na ang tore na inaatake ni Archer at Healer ay umatras muna si Archer para harangan ang umaabanteng si Mage.

"We meet again!" Natutuwang sabi ni Sora nang inatake na ni Archer si Mage at tumigil ito sa paghabol kay Berserker. "Di na kita papatakasin ngayon!"

Sunod sunod na tinira ni Archer si Mage gamit ang special attacks nito at nang magtangkang tumakas si Mage ay nanggigigil na ginamit ni Sora ang ultra attack ni Archer.

Napasigaw si Sora nang namatay si Mage. "SABI KO SAYO BABAWI AKO EH!"

Pinagpatuloy ni Archer at Healer ang pag-abante sa base ng kalaban kung saan inuubos na ni Dancer at Empress ang mga Statue.

Na-revive na si Bomber pero agad na pinagtulungan ito ni Dancer at Empress.

@chamiii303 (Cavalier): GG
@PestoPasta (Bomber): I tried hahaha GG
@huwaw123 (Mage): Hi to all of @ThunderSora's fans hahaha GG

"Oh, hi daw sa inyo sabi ni Huwaw123." Pagbasa ni Sora sa chat ng kalabang si Mage.

Tinulungan ni Archer at Healer si Dancer at Empress sa pagsira ng nalalabing Statue.

@crushkosijenna (Berserker): hintayin niyo akoooo

"Hintayin daw si Berserker kaso ang layo pa niya." Natatawang basa ni Sora sa chat ni Berserker.
Nasa gitna pa ng mapa si Berserker habang malapit nang maubos ang buhay ng Altar. "Jenna, kung nasaan ka man, crush ka daw nitong si Berserker."

Na-revive si Mage pero pinagtulungan siya ni Dancer, Empress, Archer at Healer. Agad itong namatay at pinagpatuloy nilang apat ang pagsira sa Altar. Nakarating na sa base si Berserker at siya ang huling tumira sa Altar bago ito nasira.

"Great game, everybody!" Nakangiting sabi ni Sora sa camera niya. "That wraps up my first game for today with 9 kills, 3 assists and 1 death. Kung gusto niyo pa ako mapanuod, may laro ulit ako mamayang 9:30PM, Philippine Standard Time. I-follow niyo ako dito sa Strimmers, sa Youtube, Twitter at Facebook bilang si ThunderSora. Peace out!"