#الدرج_العالي...
🌷🌹للكاتبه زهور جمال الدين 🌹🌷
❣❣الحلقه الثالثه ❣❣
عمران وافق انه يعطى حنين لحناها...
وخشت ربيعه لحوش بنتها امال ...شن بنحكيلكم ..قريب بطير من البكى ..قريب بتهبل ..مش مصدقه ان بنتها الوحيدة ماتت وان حوشها اتصكر.. و اطبق فى حوايج حنين فى الشنطه واتلم ...
وعمران يا نارى صوته وهوا يبكى فالصالة واصل للدار ...مش طايق فراق بنته ..لكن الله غالب مالبيد حيلة
وهاديكا البنية ادور مابيناتهم الزوزو مافاهمه شى
-غاليه مقعمزة جنب ولدها : ياوليدى مدامك تبكى هكى شد بنتك عندك وانا نعاونك فيها
-خليفه واقف: اييييه علينا عاد يااام بنقعدو نعيدو ونزيدو فى القصه ولا شنو
-غالية: اناخاطرى نعرف يا خليفه منين انت تبى تاخد البنت لولدك ..ومنين مشجع حناها على رفعها..الموضوع فيه حكاية تحيير
-خليفه هدى: يااام لا حكايه ولا شى ..انا خايف على حنين من مرت الاب ..حضن حناها استرلها
-غاليه : استرلها من شنو
-خليفه : قصدى احن عليها خيرك ياااام اتشدى فى الكلمه
-غالية: امالا خيرك ماعطيتش حنين لجدودها ..ولا خايف غير على حنين من مرت الاب ومش خايف على سرور ..
خليفه سكت ومعرفش شن يرد على امه 🤐
وقف عمران من جنبهم وخش لدار حنين ...
-عمران دموعه على خده : ماتعطليش بيها يا خالتى
-ربيعه وقفت وتلفتتله: وراس وليد اختى كل عامين انروح بيها هنايا
-عمران : حوايج امال اللى تبى تاخديه منه خوديه والباقى خليهولى
-ربيعه : ماتواخدنيش ولد اختى ..دبش بنتى بنرفعه ..شنو انت حق ماكش متزوج ..ماتشوفش روحك توة قاعد حزين ومتأثر
-عمران : مستحيل ياخالتى نتزوج بعد امال
-ربيعه: ياعمران ماعليكش لوم ..ونعمه عطاهالنا ربي اسمها النسيان ..وسيورك تنسى وتعمر دارك
وقامت ربيعه هادوكه الحوايج .. صرتهم فى شناطى ودارت بنت بنتها وطلعت ..
موقف يبكى الحجر ..والعيلة كلها تبكى ..والعيلة كلها حايرة فى اللى قاعد يصير وساكتين
وعمران قايم بنته فى غمره ويبوس فيها ويبكى ..والكل صايرة فيهم حالة عليه
وركبت ربيعه مع الطيب وركبت فى حجرها حنين ..وهاديكة البنيه مافاهمه شى قايمه يدها واديرلهم باااى
ودارت السيارة ومشت ....
شريف واقف فى جنب بوه وشوشه : مش قلتلى بتاخدهالى يا بابا علاش خليتها تمشى
-خليفه : سيورها تولى و بأدن الله يابابا بناخدهالك ..
وتلفتله : نبيك تكون راجل ان قعدت انا حى ولا موتت بنت عمك ليك
شريف يشبحله وساكت
___________________________________
ومشت ربيعه لطرابلس ...
وفى نفس اليوم دارو لحنين جواز ..ياحنه عمك الطيب راجلها يخدم فى الخارجيه وايده واصلة ..
باتو هاديكا الليله والفجر اتسقدو لتشيكا لحقو ولدهم ماهو روح قبلهم باسبوع ...
وبدت رحلت حنين فى حوش حناها ...
العيشة برة تختلف عن العيشة هنايا .. حناها علمتها الاكل بالموس والشوكه .. وعلمتها الاهتمام بشعرها وشري الزيوت ..فتحتلها عيونها وهيا صغيرة
ومشت الايام...... وفاتو ثلاث سنوات ....حنين بدى عمرها سته سنين ...وبتخش المدرسه ..الصيف اللى قبل ماتخش للمدرسه روحو ليبيا ...
قعدو فيها ثلاث اسابيع ..قضتهم كلهم حنين مع بوها ...
وشافت سرور بنت عمها اللى قريب تنستى حتى شكلها كيف ...اما عمها خليفه كان رافع شريف مراجعه لايطاليا .. فماتلاقتش نهائي لا مع عمها خليفه ولا مع ولده شريف ...وتلاقت مع عمتها امنه ولعبت مع بنتها ندى اصغر منها بعام ونص .. اما بنتها لبنى كانت صغيرة جابتها بعد وفاة نساوين خوتها ..وقعدو يلعبو على سيف ولد امنه يناغوله اصغير عمره شهور كيف مولود
لكن البنت متغيرة .. عمران حاير فيها كيف قاعدة عمرها ست سنين ومتغيرة ...تبى تاكل بالشوكه ..ومش متحمله التراب ...شعرها بدى ناعم هلبا لانها كبرت وحناها مهتمه بيها
وحسها زى المترفعه على ندى بنت عمتها بالرغم هما صغار ..
