#الدرج_العالي
🌷🌹للكاتبه زهور جمال الدين 🌹🌷
❣❣الحلقه السادسة❣❣
شريف واقف مصدوم ويشبح لحنين ...
البنت اللى قدامه مش نفسها البنت اللى فى الصورة
واااك قداش عجباته ..
ابتسملها: انتى شكون!!
-حنين : انا بنت عمك
-شريف : والنعم
طبعا شريف موصى سرور انه اول مايخش الخيمه بياخد العروس وبيخشو الحوش ..لان بسلامته نوعه خجول وميحبش ايقعمز فى زحمه نساوين ..
وبالفعل وقف شريف وهيا على يمينه ...
وحط يده فى يدها .. حنين رعشت مع بعضها لما مسك يدها ..
-شريف: هيا ..
ونزل من الدرجات اللى درايرينهم للكوشه ..وهيا نازلة معاه
وتخمم .. ياعملة شن ايردك لجواجيك ...
ومشو من الممر والاغانى تخبط ...
وخشو من باب حوش بوه ومشو عالجنب دايرين درج خارجى ...
ركب هوا وياها من هداكه الدروج معاهم سرور بس
وهيا ترعش مع بعضها ...وهوا حاس بيها ..بس كان فى اعتقاده انها زى اى عروس ترعش يوم دخولها
وهيا يانارى ترعش من الفضيحه ...
لان نوع عائلتهم ايراجو فى العروس تتهنى...
مش زى العائلات اللى فاتت الموضوع هدا ..ولازم ايراجو العريس يطلع ..قاعدين على عادات زمان ..
وهيا يانارى كيف بدير وكيف بتتصرف
_____________________________________
اما عمتك ربيعه يانارى ..
روحت للحوش ترعش ....
-سهام كنتها : خيرك يا ماما .. خيرك ترعشى
-ربيعه : غير غطونى بس ...غطونى رانى الموت زايرتنى
-محمود : بعيد السو عليك يااام
-الطيب: خيرك ياربيعه شن جاك ..ولا هدا كله على خاطر عطيتى حنين
-ربيعه : غطونى ..غطونى رانى بنموت
وهاديكا العزوز تنز بالعرق ...وتصفق مع بعضها ...
هيا تصفق من هنايا وحنين تصفق من غادى ..
-محمود : نوضى نرفعك للعيادة شكلك انضربتى من وحدة من المكيفات فى الصاله
-ربيعه: وراس وليدى غير خلينى بس..رانى اللى فيا سادنى
-محمود : نوضى تربحى نطمن عليك غدوة بنسافر انا عالاقل نمشى مطمن
-الطيب : وخيركم مستعجلين انتو
-سهام : والله ياعمى تشبح فيها كيف انت الصغار خليناهم عند جارتنا سوريه ..الحال حال قراية مقدرناش انغيبوهم ..جيت غير انا ومحمود
-محمود: هيا وراس اميمتى نوضى امعاى هنينى
-الطيب: خشى جيبيلها جلبابها والشال متاعها يا سهام تو نرفعوها بالسيف
-سهام : هى دقيقه بس
وبالفعل لبسوها ورفعوها للعيادة
________________________________
حنين وشريف خشو للحوش ...
وسكرو الباب وراهم ...
لما خشت هيا ..انبهرت بالحوش وجماله .. والصرف باين عليه ..والدوق كله حلو
-شريف حاط يده اليسار فى جيبه وواقف : نورتى حوشك يا عروسه
حنين طول خشت دار نومها ....وقعمزت على حاشيه السرير
جى شريف وقف وراها ..وحط يده اليمين عالطرحه جبدها بالشوى تحولت منها ...
-شريف: خيرك متلخبطه ..خلى روحك عاديه
