#الدرج_العالي
.
🌹🌷للكاتبة زهور جمال الدين 🌷🌹
.
❣❣الحلقة الرابعة عشر ❣❣
.
.
فى المانيا ...
محمود واقف فى الممر جنبه امه وبوه وزوجته ...
ايراجو فى نتيجه الكشف متع الكمبيوتر عالدماغ اللى داروه ل اياد فى نفس المستشفى اللى هوا فيها
وبالفعل طلعت الممرضه وطلبت من الاب والام ايخشو للدكتور ...
خشو للغرفه ..وبعد نص ساعه طلعو
-الطيب: هااا بشر يا محمود شن قاللكم الدكتور
-محمود فرحان : الحمدلله يابوى الدكتور طمنا قال وضعية خلايا الدماغ اكويسة
-سهام : لكن قال ضرورى انحافظو عليه من الصقع والحرارة عالاقل الفترة المؤقته هادى
-ربيعه: الحمدلله ربي جبر بخاطرنا .. الحمدالله على سلامته وليدى
-سهام : الحمدلله يا ماما..والله كنت مشغولة ع النتيجه
-الطيب : ربي كريم
_____________________________________
فى حوش الصادق ..
خشت سيارة تجرى ...فيها ولد صغير شكله يقرا فى الاعدادى ..
درس بالقوة لين السيارة دارت صوت .. ونزل منها يجرى
خش للمربوعة يجرى ..
محمد: ياعمى البشير ولدك سيف داير حادث عالطريق سيارته مقلوبة
وقفو الرجالة كلهم وطلعو يجرو ..
ووصل الخبر للنساوين وصارت فيهم حوسة
ودارتلهم امنه عياطات ومناحه ..وطلعت زهرة تجرى حفيانه جيهة حوشها ..من قبل ماتوصل السور وهيا تعيط : ياشريف
..ياشريف وينك
فتح شريف باب حوشه سمع الدوشة ومرت بوه تنادى
شريف واقف قدام باب حوشه فوق: خيرك ياعمتى شن فى
-زهرة : العيلة اتخدت ..سيف والبناويت انقلبت بيهم السيارة عالطريق
-شريف نازل يجرى من الدروج: شن تقولى انتى ..
فتح باب الحوش وطلع يجرى ..فات زهرة خلاها واقفة ومشى يجرى للرجالة متجمعين ..وفى اللى راكبين سياراتهم ومشو
-شريف : شن فى يابوى
-خليفه داهش : غير فهمونى السيارة منو فيها
-شريف : حنين وسرور معاه يابوى ..
-خليفه : قالو انقلبت بيهم بعد طريق البيستا
وتلفت ماشى لسيارته : غير حولو من الطريق
ولع السيارة وعفس عليها بالقوة طلعها من بوابه الحياش بسرعه ..
-خليفه : غير راجى نمشى معاك
ومشى لنهايه الطريق ..لقى الناس متجمعه والسيارة مقلوبة .. نزل يجرى مالقى حد
-يعيط: وينهم اللى فى السيارة
-رد عليه شاب: انقدوهم الناس يا خوى ورفعوهم فى السيارات للمستشفى العام
ركب شريف سيارته ...وطار بيها للمستشفى العام
___________________________________
فى المانيا
روحو العويلة كلهم للحوش ..
-الطيب : مدامة اطمنا على ولدى اياد اعطونا الادن احنا بنروحو
-سهام : علاش يا عمى انتو ماجيتو ماليكمش هلبا
-الطيب: لا سلم بنتى قولونا مربوحة..انا والله عندى ماندير فى تشيكا
-ربيعه : لااااياودى انا بنروح ليبيا بنمشى لبنتى
-الطيب: ماك اتكلمى فيها كل يوم واطمن فيك وتقولك حالى باهى
-محمود : انتو غير زيدو معانا هالايام وبعتالى ساهل
-الطيب: بالنسبه ليا انا مدام اطمنت على ولدى ..خلاص هوا هداكة بنمشى نطمن على شغلى ..اما امك كانها بتقعد على كيفها
-محمود : اقعدى معانا ياام خيرك
-ربيعه: وراس وليدى قلبي ناقزنى على بنت اختك ..حاسه ان صاير معاها حاجه
-الطيب: اللطف عليها ..فاولى خير يا مراءة
-ربيعه عيونها دمعو: يااااربي يكدب احساسى ..
وتلفتت لسهام : سهام سلم بنيتى اطلعى جيبيلى كرت خلى نتصل بيها مش عارفه خيرنى
-سهام : هاك تليفونى يا ماما.. مشحون مكالمه خارجيه
-ربيعه: هاتى
