#الدرج_العالي
🌷🌹للكاتبة زهور جمال الدين 🌹🌷
❣❣الحلقه الخامسه❣❣
وفات شهر عالخطوبه ...
شريف يجرى مايدرى ويزوق فى الدور الثانى فى حوش بوه وايتكم .. جبس امبورد وثريات واثاث .. شى بفلوسه وشى عاونه فيه بوه
اما فى حوش الطيب
ربيعه تشبح فى بنت بنتها كيف صاير فيها ...كبدها عاصرتها عليها .. ومغصوصه
-ربيعه: اسمع يا طيب .. اما حكاية نخلى حنين فى ليبيا ونرجع هنايا والله ماعاد نقدرها
-الطيب : وشنو امالا تبينى نبطل خدمتى ونقعمز فل ليبيا
-ربيعه : كانا على التوقيعه متع كل عقاب شهر عادى تاخد تدكرة وتجى اتمم امورك وترجع
-الطيب: شكلك خرفتى انتى يا مراءة
-ربيعه: امالا ماتواخدنيش انا بنقعد مع بنتى فى ليبيا وانت اقعد هنايا ومرة مرة دير علينا طلة
-الطيب تنحنح : عالاقل اعطينى وقت انساوى امورى...مش هكى طول ..
-ربيعه : امالا دير فى بالك انى منقدرش نعيش بعيد على بنتى
-الطيب : انتى توة ارجعى معاى ونوعدك انتمم امورى فيسع ونحولو فى ليبيا ..المشكلة العرس اتحدد خلاص
-ربيعه: اصلا توة بعد ماححدو الموعد معش نقدرو انأجلو
-الطيب: باهى امتى بتسافرو انتى وحنين
-ربيعه : بعد عشرة ايام .. يبدا مزال عالعرس شهر بالزبط .. عالاقل تتعرف البنية على ولد عمها وتاخد عليه ..ونحجزو الصاله ونشرو باقى الحاجات
-الطيب: هوا امتى بالزبط حددتو العرس
-ربيعه : يوم 20/1/2010
انفتح باب الحوش وخشت حنين كيف مروحه من النادى لابسه سروال توته واسع وتيشرت وحاطه شنطه على كتفها وفاتحة شعرها
-حنين : السلام عليكم
-الطيب وربيعه : وعليكم السلام
-الطيب: البنات قبل عرسهم بشهر ايتقو روحهم من الشمس وايساوو ظوافرهم وانتى قاعدة شادتها عالنادى
-حنين بصوت واطى: هادوكا اللى فرحانات باعراسهم
-الطيب مسمعهاش: شن قلتى حنونه
-حنين تلفتتلها مبتسمه : قلتلك منقدرش نستغنى عن النادى
-الطيب : ووين مزال بتلقيه النادى غادى جهه حوش بوك
حنين خشت لدارها واتمتم : هالفترة المحدودة نستغنى عليه النادى ...غير نطلق من هالزواجه الحرفه .. ونرجع كيف ماكنت هنايا
_______________________________
فى حوش امنه
ندى مناديه سميحه صاحبتها ..
اليوم اللى قبله وصتها اتجيبلها صورة بنت اسمها عبير كانت تقرا معاهم ..البنية يانارى شينه ..ربي ماعطاهاش جمال
..وندى طلبت صورتها لغايه فى نفسها
-ندى : جبتيها الصورة
-سميحه : جبتهالك اهيا .. غير كان نعرف شن بديري بيها ..
-ندى خدت الصورة وتتفرج عليها وتضحك : يا نارى معالم الجمال ماتكسابش منهم حاجه
-سميحه : الله غالب الشكل هدا خلقه ربي
-ندى: خاطرى نعرف كيف اقتنعت و عطتهالك الصورة
-سميحه : قلتلها نعرف ناس ايدورو لولدهم وقلتلهم عليك
..شوى عطتنى الصورة قبل حتى لا نطلبها منها
