الدرج العالي

الحلقه ١٥

#الدرج_العالي

.
🌷🌹للكاتبة زهور جمال الدين🌹🌷
.

❣💕الحلقه الخامسة عشر ❣💕

.
.
عبدالتواب اتصل بسرور ردت طول

-عبدالتواب : السلام عليكم

-سرور: وعليكم السلا م

-عبدالتواب : كيف حالك اليوم انشاءالله احسن

-سرور بدلع : الحمدلله الباين عليك غير تسأل

-عبدالتواب: والله اللى فى النفس مايعلم بيه الا الله .. لكن الظرف يحكم

-سرور بطير بالفرحه: وشنهوا اللى فى النفس ليش ماتقوليش عليه

-عبدالتواب: ناويك حلالى مانبي نخش معاك فى المحرمات

-سرور: كلمه انحبك صارت من المحرمات توة

عبدالتواب انصدم واتبكش 😁😁.. معش عرف شن يقول

-سرور زعلانه 😔: باهى بلاش..مش لازم تقول

-عبدالتواب : بنبعت باتى بكرة يخطب ..وبعد يومين نقرو الفاتحة وقتها تسمعى كل اللى ايريحك

-سرور تضحك: بتخطبنى هكى وانا مكسورة ومجبسة 😁

-عبدالتواب: نبيكى كيف ماكنتى

-سرور: وانا نبيك ونحبك وكل شى

-عبددالتواب يضحك: ربي كريم ..نقرو الفاتحه وماتاخدى الا اللى يرضيكى

_______________________________________

حنين فى الحمام ...

غسلت وجهها بيدها اليمين .. ومسحاته ...
وفتحت الباب وطلعت ...

لقت شريف واقف ايراجى فيها فم الباب

-حنين تضحك : خلعتنى😁

-شريف: استاحشتك ياروحى ...الحمدلله اللى ربي حفظك ليا

-حنين : اشششش ..حد يسمعك ..بوك ولا عمتى زهرة

-شريف: تعالى قعمزى عالكرسى ارتاحى

مشت بالشوى عندهم زوز كراسى وطاولة فى الممر قعمزت على كرسى وهوا قعمز عالكرسى الثانى

-شريف: هيا شنو نركبو لحوشنا

-حنين : ياعمرى تشبح فيه بعيونك الحوش معبى حناى والجيران ..وشوى ثانيه بتوصل اميمه

-شريف: توصل حناك انزلى حبيبتى ..هيا نركبو نبى نحضنك
..نبى نبوسك ونقولك الحمدلله ربي حفظك ليا

-حنين : ياروحى معقولة نركب ونخلى النساوين ..ايقولو غير جت حناها نزلت

-شريف تعصب : اووووف علينا عاد ..عندى منقولك ياحنونه
..ليش هكى بس

-حنين : باهى غير خلى ايحطو الغدى ناكل كاشيك حتى على خاطرهم ونركب

-شريف: لا تغدى كويس حبيبتى صحتك اهم ..وانا نراجيك عادى حتى العمر كله