#اميرة_قلبي❤
بقلم زهور جمال الدين(10)
_
ثانى يوم الساعه 9
سميرة مقعمزة عالصالون وفارس مقعمز فى جنبها يشربو فالقهوة
-سميرة/ سلم اوخى وربي يطول فى عمرك..والله ستاحشتك القعدة معاك والهدرزة .. معقولة عامين منشوفكش يا ظالم
-فارس/ تشبحى فالخدمه مش مخليتنى حتى نحك راسى
-سميرة / وامتى بدير عويلة يا اوخى .. ويبدو صغارك يلعبو جنبك
-فارس ضحك / نصيبات
-سميرة / معقولة خدمتك وصحابك وسفرياتك مالقيتش فيهم بنت الحلال اللى تكمل بيها نص دينك
-فارس ابتسم / والله شن منقولك .. ممكن لقيت ..لكن غير خلى نزيد نتاكد
-سميرة/ بتتاكد من شنو
-فارس/ من انها طيبه وتناسبنى وتناسب عيلتى
-سميرة / ياريت اديرها عالاقل تفرحنى و نتهنى عليك
-خشت هيفاء مرت خوهم فايز / فرحونا معاكم
-فارس يضحك / شن بنفرحوك .. تعرفى سميرة نقناق كل مرة ..
-هيفاء تصب لى روحها فى فنجان قهوة / باهى شن رايك ان سميرة معاها حق ..فايز لما فى عمرك صغارنا يقرو ..
-سميرة /وعبدالسميع لما فى عمره هوا توة قداش ليه متزوج
-خشت مفيدة / صباح الخير
-سميرة / صباح الخيرات ..هاتى فنجانك وتعالى هى
-فارس/ خوتى تزوجو بكرى لانهم مالقوش من يدلعهم .. لكن انا عكسهم امى ادلع فيا وعايش طفل مدلل عندها لتوة
-مفيدة تضحك/ عاركى معاى يا سميرة عاركى.. قلتله الناش كلولى وجهى وين مانمشى يقولولى زوجتى صغارك وخليتى سلفك
-فارس يضحك / هاهاهاها
-هيفاء/ والله فاتاتك هاديكة الدكتورة اللى مع فايز وقالك عليها العام اللى فات
-فارس/ لا لا لا بنات برة مايخشوليش راس.. انا نبيها ليبيه متربيه فى ليبيا ...
-سميرة / مش توة قلت حصلت وحدة
-فارس/ خلى شوى نتاكد منها وبعتالى ساهل
-مفيدة / ربي يجيبلك بنيه طيبه على قيس نيتك الطيبه يا فارس
__________________________________________
_
مع الساعه 10 ونص
اميرة مقعمزة فى مكتبها .. ومعاها وحدة كبيرة فالعمر
-اميرة/ افهمينى يا حاجه .. الاستاد عنده حالة وفاة
..الحقيقه معتقدش يجى حتى اليوم .. وتشوفى فيا اتصلت بيه مرتين تليفونه مقفل
-المراة/ انا بنراجيه وكانا ماجاش تو نروح
-اميرة / انتى لو تقوليلى انا شن تبيه مرات نقدر نخدمك
-المراة / لا لا صحيتى بنيتى هوا قايلى من فترة نجيه اليوم
خلى نراجيه وخلاص .. وكانى مضايقاتك تو ننزل لوطا
-اميرة ماسكه ورقه وتكتب فالبيانات وابتسمت/ لا لا مفيش مضايقه خليك هنايا
بعد ثلث ساعه
خش فارس للممر وماسك فى يده شنطه .. ووراه زوز موظفين ... الموضفين خشو لى مكتب عاليمين .. وفارس مشى لى مكتب اميرة ..
-فارس وقف عالباب/ صباح الخير
-اميرة قلبها طق وابتسمت/ صباح النور
-فارس شبح للمراة اللى تراجى فيه / خالتى لطفيه ...
خشلها/ يا اهلين وسهلين بيك
-لطفيه وقفت / اهلين وليدى شن حالك
-فارس/ الله يسلمك ويحفظك ..سامحينى نسيت الموعد
..من بكرى تراجى فيا
اميرة تشبحله معلقه عيونها فيه ومبتسمه
-لطفيه/ لااا مش بكرى هلبا .. شن حالك وليدى
-فارس/ تعالى خشى معاى لى مكتبى
وتلفت لى اميرة / قولى لى يونس يجيب عصير
وغمزلها ....
ضحكتله / حاضر
خش فارس هوا والمراة للمكتب ... قعمزت عالصالون وقعمز فارس جنبها
-فارس/ شنحالك وشنو اخبارك وشن دايرة لك وحشه
وقعدو يهدرزو قيس الربع ساعه ينشد على حالها واحوالها وكيف صاير فيها .. وجابولها العصير وجابوله هوا قهوة
-قعمزت لطفيه عالصالون / منبيش نعطلك يا اوليدى ..
مدت يدها للشنطه طلعت اوراق/ اهما الاوراق اللى وصيتنى عليهم المدة اللى فاتت
-خداهم فارس ويشبح فيهم / ورقه الرقم الوطنى لازم تكون مصدقه من شيخ المحلة فى منطقتكم ومختومه
-لطفيه/ هاتها تو نغيرلهالك
-فارس/ المشكلة انهم السنتين الاخيرات مشددين فالاوراق متع الحج .. اى غلطه يردو الملف وخودلك للعام اللى بعده
-لطفيه قامت ايديها / ياااااربي اكتبهالى الحجه العام هدا انا وكل ومن طلبك ياااارب
-فارس/ اامين ..
-لطفيه / ربي يحفظك ويسعدك ياوليدى
-فارس/ ويخليك انشاءالله
